कांग्रेस- नेपाली कांग्रेसले त्रिभुवन विमानस्थलबाट भित्रिएको करिब १ क्विन्टल सुन प्रकरणको अनुसन्धान केन्द्रीय अनुसन्धान ब्युरो (सीआईबी)ले गरिरहेकाले अर्को समिति नचाहिने निष्कर्ष निकालेको छ।
गत शुक्रबारदेखि सुरु भएको कांग्रेस संसदीय दलको बैठकमा संस्थापन इतर पक्षका अधिंकाश सांसदहरू उक्त प्रकरणको अनुसन्धानका लागि उच्चस्तरीय छानबिन आयोग बनाउनुपर्ने पक्षमा उभिएका थिए। डा शेखर कोइराला, प्रदीप पौडेल, राजन केसी , सञ्जय कुमार गौतम, अर्जुननरसिंह केसी लगायतका सांसदहरूले उच्चस्तरीय छानविन समिति बनाउनुपर्ने धारणा राखेका थिए।
तर संस्थापन पक्षका बहुमत सांसदहरूले उच्चस्तरीय छानबिन समिति नचाहिने पक्षमा मत राखेका थिए। बैठकमा बहुमतले अर्को समिति नचाहिने निष्कर्ष निकालेपछि सुन प्रकरणको अनुसन्धान सीआईबीले नै अनुसन्धान गर्ने निर्णय भएको हो।
बैठकपछि कांग्रेस संसदीय दलको प्रमुख सचेतक रमेश लेखकले भने, 'सरकारी निकायले नै छानबिन गरिरहेकाले जोसुकै भए पनि कानुनी अभियोजन गर्नुपर्छ र सीआईबीले नै छानबिन गर्नुपर्छ।’ सुन तस्करीको विषयमा सरकारको निगरानी भएको ठाउँबाटै सुन बाहिरिनु चिन्ताको विषय भएकाले कांग्रेसको गम्भीर ध्यानाकर्षण भएको उनले बताए।
अनुसन्धान, अभियोजन र छानबिन गर्न नै गठित सीआईबीलगायत सरकारी निकायले छानबिन गरिरहेकाले निष्पक्ष, स्वतन्त्र र गहिराईका साथ अनुसन्धान छानबिन गरी कानुनको दायरामा ल्याउन सरकारसमक्ष छलफल बैठकमा भएको छ।
आइतबारको बैठकमा संस्थापन इतर पक्षका सांसद डा शेखर कोइरालाले सुन तस्करीको विषयमा निष्पक्ष छानविन गर्न उच्चस्तरीय समितिको माग गरेका थिए। उनले भनेका थिए, ‘सुन तस्करीको विषयमा उच्चस्तरीय छानबिन समिति बन्नुपर्छ। सरकारले गरेका गलत कामको अपजसको भारी कांग्रेसले बोक्न सक्दैन। प्रधानमन्त्री र मन्त्रीहरूले गलत काम गर्दै गर्दा सरकारमा कांग्रेसका तर्फबाट रहेका मन्त्रीहरूले अब्जेक्सन गर्न सक्नुपर्छ ।’
त्यसपछि सांसद प्रदीप पौडेलले पनि उच्च स्तरीय समितिको बनाउनुपर्ने धारणा राखेका थिए। उनले भनेका थिए, ‘उच्च स्तरीय समिति बनाउनुपर्छ। त्यो समितिले सुनकाण्डलगायत जति पनि काण्ड छन्, ती सबैको छानबिन गर्नुपर्छ। त्यो निर्णय संसदीय दलले गर्नुपर्छ।' सरकारले समिति बनाउन नमाने समर्थन फिर्ता लिनुपर्ने भनाइ उनले राखेका थिए। कांग्रेस सांसद सुनिल शर्माको पक्राउका विषयमा पनि उनले आपत्ति जनाएका थिए।
बैठकमा सांसद उदय शमशेर राणाले प्रतिशोधका कारण कांग्रेस सांसद शर्मालाई पक्राउ गरिएको बताएका थिए। नक्कली भुटानी शरणार्थी प्रकरणमा तत्कालीन गृहमन्त्री रामबहादुर थापाको नाम आए पनि उनीमाथि समेत छानविन नभएको तर सदन चलिरहेको अवस्थामा प्रतिशोध साँध्ने गरी आफ्ना सांसदलाई प्रक्रिया नै पूरा नगरी पक्राउ गरिएको उनले बताएका थिए।
आफ्नो संलग्नता पुष्टि गर्न अर्थमन्त्री महतको चुनौती
बैठकमा सांसद सुनिल शर्माले सुन तस्करी प्रकरणमा अर्थमन्त्री डा प्रकाशशरण महतको पनि हात रहेको आरोप लगाउँदै राजीनामा माग गरेका थिए।
तर अर्थमन्त्री महतले त्यसको प्रतिवाद गर्दै आफूमाथि लागेका आरोप प्रमाणित गर्न चुनौती दिए। उनले आफ्नो संलग्नता पुष्टि हुने प्रमाण देखाए तत्काल मन्त्री पद छाड्ने घोषणा गरे। उनले भने, 'सुन तस्करीमा मेरो संग्लनताको प्रमाण देखाउनूहोस्। म तत्काल पद छाड्छु।’
उनले दोषी सबैलाई कानुनको कठघरमा ल्याउने पनि बताए।
महरा बाबुछोरामाथि छानबिन गर्न माग
कांग्रेस महामन्त्री गगन थापाले सुन काण्डमा मुछिएको आरोप लागेका माओवादी नेता कृष्णबहादुर महरा र उनका छोरा राहुलमाथि छानबिन हुनुपर्ने धारणा राखेका थिए।
उनले भने, ‘महराका बाबुछोरामाथि पनि छानबिन हुनुपर्छ। पार्टीको बैठकमा मात्रै प्रष्ट पारेर हुँदैन। सरकारको कामको जस-अपजस हामीले लिनुपर्छ।’ उनले सीआईबीले समेत आफ्नो प्रतिवेदनमा महराको नाम उल्लेख गरेको भए पनि छानबिनको दायरामा नल्याइउनुमा शंका व्यक्त गरे।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।
![सय दिने प्रगति विवरण सार्वजनिक गर्दै प्रधानमन्त्री केपी ओली [प्रत्यक्ष प्रसारण]](https://nepallive.net/uploads/posts/500X300/kllllllllll-1729675876.jpg)
![Nepal Live Samachar नेपाल लाइभ समाचार, भदौ १९ [भिडियाे]](https://nepallive.net/uploads/posts/500X300/samachar++-1725458095.jpg)
![प्रधानमन्त्रीसँग प्रश्नोत्तर [प्रत्यक्ष प्रशारण]](https://nepallive.net/uploads/posts/500X300/PMM-(1)-1718866650.jpg)
![भारत भ्रमणबारे प्रतिनिधि सभा बैठकमा जवाफ दिँदै प्रधानमन्त्री प्रचण्ड [प्रत्यक्ष प्रशारण]](https://nepallive.net/uploads/posts/500X300/prachanda-sansad-1710309847.jpg)
![Nepal Live Samachar नेपाल लाइभ समाचार, जेठ ३० [भिडियाे]](https://nepallive.net/uploads/posts/500X300/samachar++-copy.jpg-30-1718203418.jpg)
