चितवन– पहिरोका कारण चपेटामा पर्दै आएको नारायणगढ–मुग्लिङ सडक खण्डको १७ किलोमा भासिएको सडक निर्माणमा चासो नदिँदा यात्रुहरुले थप सास्ती व्यहोर्नु परेको छ।
गत साता नारायणगढ–मुग्लिङ सडक खण्डअन्तर्गत १७ किलोमा सडक भाँसिएपछि यात्रुहरु झनै मारमा परेका हुन्। २५ मिटर लम्बाई र ५ मिटर चौडाई बराबरको सडक भासिएपछि एकतर्फी रुपमा मात्रै सवारी साधनहरु मुस्किलले सूचारु गराउने काम गरिएको चितवन ट्राफिक प्रहरी कार्यालयका प्रहरी निरीक्षक बेदप्रसाद गौतमले जानकारी दिए।
एकतर्फी सवारी आवागमन हुँदा सवारी जामको समस्या यथावत रहने र यात्रुलाई सास्ती बढ्ने ट्राफिक प्रमुख गौतमको भनाइ छ।
उनले तत्काल भासिएको सडक मर्मत नभए सडक अवरुद्ध हुनेतर्फ पनि सम्बन्धित निकायको गम्भिर ध्यानाकर्षण गराए। फेरी निरन्तर वर्षा भए नारायणगढ–मुग्लिङ सडक खण्ड अवरुद्ध हुनसक्नेतर्फ प्रहरी निरीक्षक गौतमले सचेत गराए।
उक्त स्थानमा १० वर्ष अघि पनि सडक भासिएपछि रड एङकरिङ अर्थात रडमा नडबोल्ट कसेर मर्मत गरिएको थियो। अहिले पनि सोही नटबोल्ट लुज भएर सडक भासिएको हुनसक्ने प्राविधिकहरुले बताएका छन्। सडक भासिएपछि काठमाडौंबाट गएका विज्ञहरुले अध्ययन एवम् निरीक्षण गरेपनि समस्या समाधानका लागि तत्काल कुनै सुझाव नदिएको स्थानीयको गुनासो छ।
सडक भासिएपछि त्यसको कारणको खोजी गर्ने काम विज्ञहरुले गरिरहेको नारायणगढ–मुग्लिङ सडक आयोजनाका इन्जिनियर शिव खनालले बताए। हालसम्म साे स्थानमा निर्माणकाे काम भने सुरु हुन सकेकाे छैन।
दैनिक ७ हजार ३ सयभन्दा बढी सवारी साधान आवातजावत हुने सो सडक खण्ड भासिएपछि यात्रुहरु झनै मारमा परेका हुन्। तत्काल त्यसको पुनर्निर्माण नभए सो सडक खण्ड नै अवरुद्ध हुने ट्राफिक प्रहरीको चेतावनी छ। पहिरोको चपेटामा परेको सो सडक खण्डको भासिएको ठाउँ तत्काल मर्मत नभए हजारौं यात्रुले यात्रा गर्नबाट वञ्चित हुनुपर्ने अवस्था आउने निश्चित छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791869951.jpg)
-1786602170.png)
