कान्जिरोवा हिमालको काखमा रहेको शे–फोक्सुण्डो ताल नेपालका प्रमुख पर्यटकीय गन्तव्यमध्ये एक हो। कर्णाली प्रदेशको डोल्पा जिल्लामा रहेको शे–फोक्सुण्डो नेपालकै सबैभन्दा गहिरो ताल पनि हो।
समुद्री सतहभन्दा करिब ३ हजार ९०० मिटरको उचाइमा रहेको यो तालको लम्बाइ ४.८ किलोमिटर तथा चौडाइ १.६ किलोमिटर र गहिराइ ६५० मिटर छ।
सूर्यको प्रकाशअनुसार रंग फेर्ने यो ताल कञ्चन र सफा पानीका लागि प्रसिद्ध छ। तालको पानीको घनत्व ४० करोड ९० लाख घनमिटर रहेको बताइन्छ।
शे–फोक्सुण्डो यात्रीका लागि एक उत्कृष्ट ट्रेकिङ गन्तव्य हो। डोल्पा सदरमुकाम दुनै नजिकको सुलीगाडसम्म सवारीका साधन– जीप तथा मोटरसाइकलमा पुगेर तालसम्म भने पैदल यात्रा गर्नु पर्छ।
सुलीगाडबाट करिब १५ घण्टा हिँडेर तालसम्म पुगिन्छ। यद्यपि आधिकारिक रुपमा भने सुलिगाडको चेकप्वाइन्टदेखि तालसम्म पुग्न १० घण्टा ट्रेक गरेर पुग्न सकिने निष्कर्ष निकालिएको छ। से फोक्सुण्डो राष्ट्रिय निकुञ्जअन्तर्गत पर्ने तालसम्म पुग्नलाई शे–फोक्सुण्डो खोलाको किनारै किनार हिँड्नुपर्छ।
शे–फोक्सुण्डो ताल गन्तव्यका हिसाबले जति सुन्दर छ, त्यति नै रोमाञ्चक त्यहाँ पुग्नलाई हुने पदयात्रा हुन्छ।
यात्रीहरुले ठाउँ–ठाउँमा शे–फोक्सुण्डो खोला वार–पार गर्दै यात्रा गर्नुपर्छ। तालबाटै बग्ने खोलाको कञ्चन पानीले यात्रालाई झनै रोमाञ्चक बनाउँछ।
पैदल हिँड्ने बाटो न त ठाडै उकालो छ, न त सिधा तेर्सो नै। ठाउँ–ठाउँमा उकाली र ओराली गर्दै हिँड्नुपर्ने भएका कारण यात्रीहरुले धेरै थकान पनि महसुस गर्दैनन्। यद्यपि ताल पुग्नुभन्दा केही अगाडि भने ठाडै उकालो काट्नुपर्छ। जोखिमपूर्ण भिरको बाटो हुँदै यात्रा गर्नुपर्ने भएका कारण यात्रीहरुले केही सावधानी भने अपनाउनुपर्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791984972.png)
-1786602170.png)
