काठमाडौं– जीवन क्षेत्रीद्वारा लिखित पुस्तक ‘नुन-तेलः विगततिर पदयात्रा’ शनिबार सार्वजनिक गरिएको छ। केदारभक्त माथेमा, हिमा बिष्ट र केशव बोहराले एक कार्यक्रमबीच पुस्तक सार्वजनिक गरेका हुन्।
हामी सबैको साझा भविष्य पृथ्वीमाथिको चासो र चिन्ताको सेरोफेरोमा लेखिएको पुस्तकमा लेखक क्षेत्रीले आफ्नो चार पुस्ताको कथा नुन-तेल मार्गको यात्रा गर्दै लेखेका छन्।
पुस्तकमाथि बोल्दै केदारभक्त माथेमाले पुस्तकको लेखनशैली नयाँ किसिमको रहेको भन्दै पाठकलाई कतै आत्मकथा त कतै सामाजिक इतिहास पढेको महशुस गराउने बताए। लेखकको पर्यावरणप्रतिको चिन्ता पुस्तकमा प्रतिबिम्बित भएको बताउँदै माथेमाले पुस्तक पढ्न निकै स्वादिलो रहेको उल्लेख गरे।
अर्का वक्ता हिमा बिष्टले नुन-तेल बसाइँसराइँलाई अतिरन्जना नगरी स्वअनुभवको आधारमा बसाइँसराइँलाई यथार्थमा बुझाउने किताब भएको बताइन्। पुस्तकले आफूलाई पनि आफ्नो जीवनको विगतलाई हेर्न झकझक्याएको उनको भनाइ थियो। विष्टले भनिन्, ‘लेखकले इमान्दार भएर लेख्नुभएको छ। ‘नुन-तेल’को यात्रा थुप्रैका लागि आफ्नो पारिवारिक बसाइँसराइँको यात्रा संस्मरण गर्न प्रेरक हुनेछ।’
त्यस्तै केशव बोहराले पुस्तकमा उल्लेखित केही प्रश्नहरु उद्धृत गर्दै ‘नुन-तेल’ ले पाठकलाई प्रश्न सोध्न प्रेरित गर्ने बताए। उनले भने, ‘हामीले हामीभन्दा पिँधमा रहेका विशेषतः अल्पसंख्यक समुदायलाई कसरी हेर्ने भन्ने दृष्टिकोण पुस्तकमा छ।’
पेसाले चिकित्सक क्षेत्रीको यो पहिलो पुस्तक हो। पुस्तकलाई साङ्ग्रिला बुक्सले बजारमा ल्याएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779242627.png)
-1778551198-1778552039.jpeg)
-1764146706.png)
