काठमाडौं– भारतीय प्रसिद्ध कवि हुन् अमृता प्रीतम (१९१९-२००५)। जो पञ्जावी भाषाको पहिलो चर्चित कवयत्री पनि हुन्। उनले सय भन्दा बढी पुस्तक लेखेकी छन्। प्रीतमलाई भारतको प्रतिष्ठित सम्मान पद्म विभूषण र साहित्य एकेडेमी पुरस्कारले सम्मान गरिएको थियो। उनै कविका थुप्रै कविता कवि रिमा केसीले नेपालीमा अनुवाद गरेकी छन्। केसीको अनुवादमा ‘अमृता प्रीतमका छानिएका कविता’ कविता सङ्ग्रह इन्डिगो इन्क पब्लिकेशनले हालै प्रकाशनमा ल्याएको छ। सङ्ग्रहमा समावेश दुई अनुवाद कविता:
इच्छापत्र
आफ्नो पूरा होसहवासमा
लेखिरहेको छु म आज
इच्छापत्र आफ्नै!
म मरेपछि,
खङ्ग्राल्नु मेरा कोठा
खोतल्नु हरेक चिज
घरभरि बिना ताल्चाका
मेरा सामान छरिएका छन्!
दिनु मेरा सपना,
ती तमाम स्त्रीहरूलाई
जो चुलो-चौकादेखि ओछ्यानसम्म
खुम्चिएका छन्,आफ्नै दुनियाँमा
हराएका छन् तिनीहरू
जो वर्षौं पहिले भूलिसकेका छन् सपना देख्न !
बाँडिदिनु मेरा हाँसोका खित्काहरू,
वृद्धआश्रमका ती वृद्धहरूमा
जसका सन्तानहरू
अमेरिकाका जगमगाउँदा सहरमा हराएका छ्न्!
टेबलमाथि हेर्नु,
मेरा केही रङ्गहरू होलान्
ती रङ्गहरूले
रङ्गाइदिनु विधवाको साडी
जसको श्रीमान्को रगतले सिमाना रङ्गिएको छ
झण्डामा लट्पटिएर ऊ हिजो राति सुतेको छ!
आँसु मेरो दिनु
ती तमाम सायरहरूलाई
जसको हरेक थोपाहरूबाट हुनेछ गजलको जन्म
यो मेरो वचन भयो!
मेरो मान, मेरो पवित्रता
त्यो वेश्याको नाममा गरिदिनु
जो बेच्छे आफ्नो शरीर
छोरी पढाउनलाई !
यो देशका एक-एक युवालाई समातेर
लगाइदिनु इन्जेक्सन मेरो आक्रोशको
जसको जरुरत पर्नेछ, क्रान्तिका ती दिनहरूम!
पागलपन मेरो,
पर्नेछ्न् हिस्सामा ती सुफिहरूको
जो निस्किएका छन्
सबै छोडी ईश्वरको खोजीमा!
बस्!
बाँकी बच्यो
मेरो ईर्ष्या
मेरो लालच
मेरो क्रोध
मेरो झुट
मेरो स्वार्थ
यसो गर्नु
यसलाई म सङ्गै जलाइदिनु
****
सिगरेट
यो आगोको कुरा हो
तिमीले यही कुरा सुनायौ
यो जिन्दगीको त्यही सिगरेट हो
जुन तिमीले कुनै दिन सल्काएका थियौ
झिल्को तिमीले बालेका थियौ
यो दिल सधैं जलिरह्यो
समयले कलम समातेर
केही हिसाब लेखिरह्यो
चौध मिनेट भएको छ
यसको खाता हेर
चौध वर्ष नै हो
यो कलमलाई सोध
मेरो यो शरीरमा
तिम्रो श्वास चलिरहयो
धर्ती साक्षी छ
धुँवा निस्किरह्यो
उमेरको सिगरेट जलिसक्यो
मेरो प्रेमको सुगन्ध
केही तिम्रो श्वासमा
केही हावामा मिलिसक्यो
हेर यो आखिरी ठुटो हो
औँलाहरूबाट छोडिदेऊ
कतै मेरो प्रेमको आँचले
तिम्रा औँला नछोऊन्
जिन्दगीको अब पिर छैन
यो आगोलाई समाल
तिम्रा हात सकुशल रहुन्
अब अर्को सिगरेट जलाऊ !!
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
