काठमाडौं– कवि वसन्त चौधरीको एकल कविता वाचन सम्पन्न भएको छ।
मण्डला नाटघरको हलमा भएको 'कवितासँग वसन्त' कार्यक्रममा वसन्तले १ दर्जन बढी कविता सुनाए।
विश्वभर छरिएर रहेका नेपालीलाई विश्व काब्य यात्रा मार्फत् जोड्ने उद्देश्यले कविताका साथ वसन्तले विभिन्न देशको भ्रमण गरेका थिए। कोभिडपश्चात् रोकिएको उक्त यात्रालाई पुनः थालनी गरिएको सन्देश आजको कार्यक्रमले दिएको छ।
'कविता कोमल हुन्छ। सुख दु:ख भावनाको लहरबाट कविता जन्मन्छ। जब मेरा भावनाले शब्द उच्चारण गर्छन्, वास्तवमा मलाई सुखानुभूति हुन्छ। म कविताको माध्यमले छुट्टै प्रेममय संसार रचना गर्न चाहन्छु,'प्रस्तुतिमा उभिएका कविले भने, 'वाचनका क्रममा उराठ लाग्यो भने भनिदिनुहोला। कविताको संख्या छोट्याउने प्रयत्न गर्छु।'
यौवन छचल्किन्छ
मन मेरो सकिन्छ
तिमीलाई बाहुपासमा लिन
जीवन स-सल्किन्छ
वसन्तले 'अलिक लजाइदेऊ' शीर्षकबाट कविता सुरु गरे। त्यसपछि उनले 'जब हामी टाढा हुन्छौं' कविता पढे।
कतै भेटिएथ्यौं संयोगले
मन मिल्यो थाहै भएन
अनि के भयो के भयो
कविता वाचनका क्रममा उनले पहिलो प्रेमबारे बताए। 'पहिलो प्रेम त्यतिकै पहिलो हुँदैन। पहिलो आभास, पहिलो रोमान्चक र अत्यन्तै मीठो अनुभूति हुन्छ,' प्रेम कविता सुनाइरहेका कविले भने। त्यसपछि उनले 'पहिलो प्रेमपत्र' कविता सुनाए।
प्रेम दिवसमा वसन्तले सुनाएका प्रेम कविता सुन्ने दर्शक संख्याले हल भरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
