काठमाडौं– नेकपा एकीकृत समाजवादीले एमालेका तत्कालीन प्रधानमन्त्री मनमोहन अधिकारी नेतृत्वको ९ महिने सरकारले गरेका काम तथा उपलब्धिको अपनत्व लिएको छ।
आसन्न निर्वाचनका लागि सार्वजनिक गरेको चुनावी घोषणापत्रमा समाजवादीले अधिकारी नेतृत्वको सरकारले सुरु गरेको ‘आफ्नो गाउँ आफैं बनाउँ’ कार्यक्रम, सामाजिक सुरक्षा भत्ता लगायतका लोक कल्याणकारी कामको अपनत्व लिएको हो।
एमाले विभाजित गरी गठन भएको एकीकृत समाजवादीले मनमोहन सरकारको कामको जस लिँदै त्यसबारे घोषणापत्रमा उल्लेख गरेको हो।
‘पार्टी कमरेड मनमोहन अधिकारीको नेतृत्वमा गठित २०५१ सालको ९ महिने सरकारको सबैभन्दा लोकप्रिय र जन–जनका मन मस्तिस्कमा बस्न सफल कार्यक्रम हो, ‘आफ्नो गाउँ, आफै बनाऔँ’। यो कार्यक्रम नेपालको स्थानीय विकासको क्षेत्रमा आधारभूत परिवर्तन ल्याउने युगान्तकारी कदम थियो। केन्द्रीय सरकारले स्थानीय निकाय गाविस/नगरपालिकालाई बजेट उपलब्ध गराउने, तर स्थानीय जनताले नै योजना छनौट गर्ने, योजना र बजेट कार्यान्वयन गर्ने, योजनाको अनुगमन गर्ने र जनलेखा परीक्षणसमेत स्थानीय जनताले गर्ने यो कार्यक्रम ग्रामीण विकासको एउटा नमूना कार्यक्रम थियो। यही कार्यक्रमको जगमा नै अहिलेका पालिकाहरूमा उल्लेख्य मात्राको बजेट जाने गरेको छ,’ घोषणा पत्रमा उल्लेख गरेको छ।
यो लगायत माधव नेपाल र झलनाथ खनाल नेतृत्वको सरकारले गरेका कामहरुलाई १५ बुँदामा समावेश गरिएको छ।
यस्तो छ एकीकृत समाजवादीले घोषणापत्रमा उल्लेख गरेका उपलब्धिहरु:
१. गणतन्त्र स्थापनामा नेतृत्वदायी भूमिका,
२. शान्ति स्थापनामा प्रमुख भूमिका,
३. तत्कालीन ‘अनमिन’ लाई बिदा गर्ने काम,
४. पुष्पलाल (मध्यपहाडी) लोक मार्गको सुरुवात,
५. काठमाडौं–निजगढ द्रुत मार्गको सुरुवात,
६. स्थानीय तहमा महिला र उत्पिडीत–दलित समुदायको उपस्थिति बढाउने काम,
७. माथिल्लो तामाकोशी जलविद्युत् आयोजना निर्माणको सुरुवात,
८. कलंकी–नौबिसे सुरुङ मार्गको योजना,
९. जनता आवास कार्यक्रम
१०. विद्यालय र बालबालिका शान्ति क्षेत्र घोषणा,
११. अन्तरजातीय विवाहलाई प्रोत्साहन,
१२. एकल महिलाहरूलाई प्रोत्साहित गर्ने कार्यक्रम,
१३. महिलामाथि हुने हिंसा नियन्त्रण गर्न प्रहरीमा महिला सेलको स्थापना,
१४. अपाङ्गता भएका व्यक्ति लगायतलाई सामाजिक सुरक्षा कार्यक्रम,
१५. सुत्केरी भत्ताको व्यवस्था।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787130532.png)
-1786602170.png)
-1786513116.png)
