काठमाडौं- करिब एक महिनादेखि नियमित उठ्न नसकेको काठमाडौं महानगरपालिकाको फोहर व्यवस्थापनका लागि अझै केही दिन लाग्ने भएको छ।
नियमित रुपमा फोहर विसर्जन गरिँदै आएको नुवाकोटस्थित सिसडोलमा फोहर राख्ने ठाउँको अभाव हुँदा नियमित फोहर उठ्न नसकेको हो।
व्यवस्थापन गर्ने ठाउँ अभावका साथै फोहर लैजाने बाटो पनि बिग्रिएको छ। बाटोको मर्मत कार्य र सिसडोलमा पनि थप व्यवस्थापनका लागि प्रयास भइरहेको छ। त्यसका लागि अझै करिब एक साता लाग्ने काठमाडौं महानगरपालिकाले जनाएको छ।
महानगरका सहप्रवक्ता नवराज ढकाल पानी परेर बाटो बिग्रेकाले फोहरको नियमित व्यवस्थापन हुन नसकेको बताउँछन्।
व्यवस्थापनका सबै काम सकी बढीमा आगामी साताबाट नियमित रुपमा फोहर संकलन हुने भन्दै ढकालले आ–आफ्ना त्यतिन्जेल फोहर घरमै व्यवस्थापन गरी सहयोग गरिदिन नगरवासीलाई आग्रह गरेका छन्।
सर्वसाधारण भने असार/साउनको समयमा अन्य समयमा भन्दा बढी फोहर निस्कने गरे पनि एक महिनादेखि फोहर लिने गाडी नआउँदा समस्या भएको बताउँछन्।
कलंकी निवासी सीता शर्मा भन्छिन्, 'घरमा फोहरको डंगुर भइसक्यो, महानगरको गाडी कहिले आउने हो, थाहा छैन। अझै लामो समयसम्म नआउने हो भने यही फोहरबाट रोगको सिकार बन्नुपर्छ।'
महानगरबाट दैनिक ५ सय मेट्रिक टन र काठमाडौं उपत्यकाबाट दैनिक एक हजार मेट्रिक टन फोहर सिसडोलमा व्यवस्थापन हुँदै आएको छ।
काठमाडौं महानगरपालिकाले १२ वर्षअघि नै दुई वर्षका लागि फोहर व्यवस्थापन गर्न उक्त स्थान लिएको थियो। सम्झौताभन्दा लामो समयसम्म निरन्तर फोहर थुपार्दै आएकाले आफूहरुको दैनिक कामकाजमा समस्या भएको भन्दै सिसडोलका बासिन्दाले तत्काल फोहर व्यवस्थापनको काम रोक्न महानगरलाई आग्रह गरेका छन्।
१२ वर्ष बितिसक्दा पनि वैकल्पिक स्थान नखोज्दा महानगरलाई फोहरको व्यवस्थापन गर्न समस्या भएको छ। (रासस)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1789993953.png)
-1789992067.jpeg)
-1781580295.jpg)
-1786602170.png)
-1789631269.jpg)
