काठमाडौं– एक महिनादेखि प्रहरी उपरीक्षक (एसपी) का सात पद रिक्त हुँदा पनि प्रहरी प्रधान कार्यालयले बढुवा गर्न सकेको छैन। गत मंसिर ५ गते पाँच एसपी प्रहरी बरिष्ठ उपरीक्षक (एसएसपी) मा बढुवा भएपछि सात एसपीको पद रिक्त भएको थियो।
तर रिक्त भएको एक महिना बितिसक्दासमेत अझै बढुवा प्रक्रिया अन्योलमै छ। यसअघि प्रहरी महानिरीक्षक (आईजी) वसन्तबहादुर कुँवर इन्टरपोलको ९१ औं महासभामा भाग लिन अस्ट्रिया गएकाले बढुवा प्रक्रिया रोकिएको प्रहरी प्रधान कार्यालयले बताएको थियो।
तर आईजी कुँवर अस्ट्रियाबाट फर्केको दुई साता बित्दासमेत अझै प्रहरी नाउव उपरीक्षक (डीएसपी) बाट एसपी बढुवा हुन सकेको छैन। डीएसपीबाट एसपी बढुवा लम्बिनुको कारण भने प्रतिस्पर्धीहरुको ‘पावर एक्सरसाइज’ रहेको बुझिएको छ। अहिले एसपीका सात पद रिक्त छन्। त्यसमा बढुवा हुन २०७२ मा इन्सपेक्टरबाट डीएसपीमा बढुवा भएकाहरु प्रतिस्पर्धामा छन्। यो लटका १२ जना अहिले एसपीको मुख्य प्रतिस्पर्धामा छन्।
यही लटका तर उनीहरुभन्दा पछि डीएसपीमा बढुवा भएकाहरुसमेत अहिलकै बढुवामा पर्नका लागि पावर एक्सरसाइज गरेका छन्। जसकारण पनि बढुवा प्रक्रिया लम्बिएको पाइएको छ। पछिल्लो लटबाट मुख्यगरी सुमित खड्का, डा. तपन दाहालले बढुवाका लागि शक्तिकेन्द्रमार्फत तिव्र लविइङ दिएको बताइएको छ।
खड्का माओवादी केन्द्रका नेता जनार्दन शर्मा निकट मानिन्छन्। दाहालको पनि सत्ता साझेदार दलसँग राम्रो सम्बन्ध भएका र आफ्नो कार्यसम्पादन समेत अब्बल रहेको दाबी गर्दै बढुवामा लविइङ गरेका छन्। अघिल्लो लटका १२ जना पनि सात जनाभित्र पर्न र सकेसम्म एक, दुई नम्बरमै बढुवा हुनका लागि शक्तिकेन्द्र धाएका छन्।
१२ जनाको सूचीअनुसार बढुवाको पहिलो नम्बरमा प्रदीपकुमार क्षेत्री छन्। त्यसैगरी दास्रो नम्बरमा अंगुर जिसी, तेस्रो नम्बरमा ढकेन्द्र खतिवडा छन्। त्यसैगरी क्रमशः यादव ढकाल, श्यामबाबु ओलिया, नारायण रञ्जितकार, निन्जन दत्त भट्ट, राजन लिम्बू, सन्तोष तामाङ, एकनारायण कोइराला, अनन्तराम शर्मा, विनोद घिमिरे बढुवाको प्रतिस्पर्धामा छन्। घिमिरे प्रचण्डको पूर्व पीएसओ समेत हुन्।
अघिल्लो पटक आफूलाई बढुवामा छुटाइएको भन्दै अहिले जसरी पनि बढुवा हुनुपर्ने भन्दै प्रधानमन्त्री प्रचण्डमार्फत् उनले दबाब दिएको बताइन्छ। उनीहरु सबै जना २०७२ भदौमा डीएसपी बनेका थिए।
यही ब्याचका, तर २०७२ भदौमा छुटेर पछिल्लो लटमा डीएसपी बनेकाहरु पनि अहिले बढुवाको प्रतिस्पर्धामा छन्। इन्सपेक्टरको भर्ना एउटै मितिमा भएको, तर बढुवा हुने बेला छुटाइएको भन्दै उनीहरु पनि अहिले नै एसपी बन्न लविइङमा लागेका छन्। यसरी लविइङ गर्नेमा सुमित खड्कादेखि तपन दाहाललगायत छन्।
डीएसपीबाट एसपी बढुवाको सिफारिस गर्ने समितिमासमेत आईजी अध्यक्ष रहने व्यवस्था छ। राजपत्रांकित द्वितीय श्रेणीको पद एसपीमा बढुवा सिफारिसका लागि बन्ने समितिमा आईजी अध्यक्ष तथा गृह मन्त्रालयको सहसचिव सदस्य र आईजीले तोकेको एआईजी वा डीआईजी सदस्य सचिव रहने व्यवस्था छ।
यो समितिले भने शक्तिकेन्द्रमार्फत् पावर एक्सरसाइज भएर बढुवा बिलम्ब भएको भन्दा पनि प्राविधिक तर्फका दुई एसपीको दरबन्दी प्रशासनतर्फ मिलान गरेर बढुवा गर्न लागिएकाले ढिलो भएको दाबी गरेको छ।
प्राविधिकतर्फका दुई दरबन्दी प्रशासनतर्फ मिलान भए पनि रिक्त एसपीको दरबन्दी ९ मात्रै पुग्छ। जबकी २०७२ भदौमै डीएसपी बनेकाहरुको संख्या अझै १२ छ। ती दरबन्दी मिलान भएको अवस्थामा पनि बढुवा प्रक्रिया पेचिलो नै बन्ने देखिन्छ।
इन्सपेक्टरबाट डीएसपी बढुवा अन्योल
डीएसपीबाट एसपी बढुवा प्रक्रिया केही दिनमै अघि बढ्ने बताइए पनि इन्सपेक्टर (प्रहरी निरीक्षक)बाट डीएसपी बढुवामा भने अन्योल कायम छ। इन्सपेक्टरबाट डीएसपी बढुवा गर्दा कोटा थोरै, तर प्रतिस्पर्धीहरु धेरै भएकाले तत्कालै बढुवा गर्ने पक्षमा आईजी कुँवर नरहेको स्रोतले बतायो।
गत जेठमा भएको इन्सपेक्टरबाट डीएसपी बढुवासमेत विवादमा परेको थियो। २०७० मा भर्ना भएका इन्सपेक्टरका १४६ जनाको टोली थियो। जम्मा ४६ वटा मात्रै डीएसपीको कोटा खाली रहेकाले ४६ जनालाई मात्रै बढुवा गर्न सम्भव थियो। उक्त ४६ कोटामा पनि ‘राम्रालाई भन्दा हाम्रा’लाई च्यापेर बढुवा गरिएको भन्दै प्रतिस्पर्धीहरुले चरम असन्तुष्टि व्यक्ति गरेका थिए।
अहिले त्यही टोलीका १०० जना इन्सपेक्टर नै छन्। उनीहरुबाटै अब केही डीएसपी बन्नेछन्। तर अहिले झनै थोरै कोटा रहेको र अस्वस्थ प्रतिस्पर्धा हुने र विवाद हुने भन्दै तत्कालै बढुवा गर्ने पक्षमा आईजी नरहेको उनको सचिवालय स्रोतले जनाएको छ।
शक्ति केन्द्रको आडमा रहेर बढुवा हुने कन्फर्म जस्तै भएका इन्सपेक्टरहरु भने अहिले नै बढुवा सिफारिस गराउने पक्षमा लविइङमा छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
