काठमाडौं– पब्लिकेसन नेपालयले २ पुस्तक प्रकाशनको तयारी गरेको छ।
केही दिनमै सार्वजनिक हुने पहिलो पुस्तक कविता संग्रह ‘ओ पेङ्दोर्जे’ हुनेछ। युवाकवि राजु स्याङ्तानले लेखेका कविताहरुको यो संग्रहभित्र छ वटा फरक खण्ड छन् भने तिनमा ५१ वटा कविता अटाएका छन्।
समाजशास्त्रका विद्यार्थी राजु पेशाले कलमजीवी हुन्। पत्रकारिता, लेखन तथा सामाजिक राजनीतिक आन्दोलनमा उनको सक्रियता रहँदैआएको छ। आफ्नो कलमबाट सिमान्तकृत समुदाय, भूमिहरण सम्बन्धी अनुसन्धान र फिचर रिपोर्टिङ गरिरहेका राजुको यो पहिलो कविता संग्रह हो।
लेखिका मञ्जुश्री थापाका अनुसार राजुमा काब्य रचनाको असाधारण प्रतिभा छ।
‘उनका शब्दहरुमा बहुसङ्ख्यक उपेक्षित पददलितहरुको आवाज गुञ्जिन्छ,’ मञ्जुश्री भन्छिन्, ‘यो कविता संग्रह हाम्रो युगकै चेतनाको वाचाल अभिव्यक्तिका रुपमा आएको छ।’
महोत्तरीको खयरमाराबाट अवसरको खोजीगर्दै राजधानी आएका राजुले १ सय ५१ पृष्ठको पहिलो कृतिमै समकालीन नेपालका अत्यन्त कष्टकर क्षणहरुलाई अक्षरले उभ्याउन सफल भएका छन्।
यो पुस्तकलाई पब्लिकेशन नेपालयले एकसाथ छापा र इ-बुक मात्र नभई ‘अडियो बुक’ का रुपमा समेत सार्वजनिक गर्ने तयारी गर्दैछ। पछिल्लो समय कविता पढ्ने मात्र नभई आनन्दले सुन्ने सिर्जना पनि बन्न पुगेको छ। यस्तोमा नेपालयले तयार पार्नलागेको राजुको ‘अडियो बुक’ मा स्वयं कवि, गायक तथा संगीतकार आभाषको धुनपनि रहने छ।
‘ओ पेङ्दोर्जे’ कविता संग्रहलाई विमोचन लगत्तै विश्वभरिका पाठकहरुले अमेजनबाट पनि खरिद गर्नसक्ने व्यवस्था मिलाइसकिएको छ ।
पब्लिकेशन नेपालयले तयार पारेको अर्को पुस्तक हो हिरण्य भोजपुरेको लघुकथा संग्रह ‘मुसुक्क म’।
नेपाली संगीतको फाँटमा जानकारी राख्नेहरुका लागि हिरण्य भोजपुरे परिचित नाम हो। साढे पाँच दशकअघि नेपालमा केही तन्नेरी मिलेर साँगीतिक समूह ‘लेकाली’ जन्माएका थिए। भोजपुरस्थित ट्याम्के डाँडाको ओतमा जन्मे हुर्केका ती तन्नेरीहरूको योगदानले आजसम्म पनि नेपाली संगीतलाई प्रभाव पारिरहेकै छ। तिनैमध्येका संस्थापक हुन् हिरण्य भोजपुरे।
विसं २०२२मा ‘छहराको गीत’ लेखेर गीतकारका रुपमा परिचय बनाएका भोजपुरेले त्यसयता गायकबाहेक कवि, गीतकार, कथाकार, उपन्यासकार जस्ता सिर्जनाकै विविध क्षेत्रबाटै आफुलाई चिनाउँदै आएका छन्। साहित्य र संगीतमा यसरी समानान्तर ढंगले क्रियाशील सर्जक भोजपुरेले यसपाला भने लघुकथा विधामा आफुलाई प्रस्तुत गरेका छन्।
यस पुस्तकमा सयवटा भन्दा बढी लघुकथाहरु संग्रहित छन्। तीमध्ये अधिकांश कथा एउटै पानामा सकिएका छन्। यसरी एक बसाइमै सर्सर्ती पढ्न सकिने यो पुस्तक भोजपुरे स्वयंको व्यक्तित्वजस्तै रसिलो अनि स्वादिलो छ।
छ वर्षयता सिर्जना गरिएका यी लघुकथामध्ये अधिकांश कोरोना महामारीको समय सदुपयोग गर्दै लेखिएका हुन्। त्यसबेला बढी समय आफूले अमेरिकामा बिताएकाले त्यहाँ बस्ने नेपाली भोगाइका प्रतिनिधि कथा पनि यो पुस्तकमा समेटिन पुगेको उनी स्पष्ट पार्छन्।
भोजपुरेकृत लघुकथा संग्रह ‘मुसुक्क म’ पनि एकैसाथ भौतिक पुस्तक, इ-बुक र अडियो बुकका रुपमा आउँदैछ भने यो पुस्तक पनि संसारभरिका पाठकले अमेजनबाट खरिद गर्न सक्नेछन्।
यी दुवै पुस्तक निकट भविष्यमै लोकार्पण गरिने जानकारी पब्लिकेशन नेपालयका प्रमुख कार्यकारी सैजन मास्केले दिइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751533150.jpg)
-1749826086.png)
