काठमाडौं - अस्ट्रेलिया र इंग्ल्याण्डबीचको टेस्ट क्रिकेट बर्मिङहममा सुरु भएसँगै बिहीबारदेखि आईसीसीको नयाँ योजना विश्व टेस्ट च्याम्पियनसिपले आकार लिएको छ । दुईवर्षसम्म चल्ने यो च्याम्पियनसिपको विजेता २०२१ को जुनमा फाइनल खेलपछि थाहा हुने छ ।
आईसीसीले २०१० मा नै विश्व टेस्ट च्याम्पियनसिपको योजना बनाएको थियो । त्यसपछि २०१३ र २०१७ मा विश्व टेस्ट च्याम्पियनसिप सुरु गर्ने आईसीसीको प्रयास असफल भएको थियो । यो पटक भने योजना लागु भएको छ ।
विश्व टेस्ट च्याम्पियनसिप टेस्ट क्रिकेटको लिग खेल हो । दुई वर्षको अवधिमा टेस्ट मान्यता प्राप्त १२ देशमध्ये शीर्ष ९ देशले तीन/तीन सिरिज गरेर २७ सिरिज खेल्ने छन् । नौ टिममा अस्ट्रेलिया, बंगलादेश, इंग्ल्याण्ड, भारत, पाकिस्तान, न्यु जिल्याण्ड, दक्षिण अफ्रिका, श्रीलंका र वेस्ट इन्डिज रहेका छन् ।
टी-२० र एकदिवसीय क्रिकेटमा हुने विश्वकपमार्फत चुनिने विश्व विजेता जस्तै दुई वर्षको अवधिमा टेस्ट क्रिकेटमा पनि विश्व विजेता चुन्न विश्व टेस्ट च्याम्पियनसिप सुरु भएको हो ।
एक टिमले यो अवधिमा फरक ६ टिमसँग सिरिज खेल्नु पर्ने छ । जसमा तीन सिरिज होम र तीन सिरिज अवे मैदानमा हुने छन् । सिरिजमा कम्तिमा दुई खेल र बढीमा पाँच खेलसम्म हुने छन् । यसैले हरेक टिमको खेल संख्या बराबर नभए पनि सिरिज संख्या भने बराबर हुने छ । यसरी लिग चरणका सिरिज सकिएपछि शीर्ष दुई टिमले फाइनल खेल्ने छन् ।
अंक दिने तरिकामा पनि आईसीसीको नियमले कम खेल खेल्नेलाई असर नपर्ने गरी सिरिजकै आधारमा अंक दिने व्यवस्था मिलाएको छ । जस्तो कि पाँच खेलको सिरजमा एक खेल जित्दा २४ अंक पाइन्छ भने दुई खेलको सिरिजमा एक खेल जित्दा ६० अंक रहने छ । बराबरी भएमा जित्दा पाइने अंकको एक तिहाई अंक पाइने छ । यस्तै आईसीसीको नयाँ नियम अनुसार खेलमा ‘स्लो ओभर’ भएमा टिमको दुई अंक काटिने छ ।
अहिले चलिरहेको एशेजलाई हेरेर अंक बुझ्ने हो भने एक खेलमा २४ अंक भार रहने छ । जसले पाँच खेलमा १ सय २० अंकभार हुने छ । इंग्ल्याण्ड र अस्ट्रेलियामध्ये एक टिमले पाँच खेल नै जिते भने १ सय २० अंक पाउने छन् । यदि ३-२ ले सिरिज जितेमा जित्ने टिमले ७२ अंक र सिरिज हार्ने टिमले ४८ अंक पाउने छन् । यदि दुई खेल बराबरी भएर तीन खेल एक टिमले जितेमा जित्ने टिमले ८८ अंक र हार्ने टिमले १६ अंक पाउने छन् ।
टी-२० र एकदिवसीय क्रिकेटमा हुने विश्वकपमार्फत चुनिने विश्व विजेता जस्तै दुई वर्षको अवधिमा टेस्ट क्रिकेटमा पनि विश्व विजेता चुन्न विश्व टेस्ट च्याम्पियनसिप सुरु भएको हो ।
एक देशले अर्को देशसँग खेल्ने सिरिजलाई आधार बनाएर उत्कृष्ट टेस्ट टिमको वरियता बनाउनुभन्दा नयाँ शैलीमा ल्याइएको च्याम्पियनसिप उत्कृष्ट हुने क्रिकेट विश्लेषकहरुको अनुमान छ । यसले टेस्ट क्रिकेटमा हराउँदै गएको दर्शकको चासो फर्काउन सकिने उनीहरुको भनाई छ । यो सिरिजको दुई वर्षे अवधिमा सिरिज अन्तर्गत नरहने गरी पनि टिमहरुले टेस्ट खेल्न पाउने छन् ।
यो पनि - एसेज क्रिकेट : अस्ट्रेलिया र इंग्ल्यान्डबीच स्वाभिमानको लडाइँ
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
