मुम्बई– आइतबार अहमदाबादमा हुने एकदिवसीय क्रिकेट विश्वकप २०२३ को फाइनलसम्म भारतको यात्रा कप्तान रोहित शर्माको सर्वपक्षीय योगदानले सम्भव भएको हो। कमजोर आर्थिक अवस्थाबाट उठेका रोहितको कुनै समय क्रिकेट भविष्य नै संकटमा थियो।
सन् १९९९ को कुरा थियो। भारतीय क्रिकेट टिम इंग्ल्यान्डमा अजहरुद्दिनको कप्तानीमा विश्वकप खेलिरहेको थियो। यता मुम्बई उपनगरको बोरिवालीमा १२ वर्षीय रोहित शर्मालाई उनको परिवारले जसोतसो पैसा जुटाएर एक क्रिकेट क्याम्पमा पठाएका थियो।
एक ट्रान्सपोर्ट फर्म, वेयरहाउसमा काम गर्ने उनका पिताको आम्दनी न्यून थियो। त्यसैले रोहित त्यो सयम आफ्नो हजुरबुवा र काका रवि शर्माको घरमा बस्थे। तर, उनीहरुको अवस्था पनि खास गतिलो थिएन।
त्यही वर्ष रोहित बोरिवालीको स्वामी विवेकानन्द इन्टरनेशनल स्कूलविरुद्ध एक खेल खेल्दै थिए। उक्त स्कूलका कोच दिनेश लाडले उनको खेल देखेर स्कूल मालिक योगेश पटेलसँग उनलाई छात्रवृत्तिका लागि सिफारिस गरे। जुन स्कूलले पढाइसँगै खेलमा पनि ध्यान दिइरहेको थियो।
अहिले ५४ वर्ष पुगेका योगेश पटेल भन्छन्, ‘हाम्रो कोचले यो केटोमा क्रिकेटप्रति निकै लगाव देखियो। हाम्रो स्कूललाई महिनाको २७५ रुपैयाँ फिस यसको परिवारले दिन सक्दैन। यसलाई छात्रवृत्ति दिनुहोस् भनेर सिफारिस गर्नुभयो।’
‘हामीले छात्रवृत्ति दिने फैसला गर्यौँ। जुन सही सावित भयो र अहिले रोहित भारतका कप्तान रहेको हेर्दा गर्व लाग्छ,’ उनले थपे।
उक्त विषयमा रोहित आफैंले पनि क्रिकइन्फोसँग बताएका छन्। उनले एक अन्तर्वार्तामा भनेका छन्, ‘कोचले म विवेकानन्द स्कूलमा भर्ना भएर क्रिकेट खेल्न सुरु गरेको हेर्न चाहन्थे। मसँग उक्त स्कूलमा भर्ना हुने मासिक रुपमा बुझाउनुपर्ने २७५ रुपैयाँ थिएन। त्यसपछि उनले नै छात्रवृत्ति दिलाए। मैले ४ वर्षसम्म पढ्ने र खेल्ने मौका पाएँ।’
उक्त स्कूलमा भर्ना भएको केही महिनामै रोहितले १४० रनको पारी खेलेका थिए। जसको मुम्बईका स्कूल र क्रिकेट समीक्षकले विशेष चर्चा गरेक थिए।
मुम्बईको शिवाजी पार्कमा क्रिकेट सिकेर सचिन तेन्दुलकर, विनोद कांबलीदेखि प्रवीण आमरे हुर्केका हुन्। यही मैदानमा आज पनि दर्जनौं नेट्स चल्छन्। जसमध्ये एक अशोक शिवलकरको हो। जहाँ यी उत्कृष्ट खेलाडी खेल्ने गर्थे।
शिवलकर भन्छन्, ‘मलाई अझै याद छ, रोहित शर्मा पहिले आफ्नो स्कूलका तर्फबाट अफ स्पिन बलिङ गर्थे। पछि उनका कोचले उनको ब्याटिङ प्रतिभा थाहा पाए।’
त्यसपछि रोहित रोकिएनन्। मुम्बईको कांगा लिग क्रिकेटदेखि मुम्बई क्रिकेट एसोसिएसनको टुर्नामेन्टमा उनको आफ्नो पहिचान बनाए।
विवेकानन्द स्कूलका मालिक पटेल भन्छन्, ‘रोहितले कोभिड-१९ को बीचमा मलाई फोन गरेका थिए। मैले उनलाई मान्छेलाई सहयोग गर्ने काम जारी राख, म त्यसैमा खुशी छु भनेको थिएँ। अहिले उनलाई देखेर म असाध्यै खुसी हुन्छु।’
नयाँ भूमिका
अस्ट्रेलियाका विरुद्ध नरेन्द्र मोदी स्टेडियममा हुने फाइनलमा रोहित आफ्नो सटिक कप्तानीबाट मात्रै होइन, आफ्नो विस्फोटक ब्याटिङबाट समेत महत्त्वपूर्ण छाप छाड्नेछन्।
सन् २०१९ को विश्वकपमा सवैभन्दा धेरै रन बनाएका रोहित यसपल्ट रणनीतिअनुसार खेलिरहेका छन्। उनले हरेक पावरप्लेमा व्यक्तिगत ठूलो स्कोरको महत्वाकांक्षा नबनाइ बलरमाथि हाबी हुन्छन्।
उनको यस खेलबाट शुभमन गिललाई विकेटमा केन्द्रित हुने मौका मिलेको छ। मध्यक्रमका कोहली र श्रेयस अय्यरलाई लामो पारी खेल्न सघाएको छ।
यो विश्वकपमा शर्मा अस्ट्रेलियाविरुद्ध शून्यमा आउट भए। त्यसपछि भने उनको ब्याट रोकिएको छैन।
उनले १३१, ४८, ४६, ४, ४०, ६१ र ४७ रनको पारी खेलेका छन्। उनको स्ट्राइक रेट १२४.१५ छ। रोहितका लागि मात्र एक कसर बाँकी रहेको छ- त्यो हो सफल कप्तानका रुपमा विश्वकप २०२३ को ट्रफी। बीबीसी हिन्दीबाट
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
