काठमाडौं– सन् १९९९ सम्म बलिउड मेगास्टार अमिताभ बच्चनको फिल्मी करिअर खराब चरणबाट गुज्रिरहेको थियो। एकातिर उनका फिल्महरू एकपछि अर्को फ्लप भइरहेका थिए, अर्कातिर उनको आफ्नै कम्पनी ‘अमिताभ बच्चन कर्पोरेसन लिमिटेड’ पनि डुबेको थियो। बच्चन टुटेका थिए।
यो कठिन घडीमा अमिताभ बच्चनले आफ्ना साथी तथा बलिउडका चर्चित निर्माता–निर्देशक यश चोपडालाई सम्झे। त्यसअघि पनि एक पटक जब अमिताभ हिन्दी फिल्म उद्योगमा संघर्ष गरिरहेका थिए, यशले उनलाई सहयोग गरेर फिल्म दिलाए। ‘दिवार’ सुपरहिट साबित भयो र अमिताभ बच्चनको ‘एंग्री यंग म्यान’ छविको सुरुवात भयो। फेरि अमिताभ बच्चनलाई यश चोपडाको साथ चाहिएको थियो।
जब अमिताभ निर्देशक यश चोपडाको घर पुगे र यशलाई आफ्नो समस्या सुनाए, यश चोपडाले केही समय पत्याउन सकेनन्। किनभने अमिताभ बच्चनजस्ता मेगास्टारले आफूसँग काम नभएको र गरिबीले घेर्न थालेको बताएका थिए। यशले अमिताभलाई सक्दो सहयोग गर्ने आश्वासन दिए।
यश चोपडाका छोरा आदित्य चोपडाले आफ्नो फिल्म ‘मोहब्बतें’ सुरु गर्दा यश चोपडाले त्यो फिल्ममा अमिताभ बच्चनलाई काम दिए। अमिताभले पूर्ण मेहेनत र लगनशीलताका साथ काम गरे। फिल्म ‘मोहब्बतें’ सुपरहिट साबित भयो। यस फिल्मबाट अमिताभको हराएको आत्मविश्वास फिर्ता भयो।
यस फिल्मबाट अमिताभ बच्चनलाई सर्वश्रेष्ठ सहायक अभिनेताको फिल्मफेयर अवार्डबाट सम्मानित गरियो। ‘मोहब्बतें’ अमिताभ बच्चनको फिल्मी करिअरको लागि महत्वपूर्ण साबित भयो र यश चोपडाले अमिताभ बच्चनको करिअरमा ‘संजीवनी बुटी’को भूमिका निभाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
