काठमाडौं– वैदेशिक रोजगारीका लागि कोरिया जान सिपबिल्डिङ (पानीजहाज) क्षेत्रमा आवेदन दिइएकाहरुले उत्पादनशील क्षेत्रअन्तर्गत रोजगार अनुमति प्रणाली (ईपीएस) परीक्षाका लागि पुस २० गतेसम्म आवेदन दिन पाउने भएका छन्। वैदेशिक रोजगार विभागअन्तर्गतको ईपीएस कोरिया शाखाले मंगलबार एक सूचना प्रकाशित गर्दै आवेदन दिने मिति २ दिन थप भएको जनाएको छ।
गत पुस गतेको निर्णयानुसार पुस १६ देखि १८ गतेसम्म फारम भर्न पाउने गरी समय तोकिएको थियो। यसलाई अब २ दिन थप गरी २० पुससम्म पुर्याइएको ईपीएस कोरिया शाखाले जनाएको छ।
यस्तो फाराम यसअघि पानीजहाज क्षेत्र (सीप बिल्डिङ सेक्टर)का लागि फाराम भरेकाहरुले मात्रै भर्न पाउनेछन्।
ईपीएस कोरिया शाखाले कोरियाको मानव संशाधन विभागको परिपत्र भन्दै पानीजहाज क्षेत्रमा जानका लागि परीक्षा दिएकालाई सन् २०२३ मा खुलेका ईपीएसका अन्य परीक्षामा सामेल नगराउने निर्णय गरेको थियो।
त्यसको विरुद्धमा दायर भएको रिटमा निर्णय सुनाउँदै उच्च अदालत पाटनले सुरुमा ‘निवेदकहरु’लाई परीक्षामा सामेल गराउन भनेको थियो। रिट निवेदकहरु मात्रै परीक्षामा सामेल हुन पाउने भनेर आदेश भएको भन्दै ईपीएस कोरिया शाखाले पानीजहाजका लागि परीक्षा दिएका अन्यलाई ईपीएस परीक्षामा सामेल गराउन नसकिने बताएको थियो।
त्यसपछि पुन: उच्च अदालत पाटनमा रिट दायर भएको थियो। पछिल्लो रिट निवेदनमाथि सुनुवाइ गर्दै उच्च अदालतका न्यायाधीश चन्द्रमणि ज्ञवालीको इजलासले सबै जनालाई ईपीएसको आवेदन भर्न रोक नलगाउन आदेश दिएको थियो।
उच्च अदालत पाटनले शुक्रबार आदेश जारी गर्नु अगाडिसम्म झण्डै ३० हजार बढी युवाहरु सन् २०२३ मा ईपीएसको फाराम भर्न नपाइने भन्दै आन्दोलित थिए। युवाहरुले शुक्रबार ललितपुरको ग्वार्कोस्थित ईपीएस कोरिया शाखाको कार्यालय अगाडि प्रदर्शन गरेका थिए।
प्रदर्शनका क्रममा २ जनाको मृत्यु समेत भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
