काठमाडौं– सलोन बस्नेत एक हिसाबले सफल अभिनेताको रूपमा स्थापित भइसके। तर, उनको नाममा भएका फिल्महरु हेर्ने हो भने सफल फिल्मको सूचीमा उनको ‘लिड’ अभिनय रहेको फिल्म नै छैन।
अधिकांश फिल्ममा उनी सहायकको भूमिकामा देखिएका छन्। उनी सफल रहेका सबै फिल्महरूमा उनको भूमिका साइड रोलको रूपमा देखिएको छ।
फिल्म क्षेत्रमा स्थापित कलाकार सोभित बस्नेतका छोरा सलोनले २०१६ मा हेमराज बिसीको निर्देशनमा बनेको फिल्म ‘गाजलु’मा अभिनय गरेका थिए।
त्यसअघि उनले बिसीकै निर्देशनमा बनेको फिल्म ‘होस्टल’मा पनि अभिनय गरेका थिए। ‘गाजलु’ फिल्ममा लिड भूमिकामा अभिनेता अनमोल केसीको अभिनय थियो। फिल्मले राम्रै चर्चा कमायो, सहायकको भूमिकामा देखिएका सलोनको पनि राम्रो चर्चा भयो।
यता ‘होस्टल’ पनि सफल फिल्मको सूचीमा पर्छ। त्यसयता उनले करिब एक दर्जन फिल्ममा अभिनय गरिसकेका छन्। उनले काम गरेका फिल्महरुमा ‘होस्टल’, ‘ए मेरो हजुर २’, ‘जय भोले’, ‘राधे’, ‘हजार जुनीसम्म’, ‘ए मेरो हजुर ३’, ‘ए मेरो हजुर ४’, ‘डाँडाको वरपिपल’ लगायतका फिल्महरू हुन्।
यीमध्ये ‘ए मेरो हजुर’ फिल्म श्रृङ्खला अन्तर्गतका तीन फिल्म सफल फिल्म हुन्। त्यस्तै, गाजलु र होस्टलले पनि राम्रो सफलता पाएका छन्। तर, यी बाहेकका अन्य फिल्महरु भने खासै चर्चामा आउन सकेनन्।
तर, सहायकको भूमिकामा सलोनले राम्रै नाम कमाएको भए पनि लिड रोलमा देखिँदा भने उनलाई ‘लक’ले साथ दिएको छैन। यसपटक पनि उनको लिड अभिनय रहेको फिल्म ‘डाँडाको वरपिपल’ फ्लप भएको छ।
उत्कृष्ट सहअभिनेताको रूपमा विभिन्न अवार्ड मनोनयनमासमेत पर्ने सलोन लिडमा भने कहिले सफल हुन्छन् भन्ने पर्खाई लामो भएको छ। असार १० गतेबाट सलोन अभिनित फिल्म ‘घनचक्कर’ प्रदर्शनमा आउँदै छ।
जितेन्द्र राजोपाध्यायको निर्देशनमा बनेको यो फिल्ममा सलोन र सौगात मल्ल लिड रोलमा छन्। हेरौं, यसपटक सलोनलाई उनको भाग्यले सफल पो बनाउँछ कि?
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
