काठमाडौं– सरकारले च्याउको समर्थन मूल्य नतोक्दा किसानले सस्तोमा बिक्री गर्ने तर उपभोक्ताले चर्को मूल्य तिरेका खरिद गर्न बाध्य रहेको च्याउ उत्पादक किसान संघ नेपालका अध्यक्ष सन्तोष कार्कीले बताएका छन्।
शुक्रबार आयोजित पत्रकार सम्मेलनमा बोल्दै कार्कीले किसानको १२० रुपैयाँको च्याउ ५० रुपैयाँ किलो बिक्री गर्न बाध्यएको तर उपभोक्ताले सधैं ५० रुपैयाँ पाउ किन्न परिरहेको बताएका हुन्।
नेपालमा च्याउ उत्पादन प्रशस्त भएता पनि बजार अभावका कारण च्याउ व्यवसाय फस्टाउन नसकेको उनको गुनासो छ।
‘नेपालमा च्याउखेती विस्तारित हुँदै गएको छ। अहिले नेपालका ७० जिल्लामा च्याउ उत्पादन हुन्छ भने ४० जिल्लामा व्यावसायिक रुपमा नै च्याउ खेती गरिन्छ। तर च्याउको बजार छैन। च्याउ खान सबैले जानेको छैन। च्याउको बजार प्रवर्द्धनका लागि च्याउ दिवसको अवसरमा पुस १५ गते च्याउ महोत्सव राखेका छौं,’ उनले भने।
आगामी पुस १५ गते आयोजित महोत्सवमा विभिन्न च्याउ र च्याउका परिकार राखी च्याउको बजार प्रवर्द्धन गर्ने लक्ष्य रहेको उनको भनाइ छ।
२०७६ को एक अध्ययनले नेपालमा खपत हुने मध्येको ८० प्रतिशत च्याउ आयात हुने गरेको थियो। नेपालको उत्पादन २० प्रतिशत मात्रै थियो।
तर अहिले नेपाली बजारमा सर्वाधिक खपत हुने च्याउ ८० प्रतिशत स्वदेशी उत्पादन रहेको उनको भनाइ छ। यस्तै २० प्रतिशत च्याउ भारत लगायतका देशबाट आयात हुने गरेको छ।
नेपालका च्याउ किसानको लगानी करिब ७ अर्ब पुगेको छ। वार्षिक १० अर्बको च्याउको कारोबार हुने गरेको छ। नेपालमा दैनिक ५० हजार किलो च्याउ खपत हुने गरेको अनुमान छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788999215.webp)
-1786602170.png)
