सुर्खेत– प्रथम जननिर्वाचित प्रधानमन्त्री विश्वेश्वरप्रसाद कोइरालाद्वारा लिखित ‘जेल डायरी’ माथि बुधबार वीरेन्द्रनगरमा विमर्श गरिएको छ ।
जय नेपाल फाउण्डेशन सुर्खेत र प्रेस युनियन सुर्खेतको संयुक्त आयोजनामा विमर्श कार्यक्रम आयोजना गरिएको हो । कांग्रेस नेता शंकर तिवारीले सम्पादन गरेको उक्त पुस्तक कोइरालाले वि.सं. २०१७ देखि २०२५ सालसम्म जेल जीबन बिताएको समयमा लेखिएको हो ।
गत भदौमा प्रकाशन भएको पुस्तकमाथि सम्पादक तिवारी देशव्यापी रुपमा विमर्श गर्दै बुधबार कर्णाली प्रदेशको राजधानी वीरेन्द्रनगर आएका हुन् । विमर्श कार्यक्रममा सहजकर्ता एवम् मध्यपश्चिम विश्वविद्यालयका सहप्राध्यापक डा. अर्जुनबहादुर ऐडीले पुस्तकका बारेमा सोधिएको प्रश्नको जवाफ दिँदै सम्पादक तिवारीले यो जेल डायरी कोइरालाद्वारा लेखिएका अन्य डायरीभन्दा फरक रहेको बताए ।
‘यसमा समाजवादको व्याख्या निकै सुक्ष्म ढंगले गरिएको छ,’ उनले भने, ‘यो डायरी अंग्रेजीबाट नेपालीमा अनुवाद गरिएको हो, कोइरालाले यो पुस्तकमा आफूमा उत्पन्न भएको रिस, आवेग, आक्रोश, खुसी र हरेक भावनालाई निर्धक्कका साथ व्यक्त गर्नुभएको छ ।’
तत्कालिन पञ्चायतविरुद्ध लड्दै गर्दाका संघर्ष, बीपीको निडरता र २००७ सालको क्रान्तिका बारेमा गहिरो रुपमा बुझ्नका लागि जेल डायरी पढ्नैपर्ने तिवारीको भनाइ छ । ‘जेल जीबनलाई उहाँले पीडाका रुपमा भन्दा पनि सयौँ पुस्तक अध्ययन गरी भावी समाज निर्माणको चित्र यो डायरीमार्फत कोरिएको छ,’ उनले भने, ‘राजनीतिक मुल्य, मान्यता र आदर्श कस्तो हुनुपर्छ भन्ने कुरा यो डायरीमा उल्लेख गरिएको छ ।’
कार्यक्रममा सहभागी विद्यार्थी आदर्शबिक्रम सिंहले बीपीको सिर्जना र साहित्यलाई बेचेर कहिलेसम्म राजनीति गरिरहने ? भनी गरेको प्रश्नमा सम्पादक तिवारीले समाजलाई योगदान गरेर गएको व्यक्तिको विचारका चिन्तन र विमर्श गरेको जवाफ दिए ।
‘उहाँको विचारलाई हामीले बेचेको नभइ अनुसरण गरेका हौँ, उनले भने ।’ विमर्श कार्यक्रममा नेपाली कांग्रेस सुर्खेतका सचिव देवकुमार सुवेदीले बीपीका सिद्धान्त र विचारका बारेमा जति नै चर्चा भएपनि कांग्रेस सरकारमा गएपछि नेताहरुले ति पुस्तकमा भएका कुरा किन लागु गर्दैनन् ? भनी प्रश्न गरे ।
उनको प्रश्नको जवाफ दिँदै सम्पादक तिवारीले बीपीका सिद्धान्तहरु कांग्रेसले लागू गर्न नसकेको अवस्था रहेको स्वीकार गरे । जनतासँगै वहस गरेर विकासका काम अगाडी बढाउन सके विकासले सार्थकता पाउने उनको भनाइ छ । पुस्तकमा राजनीतिक नेताहरुमा अध्ययनको अभाव रहेको बीपीले उल्लेख गरेको तिवारीले बताए ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
