काठमाडौं– सुनसरी क्षेत्र नम्बर ४ को मतगणना रोकिएको छ। सूचना, सञ्चार तथा प्रविधिमन्त्री ज्ञानेन्द्रबहादुर कार्कीले गणनामा गडबडी गरेको भन्दै निर्वाचन अधिकृतको कार्यालयमा उजुरी दिएपछि रोकिएको हो।
मन्त्री कार्कीले सुरुदेखि नै पुन: गणनाको माग गरेका छन्। गणना रोकिनु अघिसम्म कार्कीले ९८ मतले अग्रता लिइरहेका थिए। कार्की २३ हजार ४३९ मतले अघि थिए भने एमालेका जगदीश कुसियैत २३ हजार ३४१ मतसहित प्रतिष्पर्धा गरिरहेका थिए।
प्रतिनिधि सभामा चर्को प्रतिस्पर्धा भइरहँदा प्रदेशका दुवै क्षेत्रमा भने कांग्रेस उम्मेदवारले फराकिलो अग्रता हासिल गरेका छन्। सुनसरी ४ (१)मा कांग्रेसका सदान्नद मण्डलले ११ हजार ८४१ मत पाएका छन्। उनीसँग प्रतिस्पर्धा गरिरहेका जसपाका परशुराम बस्नेतले ८ हजार ९३६ मत पाएका छन्।
यसैगरी सुनसरी ४ (२) मा कांग्रेसका इस्राईल मन्सुरीले ११ हजार ६०९ मत पाएका छन् भने एमालेका अब्बास अंसारीले ९ हजार ८१२ मत पाएका छन्।
दुवै क्षेत्रमा कांग्रेसले लिएको अग्रता जोड्दा ४ हजार ७ सय २ मत हुन आउँछ। तर, प्रदेशमा भने चर्को प्रतिस्पर्धा छ।
मतमा देखिएको यो अन्तर उम्मेदवारअनुसारको छनोट होइन, सुनसरी कांग्रेसमा रहेको चर्को गुटबन्दी हो। कांग्रेसको गएको महाधिवेशनमा कांग्रेस सभापति शेरबहादुर देउवा पक्षले एकलौटी गरेको तुष यहाँ अझै मेटिएको छैन।
गुटबन्दी कारण स्थानीय तहमा धेरै पालिका जितेको कांग्रेसले संघमा ३ क्षेत्र पाएको थियो। ३ मध्ये सुनसरी- २ मा निवर्तमान सांसद सिताराम महतो एमालेका भीम आचार्यसँग पराजित भइसकेका छन्।
सुनसरी- ३ मा विजय गच्छदारले एमाले सांसद भगवती चौधरीसँग ४ हजारको मतान्तरले पछि परेका छन् भने सुनसरी- ४ मा प्रतिस्पर्धा जारी छ। गणनामा गडबड भएको आशंका कांग्रेस पक्षले गरेको छ। वाम गठबन्धनका साझा उम्मेदवार प्रतिस्पर्धी हुँदा पनि २०७४ सालको निर्वाचनमा फराकिलो अन्तरले जितेका कार्कीलाई यसपल्ट मुस्किल परिरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789039924.jpg)
-1709472446.jpg)
-1786602170.png)
