काठमाडौं-वैशाख १४ गते रिलिज हुने 'बोक्सीको घर'को प्रचारमा अभिनेत्री केकी अधिकारी आफ्नो तरिकाले खटिरहेकी छन्। आफ्नो निर्माणसमेत रहेको सिनेमा हुनाले उनले धेरैभन्दा धेरै दर्शकको ध्यान आकर्षित गराउन थरिथरिका प्रचार शैली अपनाइरहेकी छन्।
ट्रेलर रिलिजका दिनमा 'बोक्सी' थिममा प्रस्तुति दिएकी उनले सिनेमा प्रचारका लागि फिल्मकर्मीहरुलाई केक र साथमा पत्र पठाउँदै उनीहरुका माध्यमबाट सिनेमाको प्रचार गरेकी छन्।
केकीले नयाँ वर्ष २०८१ को उपहारस्वरुप फिल्मको नाम अंकित केक पठाइरहेकी छन्। साथै उनले सिनेमाको प्रदर्शन मिति र कथा बुझाउने एउटा पत्रसमेत पठाएकी छन्।
उनले यो प्रचार अभियानअन्तर्गत केक पठाइएकामा स्वस्तिमा खड्का, वर्षा राउत, वर्षा सिवाकोटी, बेनिशा हमाल, सरिता गिरी, ‘महाजात्रा’ टिम लगायतले आ-आफ्नो सामाजिक सञ्जालमा केकको तस्वीरसहित फिल्मलाई शुभकामना दिएका छन् ।
केकीको यो तरिकाले सिनेमाले एक प्रकारको प्रचार पाउने नै छ। उनले प्रयोग गरेको यो शैली कत्तिको सफल-असफल हुन्छ सिनेमा रिलिजपश्चात स्पष्ट हुनेछ।
‘बोक्सीको घर’ले बोक्सी कुप्रथाका कारण सोबाट आरोपित नेपाली नारीले भोग्ने पीडालाई प्रस्तुत गर्नेछ।
सुलक्षण भारतीको लेखन तथा निर्देशित सिनेमामा केकी अधिकारी, रमा थपलिया, सुपला सापकोटा, श्वेच्छा राउत, सुष्मा निरौला, सबिन बास्तोला आदिको अभिनय छ । पछिल्लो समय सिनेमाको प्रचारका लागि बनाइएको ‘बुझिनँ मैले’ गीत चर्चामा छ ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
