काठमाडौं– मुस्ताङमा रहेको प्रशिद्ध तीर्थस्थल मुक्तिनाथ क्षेत्रमा धार्मिक र पर्यटकीय पूर्वाधार थपिँदै गएका छन्। गैरआवासीय नेपाली संघका पूर्वउपाध्यक्ष सोनाम लामाको व्यक्तिगत पहलमा पछिल्लोसयम करोडौंको लगानीमा धार्मिक र पर्यटकीय पूर्वाधार थपिएका हुन्।
लामाको लगानीमा मन्दिर परिसरमा ३५ फिट अग्लो भगवान् गौतम बुद्धको मूर्ति तयार भएको छ भने सोही आकारकै भगवान् विष्णुको मूर्ति पनि राख्न लागिएको छ।
त्यस्तै, मुक्तिनाथ क्षेत्रमै अन्तर्राष्ट्रिय स्तरको बुटिक रिसोर्ट लो मुस्ताङ हिमालय रिसोर्ट पनि लामाकै लगानीमा तयार भएको छ।
तयार भएको गौतम बुद्धको मूर्ति र रिसोर्टको राष्ट्रपति विद्यादेवी भण्डारीले आगामी शुक्रबार उद्घाटन गर्ने कार्यक्रम तय भएको छ।
त्यसैगरी, नयाँ बन्ने विष्णु भगवान्को मूर्ति निर्माणको शिलान्यास पनि राष्ट्रपति भण्डारीले सोही दिन नै गर्ने कार्यक्रम तय भएको लामाले जानकारी दिए।
परम्परागत धार्मिक संरचनाको संरक्षण र सम्बद्र्धन गर्नेगरी मुक्तिनाथ विकास गुरु योजना छ। सोही गरु योजनाको महत्वपूर्ण संरचना बुद्ध मूर्तिको स्थापना र विष्णु भगवान्को मूर्ति शिलान्याशमा आफू संलग्न हुँन पाउँदा खुसी लागको उनको भनाइ छ।
बुद्धको मूर्ति
मुक्तिनाथ क्षेत्रको समुचित विकासका लागि तय गरिएको गुरु योजनाको एक अंशका रुपमा ३५ फिट अग्लो पत्थरको बुद्धको मूर्ति बनाइएको छ। पाटन औद्योगिक क्षेत्रमा तयार गरिएको मूर्ति मुक्तिनाथमा स्थापना गरिएको लामाले बताए।
मूर्ति आसपास क्षेत्रमा ध्यान योग तथा दृश्यावलोकनका लागि उपयुक्त हुनेगरी पार्क तथा अन्य संरचना पनि बनाइएको लामाले जानकारी दिए। पाँच स्तुप र ११ ढुंगेधारा पनि त्यहाँ बनेका छन्।
‘पाहुनालाई बुद्धमूर्ति आराधनाका लागि मात्र होइन ध्यान योग दृश्यावलोकनको स्वर्गीय आनन्द अनुभूत गर्नेगरी यो संरचना तयार गरेका हौ,’ लामाले भने।
मुक्तिनाथ मन्दिर नजिकैको रानीपौवामा यी संरचना बनेका छन्। समुद्र सतहबाट करिब तीन हजार सात सय मिटरको उचाइमा बनेका संरचना आसपासबाट ३६० डिग्रीमा चारैतर्फ हिमालको दृष्यावलोकन गर्न सकिन्छ।
विष्णुको मूर्ति पनि
गुरुयोजनाअनुरुप भगवान् विष्णुको पनि ढुंगाकै ठूलो मूर्ति बनाउन लागिएको छ। यो मूर्ति स्थापनाका लागि गैरआवासीय नेपाली संघका पूर्वअध्यक्ष शेष घलेले पनि ५० लाख रुपैयाँ सहायता गर्ने लामाले जानकारी दिए। ३५ फिट अग्लो विष्णु मूर्ति र सम्बन्धित अन्य संरचना निर्माणका लागि करिव नौ करोड रुपैयाँ लाग्ने आँकलन उनको छ।
विष्णुको मूर्ति पनि पाटन औद्योगिक क्षेत्रमै निर्माण गरी त्यहाँ पु्र्याइने लामाले जानकारी दिए। यो परियोजनाका लागि भने गैरआवासीय नेपालीलगायत अन्य दाताको सहायता पनि स्वीकार गरिने उनको भनाइ छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
