काठमाडौं- नेपाली कांग्रेसका केन्द्रीय सदस्य सञ्जय गौतम वर्दिया क्षेत्र नम्बर १ बाट प्रतिनिधि सभाका उम्मेदवार छन्। उनी विसं २०७४ सालमा पनि उक्त क्षेत्रबाट निर्वाचित भएका थिए। पाँच वर्षअघि उनी बाम गठबन्धन हुदाँ उक्त क्षेत्रबाट निर्वाचित भएका थिए।
यस पटक उनले प्रतिस्पर्धीका रुपमा नेकपा एमालेबाट लक्ष्मणलाल ज्ञवाली र जसपाबाट रेशमबहादुर खत्रीलाई प्रतिस्पर्धीको रुपमा पाएका छन्। उनलाई सत्ता गठबन्धनको माओवादी केन्द्र, एकिकृत समाजवादी पार्टी र लोसपाले सर्मथन गरेको छ। निर्वाचनको प्रचारप्रसारका क्रममा मतदाताको घर आँगन घुमिरहेका गौतमसँग नेपाल लाइभले गरेको कुराकानीको सम्पादित अंश :
तपाईं मतदाताको घर-घर पुग्नुभयो। मतदाताको आशा र गुनासा के रहेछन्?
मतदाताहरू कोही निराश भने देखिन्छन। विगतको जस्तो उत्साह देखिँदैन। तर जनता पूर्ण रुपमा असन्तुष्ट भने छैनन्। जनता मप्रति होइन आम रुपमा उदासिन भएका छन्।
जनतालाई हामीले घर दैलोमा पुगेर आफ्ना कुरा बुझाएपछि उत्साही पाएका छौँ। मैले व्यक्तिगत रुपमा घरदैलो गर्दा हौसला पाइरहेको छु। मलाई माया नै दिएका छन्। जनताले मलाई विश्वास गरेका छन्। जनताको मनमा मेरो लागि स्थान रहेछ भन्ने हौसला मैले पाएको छु।
अघिल्लो पटक २०७४ सालको निर्वाचनमा पनि तपाईं ‘हेविवेट’ प्रतिस्पर्धाबाट चयन भएर आउनुभएको थियो। तर यसरी चयन भएर आउँदा पनि प्रभावकारी काम गर्न नसकेको गुनासो आम मतदाताको देखिन्छ नि? विगतमा सञ्जय गौतमलाई माया गरेर जिताएर पठाउनु भएको थियो। तर तत्कालीन समयमा नेपाली कांग्रेस अल्पमतमा थियो। हामी लामो समय प्रतिपक्षमा थियौँ। बाम गठबन्धनको नेकपा सरकारमा थियो। सरकारमा नबसेका कारण हामीले सोचेजति काम गर्ने अवसर पाएनौँ। सांसदको रुपमा धेरै गर्न सकिने अवस्था थिएन। मन्त्री हुने अवसर नपाएका कारण जनताको अपेक्षाअनुसार काम गर्न चाहेर पनि नपाएको कुरा सत्य हो।
नेकपाको दुई तिहाइ सरकार हुदाँ सांसदको मात्र भूमिका थियो, त्यो भूमिका मैले न्याय गर्ने कोसिस भरपूर मात्रामा गरेको छु। जनताले त्यसको मूल्यांकन पनि गरेका छन्। त्यस्तै अबको निर्वाचन त्यो भन्दा फरक छ। हामी गठबन्धन बनाएर निर्वाचनको मैदानमा छाँै। हामी बहुमत ल्याउँदै सरकार बनाउँछौ। नेपाली कांग्रेसको नेतृत्वमा सरकार बनेपछि जनताको चाहनाअनुसार धेरै काम गर्न सकिन्छ। मेरो पनि अब अर्कै भुमिका हुन्छ, अनि यहाँको कुरा सम्बोधन गर्न सकिन्छ।
मतदाताका कस्ता गुनासो पाउनु भएको छ?
सांसद भनेको गुनासो गर्ने सबैको साझा बिन्दु हुने रहेछ। पञ्चायतकालदेखि नै गणतन्त्रसम्मका अनुभव हेर्दा तीन तहको सरकार अहिले छ। मतदातासबैै गुनासो सासदलाई सुनाउने गर्छन्। वडाअध्यक्षको गुनासो पनि सांसदलाई, गाउँपालिका अध्यक्षको गुनासो पनि सांसदलाई र कानुनदेखि विकाससम्मका कुरा सांसदलाई सुनाउने हुँदो रहेछ। सरकार कसको छ भनेर मतदाताले हेर्दैनन्।
उनीहरूले विकास किन भएन र मेरो क्षेत्रमा किन काम भएन भनेर हेर्ने गरेको देखिन्छ। मैले आफ्नो क्षेत्रमा अलग्गै खालको अनुभव पनि संगालेको छु। सांसदको इमेज अलग्गै खासको पाइएको छ।
मतदाताले के भनेर आशा राखेका छन्?
वर्दियाको समृिद्ध र संविधानको रक्षाका लागि काम गर्नुपर्छ भनेर मतदाताले सन्देश दिनुभएको छ। यत्रो दुख गरेर हामीले संविधान बनायौँ तर एमाले अध्यक्ष केपी शर्मा ओलीले त्यसलाई अपदस्थ गर्न खोज।े तपाईँहरूले बचाउनुभयो त्यसैले राम्रोसँग काम गर्नुपर्छ भनेर अधिकांश स्थानमा सुझाव पाएको छु। जनता निराशातिर जान लागेकाले काम गर्नुपर्छ है भनेर उनीहरूको सुझाव र अपेक्षा पाएको छु।
तपाईंले आफ्नो प्रतिस्पर्धीलाई कसरी हेर्नु भएको छ?
निर्वाचनमा होमिएपछि प्रतिस्पर्धा हुन्छ। सबै उम्मेदवारहरू प्रतिस्पर्धा गर्ने भनेर नै मैदानमा आउनु भएको हो। मैले आफ्नो प्रतिस्पर्धीलाई पनि त्यही रुपमा लिएको छु। नेकपा एमाले लगायत अन्य उम्मेदवारहरूलाई उच्च सम्मान गर्दै हामी निर्वाचमा छौँ। हामीले आफ्ना एजेण्डा मतदातासमक्ष राखेका छौँ।
मेरा प्रतिस्पर्धीले पनि आफ्ना एजेण्डा भन्नुभएको होला। आफूलाई सच्याउनुपर्ने पनि आवश्यकता हुन सक्छ। जनताले आफू निकट र आफ्नो गुनासो सुन्ने व्यक्ति खोज्दो रहेछ। उनीहरूले यही कुरा मलाई भन्नुभएको छ। मतदातालाई यत्तिले पनि पुगेको छैन। अझै केही गर्दियोस् र यसले चाहे गर्न सक्छ भनेर अपेक्षा राख्नुभएको छ। मसँग जनताको भरोशा र अपेक्षा धेरै भएको पाएको छु। जुन मेरा लागि पनि जिम्मेवारी बोझ गर्दै उत्तरदायी हुने अवसर हो।
तपाईंलाई नै किन मत दिने त?
यो प्रश्न राम्रो हो। चुनावी मैदानमा धेरै उम्मेदवार छन् तर म नै किन भन्दा मतदाताले राखेको अपेक्षा पूरा गर्न हो।
मतदाता समक्ष पुग्दा उहाँहरूले पनि तपाईंको विकल्प छैन भन्नुभएको छ। यो मेरो लागि विश्वास पनि हो। मैले यो आर्जन गरेको रहेछु। मतदाताले अघिल्लो पटक तपाईँ सांसद हुनुभयो तर सरकारमा जानुभएन तर हाम्रा लागि आवाज उठाउन पछि पर्नुभएन भनेर भन्नु भएको छ।
तपाईंको पार्टी पनि सरकारमा नभएकाले चाहे जति काम गर्न पाउनु भएन। यसपटक गठबन्धन छ। सरकार बनाउने पनि सम्भावना भएकाले तपाईंले जितेर जानुपर्छ अनि यस क्षेत्रको समृद्धि र विकासका लागि काम गर्नुपर्छ भनेर जनताले भन्नुभएको छ। उहाँहरूको यो आशा र विश्वास मर्न दिने छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786600947.png)
-1764146706.png)
-1786513116.png)
