तस्बिर: नरेन्द्र उपाध्यायको फेसबूकबाट
काठमाडौं– सुदूरपश्चिम प्रदेशको बझाङ केन्द्रविन्दु भएर मंगलबार दिउँसो यता ११ पटक भूकम्प गएको छ। राष्ट्रिय भूकम्प मापन तथा अनुसन्धान केन्द्रका अनुसार पछिल्लोपटक बुधबार बिहान ५:४३ बजे ४.३ म्याग्निच्यूडको भूकम्प गएको छ।
सुरुमा मंगलबार दिउँसो २:४० बजे बझाङ केन्द्रविन्दू भएर ५.३ म्याग्निच्यूडको भूकम्प गएको थियो। त्यसपछि दिउँसो ३:०६ बजे ६.३ म्याग्निच्यूडको भूकम्प गएको थियो।
भूकम्प मापन केन्द्रका अनुसार मंगलबार दिउँसो ३:१३ बजे ५.१ म्याग्निच्यूड, दिउँसो ३:४५ बजे ४.१ म्याग्निच्यूड, दिउँसो ४:२८ बजे ४.१ म्याग्निच्यूडको भूकम्प गएको थियो। यस्तै, मंगलबार दिउँसो ४:३१ बजे ४.३ म्याग्निच्यूड, अपराह्न ५:१९ बजे ५ म्याग्निच्यूड, ५:३८ बजे ५ म्याग्निच्यूड, राति १२:१६ बजे ४.१ म्याग्निच्यूड र राति १२:५० बजे ४.३ म्याग्निच्यूडको भूकम्प गएको भूकम्प मापन केन्द्रले जनाएको छ।
बझाङ र बैतडी जिल्लामा स्थानीयहरु मंगलबारको रात घरबाहिरै बसेर कटाएका छन्। भूकम्पको धक्का महसुस भइरहेका कारण डरडरमा रात कटाउनुपरेको बझाङका स्थानीयले बताएका छन्। स्थानीयहरुले खुला चउर, खेत तथा बारीमा पाल टाँगेर रात बिताएका थिए।
‘रातभर सुत्न पाइएन। भूकम्पले हल्लाइरह्यो। भूकम्पको धक्का महसुस हुँदा सबैजना चिच्याउने, कराउने भइरह्यो। डरैडरमा रात बित्यो,’ बझाङ सदरमुकाम चैनपुरबाट नेपाल लाइभको सम्पर्कमा आएका स्थानीय करवीर बोहराले भने।
मंगलबार दिउँसो गएको भूकम्पले बझाङमा १६, बैतडीमा २ र अछाममा १ जना गरी १९ जना घाइते भएका छन्। भूकम्पको धक्काले बझाङमा ३१ वटा भौतिक संरचनामा क्षति पुगेको विवरण प्राप्त भएको छ। यस्तै, बैतडीमा १३ वटा भौतिक संरचनामा क्षति पुगेको बताइएको छ।
भूकम्पको धक्काले अछाम, बाजुरा, डोटी र डडेलधुराका केही ठाउँमा पनि घर तथा भवनहरु चर्किएका छन्। बझाङ केन्द्रविन्दू भएर गएको भूकम्पको धक्का नेपालको कर्णाली, लुम्बिनी तथा गण्डकी प्रदेशमा पनि धक्का महसुस भएको थियो। यस्तै, भारतको उत्तराखण्ड, उत्तर प्रदेश, बिहार र दिल्लीमा पनि महसुस भएको थियो।
भूकम्पको धक्काले बझाङको चैनपुर, तलकोट, थलरा, केदारस्युँ, छान्ना लगायत क्षेत्रमा बढी क्षति पुगेको छ। बैतडीको सिगास गाउँपालिका, पुर्चौडी नगरपालिका, डिलासैनी गाउँपालिका र पाटन नगरपालिकामा बढी क्षति भएको छ।
गत १ वर्षको अवधिमा सुदूरपश्चिम प्रदेशमा ६ म्याग्निच्यूडभन्दा माथिको तीव्रता भएका ३ वटा भूकम्प गएका छन्। भूकम्प मापन केन्द्र सुर्खेतका अनुसार २०७९ कात्तिक यता सुदूरपश्चिम केन्द्रविन्दू भएर ४ म्याग्निच्यूडभन्दा माथिको तीव्रता भएका ५० वटा भूकम्प गएका छन्। यस्तै, ४ म्याग्निच्यूडभन्दा कमको तीव्रता भएका २ हजार ७८ भूकम्प गएका छन्।
२०७९ कात्तिक २२ गते डोटीको खप्तड क्षेत्र आसपास केन्द्रविन्दू भएर ६.६ म्याग्निच्यूडको भूकम्प गएको थियो। उक्त भूकम्पको धक्काले भत्किएका भौतिक संरचनामा च्यापिएर डोटीको पूर्वीचौकी गाउँपालिका–३ गैरीगाउँका ६ जनाको मृत्यु भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
