काठमाडौं- अभिनेता महेश त्रिपाठीलाई अब सिनेमाबाट व्यावसायिक सफलता हात पार्नुछ। आफ्नो निकट रिलिज 'खजुरे ब्रो'का बारेमा कुरा गर्दा उनले आफ्नो इच्छा जाहेर गरे।
'करिअरका हिसाबले मास अडियन्समा जानु छ र अलिकति व्यावसायिक सफलता प्राप्त गर्न मन छ, त्यो मलाई आवश्यक छ', उनले भने।
हुन पनि 'हल्कारा- द पोस्टम्यान' फेम महेशलाई कामको कुनै कमी छैन । महेशका चार-पाँच वटा सिनेमा रिलिजका क्रममा छन् । थप चार-पाँच वटा सिनेमा फ्लोरमा जाने तय भइसकेको छ। यस हिसाबले अभिनयका गुरुसमेत रहेका उनी व्यस्त छन्।
'खजुरे ब्रो'को प्रचारको देश दौडाहाबाट भर्खरै राजधानी आइपुगेका उनी हाल एउटा सिनेमाको पूर्वतयारीमा समेत व्यस्त छन्। यही सिनेमाको तयारीका लागि ४ वटा सिनेमा छाडेको उनको भनाइ छ।
भन्छन्- कामको हिसाबले मलाई समस्या छैन। छानीछानी गर्नुपर्ने अवस्था अहिले छ। अहिले म अर्को सिनेमाको तयारीमा छु। यो सिनेमाको तयारीका लागि मैले अर्को चार वटा सिनेमा छोड्नुपरेको छ। कामको हिसाबले ठिक छ। क्रिटिकल्ली पनि राम्रो एप्रिसिएसन मिलिरहेको छ। अन्तर्राष्ट्रिय अवार्डदेखि यहाँको माहोलमा कामको तारिफ सब मिलिरहेको छ।
'फुच्चे वैज्ञानिक' बनेर एक समय नेपालका मूल संचारमाध्यम हटकेक बनेका महेशले अभिनय रोजे।
इन्जिनियरिङ सकेर फिल्मी दुनियाँमा आएका महेश ‘हल्कारा : द पोस्टम्यान’बाट अमेरिकी फिल्म फेस्टिभल वर्ल्डफेस्ट ह्युस्टनमा उत्कृष्ट अभिनेता घोषित भएपछि उनको चर्चा फराकिलो भयो।
यो प्रतिष्पर्धामा ‘अ प्लेस कल्ड होम’बाट बेन ग्याभिन र बेलायती फिल्म ‘फेरी म्यान’बाट ओलिभिर ली महेशसँग प्रतिष्पर्धामा थिए । उनले यी दुबैलाई पन्छाए र आफू उत्कृष्ट घोषित भए ।
'हल्कारा'बाट क्लासमा चिनिए, अब मासमा जान चाहन्छन्। 'हल्काराले एउटा क्लास अडियन्समा मेरो एउटा प्रभाव बनाएको छ। एउटा राम्रो एक्टरको इमेज बनाएको छ। मैले गर्ने काममा त्यही अनुसारको आशा राख्नुहुन्छ', उनले भने।
'खजुरे ब्रो'मा उनी शीर्ष पात्रको साथीको भूमिकामा छन्। सिनेमाबाट उनी आशावादी छन्।
महेशका अनुसार यो सिनेमा 'लार्जर देन लाइफ' भन्दा पनि 'रअ' पात्र र कथा खोज्नेहरुका लागि सिनेमा हो। सिनेमाले यी दर्शकहरुको अपेक्षा पूरा गर्दैमा मनोरञ्जन दिन्छ भन्नेमा उनी ढुक्क छन्। निर्देशकको भिजनमा आफू खरो उत्रने कोशिस गरेको उनी बताउँछन्।
'अभिनेताले गर्नुपर्ने धर्म अनुसार मैले यसमा गर्नसक्ने चिजहरु गरेको छु। निर्देशकले कस्तो चाहनुभएको छ मबाट, त्यो चिज मैले निर्देशकलाई दिने प्रयास गरेको छु', उनले भने, 'अन्तिम कुरा सिनेमा आएपछि थाहा हुन्छ तर निराशचाँहि हुनुपर्दैन। निश्चित रुपमा 'हल्कारा' र 'खजुरे ब्रो'का पात्रहरु फरक प्रकार र भूगोलका पात्रहरु हुन्। म आफूभन्दा पनि भिन्न छन्। त्यो हिसाबले दर्शकलाई नयाँ स्वाद हुन्छ।'
पश्चिम नेपालका महेशलाई पूर्वी नेपालको पात्रमा ढल्न २-३ महिना तयारी गर्नुपर्यो। स्वयं अभिनयका गुरु भएकाले तिनका प्रक्रियाहरुसँग जानकार थिए। उनले चरित्रको अध्ययन गरे र त्यसमा आफूलाई ढाले।
यध्यपी व्यक्तिगत हिसाबले यो उनका लागि सहज थिएन।
'बाह्यरुपमा हेर्दा शारीरिक हाउभाउ र बोल्ने भाषाको कुरा छ। त्यो सिक्ने नै हो। त्यहाँका लवज, स्ल्यांगहरु के-के हो, त्योसँग परिचित नै हुने हो। त्यहीका मान्छेहरुसँग कुराकानी गर्ने । अनि शारीरिक हाउभाउ त त्यो चरित्रलाई अध्ययन गर्दै यसरी-यसरी गर्ने भन्दै जोड्दै बनाउने हो', उनले भने, 'अर्को छ मनोवैज्ञानिक पक्ष, त्यो कथा बुझेर नै हुन्छ। त्यसका लागि लेखक-निर्देशकसँग बसेर उनीहरुले त्यो पात्रलाई कसरी देखेका छन् त्यसमा छलफल गरेर उनीहरुको दृष्टिकोण बुझेर गर्ने हो। यसमा उसको ब्याकस्टोरी, जीवन यात्रा र जीवन उदेश्यका आधारमा बनाइन्छ।'
उनले पूरा सिनेमा हेर्न पाएका छैनन्। त्यसैले सिनेमामा कस्तो काम गरें भन्ने मूल्यांकन अहिल्यै गर्न नसक्ने बताए। महेशका अनुसार सिनेमामा धरानमा हुर्केको एउटा डाइनामिक चरित्रमा उनलाई देख्न सकिनेछ।
सुरज सुनुवार निर्देशित सिनेमाले युवा दर्शकलाई तान्ने उनको बुझाइ छ। सिनेमामा उनका अलवा रेयर राई, नीति शाह, नविन मानन्धर आदि प्रमुख भूमिकामा छन्। प्रेम, पैसा र सहकारी ठगीको वरीपरि घुमेको सिनेमाको व्यवसायिक सफलता प्राप्त गर्दै आफूलाई मासमा लैजाओस् भन्ने प्रतिक्षामा महेश रहेका छन्।
सिनेमा बैशाख २८ गते रिलिज हुँदैछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
