काठमाडौं– दक्षिण भारतीय अभिनेता नागा चैतन्यले हालसालै एक अन्तर्वार्तामा आफ्नी पूर्व पत्नी सामन्था रुथ प्रभुको बारेमा कुरा गरेका छन्। गत अक्टोबरमा सम्बन्ध विच्छेद गरेका उनीहरुले हाल आफ्नो आफ्नो जीवनमा अघि बढिसकेको नागाले बताएका छन्।
नागाले आफ्नो व्यक्तिगत जीवनको बारेमा दुनियाँले वास्ता गर्नु अनावश्यक रहेको बताउँदै आफूहरु आफ्नो आफ्नो जीवनमा अघि बढिसकेको बताएका हुन्। उनले भनेका छन्, ‘यो एकदम दिक्दार लाग्ने कुरा हो। म आफ्नो कलाकारिताको परिचयमार्फत चर्चामा आउन चाहन्छु, तर सबैले मेरो व्यक्तिगत जीवनको मात्रै कुरा गरिरहेका छन्। मेरो व्यक्तिगत जीवन नितान्त मेरो कुरा हो।’
नागाले आफू र आफ्नी पूर्व पत्नी सामन्थाले चाहेअनुसार नै सौहार्दपूर्ण रुपमा सम्बन्धलाई अन्त्य गरेको बताएका छन्। उनले आफू र आफ्नी पूर्व पत्नीले कुनै विवाद वा झगडा बीना सम्बन्ध अन्त्य गरेको हुनाले यो विषयमा कुरा गर्न अनावश्यक रहेको बताएका छन्।
नागा र सामन्थाले सन् २०१७ अक्टोबरमा विवाह गरेका थिए। विवाहको करिब चार वर्षपछि उनीहरु एकअर्कासँग छुट्टिएका हुन्। यी दुवैले एकसाथ ‘मनम’, ‘ये माया चेसावे’ र ‘अटोनगर सूर्या’जस्ता फिल्ममा एकसाथ काम गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
