काठमाडौं– नेपाल उद्योग वाणिज्य महासंघ (एफएनसीसीआई) का उपाध्यक्ष उमेशलाल श्रेष्ठले बैंक र लगानीकर्तालाई जुधाएर सरकार चीरनिन्द्रामा सुतेको आरोप लगाएका छन्।
काठमाडौंमा यसै साता आयोजित अन्तरक्रिया कार्यक्रममा उनले ८० वर्षअघि नर्वे नेपालभन्दा गरिब भएको तर स्रोतको सदुपयोग गर्दै अहिले विश्वको पहिलो खुशी मुलुकको सूचीमा रहेको उल्लेख गरे।
नेपाल औषधि उत्पादक संघको तत्वाधानमा आयोजना भएको कार्यक्रममा उनले प्रश्न गरे, ‘यस्तो नीतिले कसरी समाजवादमा पुग्न सकिन्छ?’
साना तथा मझौला उद्योगमा बैंकले ५ प्रतिशत प्रिमियर लिने गरेको अवस्थामा उद्योग, व्यवसायीहरू मारमा पर्न थालेको उनको भनाइ थियो। श्रेष्ठ एफएनसीसीआईको आगामी निर्वाचनमा वरिष्ठ उपाध्यक्ष पदका उम्मेदवार हुन्।
उनीसँग भएको अन्तरक्रिया कार्यक्रममा केभा फर्मास्युटिकलका राजेन्द्र दुलालले नेपाली अर्थतन्त्रमा देखिएको समस्यासँगै विशेष गरी बैंकहरूको कर्जा र ऋणको विषयमा प्रश्न उठाएका थिए। दुलालले प्रश्न गरे, ‘साना तथा मझौला उद्योगमा ५ प्रतिशत प्रिमियर लागेको अवस्था छ। नयाँ उद्योगलाई दुई वर्षभित्र नाफामा जान बाध्यकारी देखिन्छ। योलगायत विविध समस्यालाई कसरी हेर्नुभएको छ?’
दुलालको प्रश्नको उत्तर दिँदै वरिष्ठ उपाध्यक्ष पदका उम्मेदवार श्रेष्ठले भने, ‘मैले पनि बैंकहरूलाई प्रश्न गरेको थिएँ। उनीहरूले ऋण दिँदा जोखिम न्यूनीकरणका लागि मूल्यांकन गर्ने गरेको र व्यवसायमा जोखिम देखिएको खण्डमा प्रिमियर बोनस लागू हुने गरेको सुनाए।’
तर, व्यवसायमा जोखिम छ वा छैन भन्ने कुराको निर्धारण बैंकले मात्र गर्ने कारण ऋण लिने वर्ग प्रायः मारमा पर्ने गरेको उनको तर्क थियो। ‘मैले एक करोड ऋण लिनका लागि कम्तीमा ५ देखि १० करोड रुपैयाँ हाल्नुपर्ने हुन्छ। तपाईं–हाम्रो कतिपय सम्पत्ति बैंकमा होला? एक करोड लिन ५ करोडको सम्पत्ति बैंकमा राख्नु नै ठूलो कुरा भइसक्यो। यसमा पनि प्रिमियर उठाउने कुरा अलि मिल्दो छैन। यस्तो नीतिले हामी कहिले समाजवादन्मुख हुन्छौं?’ उनले प्रश्न गरे।
श्रेष्ठले नेपाली व्यापारीहरू नियामक संस्था र कर्मचारीतन्त्रको चेपुवामा परेको आरोप लगाए। ‘यहाँ चाकडीतन्त्र हाबी छ। सबै आत्मकेन्द्रित छौं। यसको सिधा फाइदा सरकारलाई जान्छ। बैंक र लगानीकर्तालाई जुधाएर सरकार त चुपचाप बसेको छ,’ उनले भने, ‘हरेक दिन अजबखालका वक्तव्य आउँछन्।’
उनले दुई वर्षअघिसम्म आफूले प्रिमियम दरको कुरा नसुनेको बताए। ‘प्रिमियम दर किन लगाउने? यो लगाउनु पर्ने चिज नै होइन। अन्टसन्ट ऋण दिनुभएको छ भने, त्यसको जिम्मेवारी बैंकको हो। हामी त लबिष्ट हौं। हामी लबि गर्छौं,’ उनले भने।
उनले बैंकको नमिल्दो प्रावधानलाई रोक्न आफूहरूले अभियान चलाउने बताए। ‘हामी हुलतन्त्र पनि चलाउँछौं। एक जना दुर्गा प्रसाईं भन्ने व्यक्तिले २० लाखसम्मको ऋण माफ भन्दै हिँडेका छन्। त्यो पनि गलत कुरा हो,’ उनले भने, ‘उहाँको जुलुस देख्दा ६०/७० हजार मान्छे थिए। म त्यस्तो भिडतन्त्र गर्दिनँ। नतिजा आउने किसिमले लाग्छु। यसमा सत–प्रतिशत सफल पनि हुन्छु भन्नेमा विश्वस्त छु।’
हिजो महासंघको नेतृत्वले २० गोल गरेको र आफू नेतृत्वमा स्थापित भए कम्तीमा ५०/६० गोल गर्ने उनको भनाइ थियो। ‘मान्छे चुनावमा उठ्दा यस्ता कुरा उठाउँछन्। तर, म जे गर्छु, भन्छु, त्यो गरेरै छाड्छु,’ उनले भने, ‘मलाई राम्रो काम गर्नै व्यक्ति हो भनेर जिताउनु भयो भने, तपाईंको सपना जरूर पूरा गर्छु।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788878240.jpeg)
-1786602170.png)
