प्रतिनिधि सभाको शुक्रबारको बैठकमा प्रमुख प्रतिपक्षी दलले नाराबाजी गरेपछि सत्तापक्षका सांसदहरू पनि आ–आफ्ना ठाउँमा उभिएर बोल्नु पाउनुपर्ने माग राख्दै। तस्बिर: रत्न श्रेष्ठ/रासस
काठमाडौं– शुक्रबार बिहान राष्ट्रपति रामचन्द्र पौडेललाई भेट्न शीतलनिवास पुगेका सभामुख देवराज घिमिरे र राष्ट्रिय सभा अध्यक्ष गणेश तिमिल्सिनासमक्ष राष्ट्रपति पौडेलले संघीय संसद् निरन्तर अवरोध भएकोमा चिन्ता जाहेर गरे। आफ्नो चिन्ता जाहेर गर्दै राष्ट्रपति पौडेलले जनताको आवाज उठाउनुपर्ने संसद् लामो समय अवरोध हुनुले राम्रो सन्देश नजाने भन्दै यसलाई खुलाउन आग्रह गरे।
सभामुख घिमिरेले त राष्ट्रकै अभिवावक भएकाले सदनको गतिरोध खुलाउन पहल गरिदिन भनेर पौडेललाई नै आग्रह गरेको शीतलनिवास स्रोत बताउँछ। जवाफमा राष्ट्रपति पौडेलले आफूले सक्दो पहल गर्ने वचन दिए। यसअघि बिहीबार साँझ आफुलाई भेट्न शीतलनिवास आएका प्रधानमन्त्री पुष्पकमल दाहाल प्रचण्डसँग पनि राष्ट्रपति पौडेलले सदन अवरोध भएकोमा चिन्ता जनाएका थिए।
राष्ट्रपतिलाई गुनासो दर्ज गरेर सदन चलाउन बानेश्वर आइपुगेका घिमिरे र तिमिल्सिनाले शुक्रबार पनि सदन चलाउन सकेनन्। जसको कारण थियो प्रमुख प्रतिपक्षी दल नेकपा एमालेका सांसदहरुको अवरोध। तर अवरोध गर्नमा एमाले मात्रै अघि सरेन।
एमालेको अवरोधको विरोधमा सत्तरुढ सांसद
राष्ट्रिय सभाको शुक्रबारको बैठकमा प्रमुख प्रतिपक्षी दल नेकपा एमालेले गरेको अवरोधप्रति सत्तापक्षका सांसदहरुले विरोध जनाए।
शुक्रबार बसेको राष्ट्रिय सभाको बैठक नियमित कार्यसूचीमा प्रवेश गरेपछि एमालेका सांसदहरुले उठेर विरोध जनाएका थिए। राष्ट्रिय सभा अध्यक्ष तिमिल्सिनाले एमालेका भैरवसुन्दर श्रेष्ठलाई बोल्ने समय दिएपछि सत्ता पक्षका सांसद पनि उठे। बैठकको सुरुमा सबै पक्षका सांसदहरुले समसामयिक विषयमा धारणा राखेका थिए। नेपाली कांग्रेस, एमाले लगायतका सांसदहरुले आफ्नो धाराणा राखे।
आफ्नो धारणा राख्ने क्रममा नेकपा एमालेकी सांसद विमला राई पौड्यालले १ क्विन्टल सुन तस्करी प्रकरणमा सीआईबीले गरिरहेको अनुसन्धनमा अवरोध गर्नुभन्दा पनि सत्य, तथ्य पत्ता लगाउन प्रतिपक्षले उच्चस्तरीय समिति गठनको माग गरेकाले समिति गठन गरेर सदन खुलाउनुपर्ने माग राखेकी थिइन्।
पौड्याल बोलेपछि राष्ट्रिय सभा अध्यक्ष तिमिल्सिनाले विशेष समयमा बोल्ने क्रम सकिएको भन्दै बैठकलाई नियमित कार्यसूचीअनुसार सञ्चालन गर्न खोजे। राष्ट्रिय सभा अध्यक्षले बैठकलाई नियमित कार्यसूचीमा लैजान खोजेपछि एमाले सांसद्हरुले उठेर विरोध जनाएका थिए।
उठेर विरोध जनाकामध्ये एमाले सांसद श्रेष्ठलाई अध्यक्ष तिमिल्सिनाले बोल्ने पालो दिएका थिए। तर, सत्ता पक्षका सांसदहरुले बैठकलाई नियमित कार्यसूचीअनुसार सञ्चालन गर्नुपर्ने भन्दै उठेर विरोध जनाए।
प्रतिपक्षसँगै सत्ता पक्षका सांसद पनि उठेपछि अध्यक्ष तिमिल्सिनाले बैठक कसरी सञ्चालन गर्ने भन्दै प्रश्न गरे। सत्ता पक्ष उठेपछि उनले प्रतिपक्षी सांसदलाई बस्न आग्रह गरे।
‘सत्ता पक्ष उठेपछि प्रतिपक्ष बस्नुस्। यस्तो पनि अभ्यास हुन्छ भनेर नयाँ अभ्यास गरौँ,’ तिमिल्सिनाले भने। अध्यक्षको अभिव्यक्तिले राष्ट्रिय सभाको बैठकमा हाँसो गुञ्जियो। तर दुवै पक्षका सांसदहरु बस्न मानेनन्।
अध्यक्ष तिमिल्सिनाले उठेरै संसद् चलाउने त? भनेर पनि प्रश्न गरे। ‘सत्ता पक्षलाई प्रतिपक्षप्रति कति सद्भाव रहेछ कि उहाँहरु (प्रतिपक्ष) मात्रै कति उठ्ने भनेर उहाँहरु पनि उठ्नुभाछ। त्यसैले सबै बसौँ अनि मिलेर संसद् चलाउँ,’ व्यंगात्मक शैलीमा अध्यक्ष तिमिल्सिनाले भने, ‘कि उठि उठिकन संसद् चलाउने नयाँ अभ्यास गरौं।’
सत्ता पक्ष र प्रतिपक्ष, दुवै पक्षका सांसद आफ्नो आसनमा नबसेपछि अध्यक्ष तिमिल्सिनाले शुक्रबारको बैठक स्थगित गरिदिए। अध्यक्ष तिमिल्सिनाले अर्को बैठक साउन ३१ गते १ बजे, बुधबार बस्ने गरी स्थगित गरिएको जानकारी दिए।
उही नियत प्रतिनिधि सभामा पनि
शुक्रबारै बसेको प्रतिनिधि सभाको बैठक पनि एमालेकै अवरोधका कारण स्थिगित हुन पुग्यो।
सभामुख देवराज घिमिरेले शुक्रबार प्रतिनिधि सभाको बैठक सुरु भएको घोषणा गरेलगत्तै एमालेका सांसदहरुले उठेर विरोध जनाएका थिए। त्यसपछि सभामुख घिमिरेले एमाले सांसद ज्वालाकुमारी साहलाई बोल्ने समय दिए।
साहलाई बोल्न समय दिइएपछि सत्ता पक्षका सांसदहरुले उठेर विरोध जनाए। सत्ता पक्षका सांसदहरु पनि उठेपछि सभामुख घिमिरेले सदनको बैठक आफ्नो तजबिजीमा चल्ने र आफूले प्रतिपक्षी दलका सांसद साहलाई बोल्ने समय दिएको भन्दै सत्ता पक्षका सांसदलाई बस्न आग्रह गरे।
सत्ता पक्षका सांसदको विरोधका बीच एमाले सांसद साहले आफ्नो भनाइलाई निरन्तरता दिइन्। उनले सरकारले आफू बच्नका लागि १ क्विन्टल सुन तस्करीको जिम्मा प्रहरीको केन्द्रीय अनुसन्धान ब्यूरो (सीआईबी) लाई दिएको बताइन्। उनले उच्चस्तरीय छानबिन समिति गठन गरेर गृहमन्त्री र अर्थमन्त्रीलाई छानबिनको दायरामा ल्याउनुपर्ने माग राखिन्।
साहले बोलिसकेपछि एमाले सांसदहरु नाराबाजी गर्दै वेल घेराउ गर्न पुगे। एमाले सांसदहरुले करिब ११ मिनेट नाराबाजी गरेपछि सभामुख घिमिरेले प्रतिनिधि सभा बैठक स्थगित गरे।
छलफलमा शीर्ष, निछोड बिनानिष्कर्ष
प्रमुख प्रतिपक्षी नेकपा एमालेले साउन १० गते यता संघीय संसदका दुवै सदनको बैठकलाई कार्यसूचीमा प्रवेश गर्न दिएको छैन। साउन २ गते त्रिभुवन अन्तर्राष्ट्रिय विमानस्थलको भन्सार कार्यालयको गेट बाहिरबाट बरामद भएको १ क्विन्टल सुन तस्करी प्रकरणमा उच्चस्तरीय छानबिन समिति बनाउनुपर्ने माग गर्दै एमालेले सदन अवरोध जारी राखेको छ।
एमालेको मागलाई लिएर सत्ताघटक दलका तर्फबाट प्रधानमन्त्री प्रचण्ड, कांग्रेस सभापति शेरबाहदुर देउवा र एमाले अध्यक्ष केपी शर्मा ओलीबीच पटक पटक छलफल भएको छ। तर सदन खुलाउने विषयमा भने सहमति कायम गर्न सकिरेहका छैनन्।
सत्तापक्ष छाननिन समिति बनाउनु नहुने पक्षमा छ भने एमाले निरन्तर छानबिन समिति चाहिने भनिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
