काठमाडौं– विदेशमा काम गर्ने नेपालीले स्वदेशमा रकम पठाउँदा वैध तरिका अवलम्बन नगर्दा तिनका परिवारका सदस्यले ठगीको माध्यमबाट प्राप्त हुने रकम बुझ्ने गरेको भेटिएको छ।
प्रहरीको साइबर ब्यूरोका अनुसार वैदेशिक रोजगारमा रहेका कतिपय नेपालीले केही रकम जोगिने प्रलोभनमा परी अवैध तवरले नपालमा रकम पठाउने व्यक्तिसँग सम्पर्क गरी नेपालमा रहेका परिवार तथा आफन्तलाई पठाउने गरेका छन्।
त्यसरी अवैध रुपमा रकम पठाउने काम गर्ने व्यक्तिले नेपालस्थित सम्बन्धित परिवारका सदस्य र आफन्तलाई रकम बुझाउने पनि गर्छन्। तर त्यस्तो रकम अनलाइनसम्बद्ध ठगीको माध्यमबाट प्राप्त गैरकानुनी रकम हुने गरेको साइबर ब्यूरोले जनाएको छ।
गैरकानुनी रुपमा रकम पठाउनेहरुले फ्रड तथा स्क्याम मनीको रुपमा आर्जित रकम वैदेशिक रोजगारीमा रहेका नेपालीका परिवारको बैंक खातामा जम्मा गर्ने गरेको खुलेको साइबर ब्यूरोले जनाएको छ।
‘विदेशमा दु:ख, परिश्रम गरी कमाएको रकम अनलाइन सम्बद्ध ठगीबाट प्राप्त रकम (फ्रड तथा स्क्याम मनी) मा रुपान्तरण भइ कानुनी कारबाहीको भागिदार हुनुपर्ने अवस्था सिर्जना हुने हुँदा विदेशबाट रकम पठाउँदा आधिकारिक माध्यमबाट मात्र पठाउन हुन अनुरोध गरिन्छ,’ साइबर ब्यूरोका एसपी पशुपति कुमार रायद्वारा जारी सूचनामा भनिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
