काठमाडौं– अष्ट्रेलियामा जारी आइसीसी टी–२० विश्वकप क्रिकेटमा भारतले लगातार दोस्रो जित निकालेको छ। गत २३ अक्टोबरमा भएको पहिलो खेलमा भारतले पाकिस्तानलाई पराजित गरेको थियो।
बिहीबार सिड्नी क्रिकेट मैदानमा भएको आफ्नो दोस्रो खेलमा टेस्ट राष्ट्र भारतले एसोसिएट राष्ट्र द नेदरल्याण्ड्सलाई सजिलै हराएको छ।
सुपर १२ को समूह २ को खेलमा द नेदरल्याण्ड्समाथि ५६ रनको सहज जित निकालेको भारत अंक तालिकाको शीर्ष स्थानमा उक्लिएको छ। दुई खेलमा शतप्रतिशत जित निकालेको भारतले ४ अंक जोडेको छ।
लगातार दोस्रो पराजय ब्यहोरेको नेदरल्याण्ड्स भने अंकबिहीन रहँदै तालिकाको पुछारमा छ।
भारतले दिएको १८० रनको लक्ष्य द नेदरल्याड्सले भेट्टाउन सकेन। उसले निर्धारित २० ओभरमा ९ विकेट गुमाएर १२३ रनमात्र बनाउन सक्यो।
नेदरल्याण्ड्सका लागि टिक प्रिंग्लेले सर्वाधिक २० रन बनाए पनि त्यो टोलीको जितको लागि पर्याप्त भएन।
भारतका भुवनेश्वर कुमार, अर्षदीप सिंह, अक्षर पटेल, रविचद्रन आश्विनले समान २–२ तथा मोहम्मद सामीले १ विकेट लिए।
यसअघि, टस जितेर ब्याटिङ गरेको भारतले पूरै ओभर खेल्दै २ विकेटको क्षतिमा १७९ रन बनाएको थियो।
भारतका पूर्वकप्तान विराट कोहली, कप्तान रोहित शर्मा र सूर्यकुमार यादवगरी तीन खेलाडीले अर्धशतकीय पारी खेले। विराटले अविजित रहँदै सर्वाधिक ६२ बनाए। यस्तै, रोहितले ५३ तथा सूर्यकुमारले अविजित ५१ रन बनाए।
यसअघि ओपनर केएल राहुल ९ रनमा आउट भएका थिए।
द नेदरल्याण्ड्सका फ्रेड क्लासेन र पाउल भान मिकेरेनले समान १ विकेट लिए।
२५ बलमै अविजित ५१ रन बनाएका भारतका सूर्यकुमार खेलको उत्कृष्टसँगै मूल्यवान खेलाडीसमेत घोषित भए।
यसअघि, बिहीबार नै भएको पहिलो खेलमा दक्षिण अफ्रिकाले बंगलादेशमाथि फराकिलो जित निकालेको छ। सुपर १२ अन्तर्गत सिड्नीमै भएको खेलमा दक्षिण अफ्रिका बंगलादेशलाई १०४ रनले हराएको हो।
दक्षिण अफ्रिकाले दिएको २०६ रनको लक्ष्य पछ्याएको बंगलादेश १६.३ ओभरमा सबै विकेटको क्षतिमा १०१ रनमा समेटियो। बंगलादेशका लागि लिटाेन दासले सर्वाधिक ३४ रन बनाए।
यस्तै, सौम्य सरकारले १५, मेहदी हसन मिराजले ११ र तास्किन अहमेदले १० रन जोडे। बलिङमा अफ्रिकाका एत्रिच नोर्कियाले ४ तथा ताब्रेज शम्सीले ३ विकेट लिए।
यसअघि पहिले ब्याटिङ गरेको दक्षिण अफ्रिकाले अफ्रिकाले निर्धारित २० ओभरमा ५ विकेटको क्षतिमा २०५ रन बनाएको थियो।
दक्षिण अफ्रिकाका लागि रिली रस्सोले शतकीय पारी खेल्दै १०९ रनको रन बनाए भने क्विन्टन डी ककले ६२ रन जोडे।
बंगलादेशका सकिव अल हसनले २, तस्किन अहमद, हसन मोहम्मद र अफिफ हुसैनले १–१ विकेट लिए।
जितसँगै समूह २ मा रहेको दक्षिण अफ्रिकाले २ खेलबाट ३ अंक बनाएको छ । दक्षिण अफ्रिका दोस्रो स्थानमा छ भने २ अंक बनाएको बंगलादेश तेस्रो स्थानमा छ।
अहिले यसै समूहअन्तर्गत पाकिस्तान र जिम्बावेबीच खेल भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1779545841.jpg)
