काठमाडौं– कतारमा जारी विश्वकप फुटबलअन्तर्गत सोमबार राति पहिलो खेलमा जापान क्रोएसियाबीच प्रतिस्पर्धा हुँदैछ । यी दुई बीचको खेल साँझ ८ः४५ बजे हुनेछ।
एसियाली टोली जापानले पहिलोपटक क्वार्टरफाइनलमा जाने लक्ष्य राखेको छ। स्पेन र जर्मनीजस्ता ठूला टोलीहरूलाई हराएर समूह ‘ई’को विजेता बन्दै नकआउट चरणमा पुगेको जापानको मनोबल उच्च छ। यसर्थ, उ जसरी भए पनि जितेर इतिहास रच्ने दाउमा छ।
जापान सन् २००२ मा आफ्नै घरमा भएको विश्वकपमा पहिलोपटक समूह विजेता बन्दै नकआउट चरणमा पुगेको थियो। यस्तै, जापानले २०१० र २०१८ मा पनि उपविजेताको रुपमा नकआउट चरणमा स्थान बनाएको थियो।
यता, गत संस्करणको उपविजेता क्रोएसियालाई ठूला खेलको अनुभव छ। त्यही अनभुवका आधारमा उ आज जापानलाई हराउँदै क्वार्टरफाइनलमा पुग्न चाहन्छ। क्रोएसियासँग लुका मोड्रिच, इभान परेसिचजस्ता विश्वस्तरीय खेलाडीसमेत छन्। यसर्थ, आज उ जापानलाई हराउँदै लगातार दोस्रोपटक क्वार्टरफाइनलमा स्थान बनाउन चाहन्छ। यसका लागि उसले समूह चरणमा लिएको जापानको गति रोक्नुपर्ने छ।
‘हेड टु हेड’मा को अगाडि?
सन् १९९७ यता जापान र क्रोएसियाले तीनपटक एक–अर्काविरुद्ध खेलेका छन्। जसमा दुवै टोली एक–एकपटक जितेका छन् भने एक खेल बराबरीमा भएको छ।
पहिलोपटक खेलिएको मैत्रीपूर्ण खेलमा जापानले क्रोएसियालाई ४–३ गोल अन्तरले हराएको थियो। त्यसपछि यी दुईबीच १९९८ को विश्वकपमा भेट भएको थियो। त्यसमा भने क्रोएसियाले बाजी मारेको थियो।
यस्तै, २००६ का विश्वकपमा भने जापान र क्रोएसियाले गोलरहित बराबरी खेलेका थिए।
विश्वकपको खेलमा जापानले क्रोएसियालाई हराउन सकेको छैन। यसर्थ, यो खेल पनि आज क्रिोएसियाले जित्ने अनुमान अधिकांश फुटबल पण्डितको छ।
सोमबार राति नै हुने दोस्रो खेलमा ब्राजिल र दक्षिण कोरिया आमने–सामने हुँदैछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
