काठमाडौं- विश्वकप फुटबल छनोटको दोस्रो चरणमा नेपालले बिहीबार कुवेतविरुद्ध खेल्दै छ। कुवेतको जविर अल अहमेद अन्तर्राष्ट्रिय मैदानमा खेल नेपाली समयअनुसार राति पौने ११ बजे हुनेछ।
फिफा वरियतामा कुवेत १५६ औँ स्थानमा छ भने नेपाल १६६ औँ स्थानमा रहेको छ। वरियतामा नेपालभन्दा धेरै अघि नभए पनि कुवेती टोली नेपालमाथि सधैँ बलियो देखिन्छ। यसपटक भने त्यसलाई बदल्न नेपाली टिमका प्रशिक्षक योहान कालीन लागिपरेका छन्।
कुवेतविरुद्ध नेपालको विगत हेर्दा सुखद देखिँदैन। पछिल्लो पटक नेपाल र कुवेतबीच गएको मार्चमा भएको दुई खेलमा एउटा गोलरहित बराबरीमा टुंगिएको थियो भने अर्कोमा नेपाल १-० ले पराजित भएको थियो।
पछिल्लो दुई खेल ठिकै देखिए पनि समग्रमा नेपालले कुवेतसँगको ६ खेलमा २२ गोल खाएर १ गोल मात्रै फर्काएको छ। त्यही १ गोल पनि १९८२ को एसियाली खेलकुदका बेला भएको थियो। उक्त खेलमा नेपाल ३-१ ले हारेको थियो। नेपालका लागि वाई बी घलेले गोल गरेका थिए। १९८६ को एसियाली खेलकुदमा नेपाल ५-०, १९९४ को एसियाली खेलकुदमा ८-० ले, २००० को एसियाली खेलकुदमा ५-० ले हारेको थियो।
फिफा वरीयताको एसियाली राष्ट्रमा शीर्ष ३४ भित्र पर्दै नेपालले विश्वकप छनोटको दोस्रो चरणमा सिधै स्थान बनाएको हो। जसमा अप्रिलमा भएको वरीयताअनुसार एसियाली राष्ट्रभित्र नेपाल ३४औं स्थानमा नै थियो।
दोस्रो चरणमा रहेका ८ समूह विजेताका साथै ४ उत्कृष्ट उपविजेता गरी १२ टिम विश्वकप छनोटको अन्तिम चरणमा पुग्नेछन्। यी १२ टिमले नै सन् २०२३ मा हुने एसियन कपमा स्थान बनाउने भएकाले पनि प्रतियोगिताको महत्व बढेको छ।
यसपटक नेपाली टिमको नियमित कप्तान विराज महर्जन टिममा नपरेपछि नेपाली टोलीको कप्तानी गोलकिपर किरण चेम्जोङले गर्ने छन्। यसअघि मलेसियन लिग विजेता क्लब जोहार दारुल टाजिम एफसीसँग मैत्रीपूर्ण खेलमा किरण नरहेकाले नेपाली टोलीको कप्तानमा सुजल श्रेष्ठ रहेका थिए।
कुवेतसँगको खेलपछि नेपालले चाइनिज ताइपेइसँग उसैको मैदानमा भदौ २४ गते खेल्दै छ। दुई खेलका लागि प्रशिक्षक योहान कालिनले २३ सदस्यीय टोली छानेका छन्।
विश्वकप छनोटमा समूह ‘बी’ मा नेपालसहित अस्ट्रेलिया, जोर्डन, कुवेत र चाईनिज ताइपेइ रहेका छन्।
विश्वकप छनोटमा कुवेत र चाइनिज ताइपेइसँगको खेलपछि नेपालले असोज २८ गते जोर्डनसँग जोर्डनमा नै खेल्नेछ। मंसिर ३ गते कुवेतसँग दशरथ रंगशालामा, चैत १३ गते चाइनिज ताइपेइसँग दशरथ रंगशालामा खेल्नेछ। आउँदो वर्ष जेठ २२ गते दशरथ रंगशालामा जोर्डनसँग खेल्नेछ।
यस्तै नेपालले अस्ट्रेलियासँगको पहिलो खेल अस्ट्रेलियाको मैदानमा असोज २३ गते र अस्ट्रेलियासँग दशरथ रंगशालामा चैत १८ गते खेल्नेछ।
को को छन् टिममा ?
गोलकिपर - किरण चेम्जोङ, विकेश कुथु, विशाल श्रेष्ठ
डिफेन्डर - सरोज दाहाल, अजित भण्डारी, दिनेश राजवंशी, अनन्त तामाङ, देबेन्द्र तामाङ, रजिन धिमाल र सुमन अर्याल।
मिडफिल्डर - रोहित चन्द, सुनिल वल, रवि पासवान, अन्जन विष्ट, सुजल श्रेष्ठ, हेमन गुरुङ, विक्रम लामा, तेज तामाङ, सन्तोष तामाङ र विशाल राई।
फरवार्ड - विमल घर्तिमगर, अभिषेक रिजाल र नवयुग श्रेष्ठ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
