म्यानमारको चाइन प्रदेशका सामाजिक मन्त्री पाउलुन मिन थानसहितको टोलीलाई स्वागत गर्दै बुटवल उपमहानगरपालिकाकाकी कार्यवाहक प्रमुख गुमादेवी आचार्य।
बुटवल- नेपालमा सञ्चालित सामाजिक सुरक्षा कार्यक्रमको अध्ययन गर्न म्यानमारको सामाजिक विकास मन्त्रीसहितको टोली नेपाल आएको छ।
म्यानमारको नीति निर्माण तहको विशेषज्ञसहितको अध्ययन टोलीले नेपाल सरकारले सञ्चालन गरेको सामाजिक सुरक्षा कार्यक्रमको बारेमा बुधबार बुटवल उपमहानगरपालिकामा जानकारी लिएको हो।
टोलीले बुटवल उपमहानगरपालिकामा सामाजिक सुरक्षा कार्यक्रमको व्यवस्थापन प्रक्रियाबारे अध्ययन गरेको छ। नेपालमा २५ वर्षअघि सुरु भएको सामाजिक सुरक्षा भत्ता कार्यक्रमबाट प्रभावित भएर अहिले म्यानमारले समेत लागू गर्ने तयारी गरेको छ।
सोही कार्यक्रमका बारेमा जानकारी लिन त्यहाँका सामाजिक विकास मन्त्रीको नेतृत्वमा विज्ञहरुसहितको टोली यहाँ आएको हो। म्यानमारको चाइन प्रदेशका सामाजिक मन्त्री पाउलुन मिन थानसहित १२ जना सहभागी टोलीले बुटवल उपमहानगरपालिकाको अध्ययन अवलोकन गरेको हो।
बुटवल उपमहानगरपालिकाले नेपालमै नमूना तरिकाले सामाजिक सुरक्षा कार्यक्रम सञ्चालन गरेको भन्दै सुरुमै बुटवल आएको टोलीका संयोजक म्यानमारका मन्त्री थानले बताए।
मन्त्री थानले आफूहरुले पनि यो कार्यक्रम म्यानमारमा लागू गर्न चाहेकाले नेपालबाट सिक्न आएका जनाए। सो टोलीलाई उपमहानगरपालिकाका कार्यबाहक प्रमुख गुमादेवी आचार्य, प्रमुख प्रशासकीय अधिकृत चक्रपाणि शर्माले बुटवलको पञ्जीकरणको अवस्था र सामाजिक सुरक्षा कार्यक्रमका बारेमा जानकारी गराएका थिए।
टोलीले नेपालको सामाजिक सुरक्षा कार्यक्रम र पञ्जीकरणको अध्ययनपछि म्यानमारको सामाजिक सुरक्षा कार्यक्रमको नीति तयार पार्ने बताएको छ। बुटवल उपमहानगरपालिकाले सेवाग्राहीलाई वितरण गर्दै आएको सामाजिक सुरक्षा रकम, वितरण प्रणाली र सेवाग्राहीको सन्तुष्टि र पञ्जीकरण बारेमा टोलीले विशेष चासो दिएर अध्ययन गरेको कार्यबाहक प्रमुख आचार्यले बताइन्।
टोलीले वडास्तरबाट भइरहेका कामको बारेमा पनि विशेष चासो दिएको थियो। सोही क्रममा बुटवलको ५ नं वडा कार्यालयमा पुगेर त्यहाँको सेवा प्रवाहका बारेमा टोलीले विशेष जानकारी लिएको वडाध्यक्ष तेजप्रसाद विकले जानकारी दिए। कम्प्युटर सफ्टवेयरदेखि सेवाग्राहीका सन्तुष्टि र सुरक्षा व्यवस्थाका उपायका बारेमा जानकारी लिएको अध्यक्ष विश्वकर्माको भनाइ छ।
बुटवलमा ८ हजार ५ सय जनाले सामाजिक सुरक्षा भत्ता लिइरहेका छन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
