काठमाडौं- नेपालको आदिवासी जनजाति आन्दोलनमा विशिष्ट योगदान दिने १२ जना व्यक्तिको जीवनी समेटेर तयार पारिएको ‘नेपालका प्रेरणीय आदिवासी व्यक्तित्व र संघर्षका आयामहरु’ नामक पुस्तक सार्वजनिक गरिएको छ।
सञ्चारकर्मी कुमार यात्रुले लेखेको उक्त पुस्तक आदिवासी जनजाति आयोगका अध्यक्ष रामबहादुर थापामगर, नेपाल आदिवासी जनजाति महासंघका अध्यक्ष गेल्जे लामा शेर्पा, आदिवासी जनजाति उत्थान राष्ट्रिय प्रतिष्ठानका उपाध्यक्ष गोकुल घर्तीमगर लगायतले सामूहिक रुपमा विमोचन गरेका हुन्।
राष्ट्रिय आदिवासी जनजाति अपांग महिला संघले प्रकाशित गरेको पुस्तकमा तीन जना दिंवंगत अग्रजसहित १२ जनाले आदिवासी जनजातिको क्षेत्रमा दिएको योगदान र संघर्षका कथाहरु समेटिएका छन्।
पुस्तकमा बमकुमारी बुढामगर, भद्रकुमारी घले, प्रतिमा गुरुङ, पूर्वराजदूत डा गणेश योञ्जन, प्रतिनिधि सभा सदस्य लालवीर चौधरी, अन्तरिम संविधानका मस्यौदाकार शान्तिकुमारी राई, डा केशवमान शाक्य, तृप्ता लुङ्गेली मगर, नन्द कन्दङ्वा समेतले आदिवासीको क्षेत्रमा विगतमा दिएको योगदानको अभिलेखीकरण गरिएको छ ।
दिवंगत व्यक्तित्व डा हर्क गुरुङ, डा ओम गुरुङ र डा चैतन्य सुब्बाको पनि जीवनीलाई पुस्तकमा प्रस्तुत गरिएको छ।
पुस्तक विमोचन समारोहमा पुस्तकमा समेटिएका ९ जनालाई र बाँकी तीन जनालाई मरोणोपरान्त सम्मान गरिएको थियो। कार्यक्रममा पुस्तकका लेखक यात्रुलाई पनि सम्मान गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
