काठमाडौं- काठमाडौं जिल्लामा एक महानगरपालिकासहित ११ स्थानीय छन्। अहिले सबै पालिकामा मतगणना जारी छ। जसमध्ये एमाले र कांग्रेसले पाँच पाँच पालिकाको मेयरमा अग्रता लिएका छन्। एउटामा स्वतन्त्रले अग्रता लिएका छन्।
कांग्रेसले केही पालिकामा माओवादी केन्द्र, एकीकृत समाजवादी र राजमोसँग गठबन्धन गरेको छ भने केहीमा एक्लै प्रतिश्पर्धा गरिरहेको छ। उपमेयरमा भने एमालेले सात वटामा अग्रता लिँदा कांग्रेसले चार वटामा अग्रता बनाएको छ। उपमेयरमा गठबन्धनका अरु दलको भागमा परेका पालिकामा एमालेले अग्रता बनाएको हो।
कागेश्वरी मनोहरामा एमालेका रामशरण ढुंगानाले १०८५ मतसहित अग्रता लिएका छन्। कांग्रेसका उपेन्द्र कार्कीले ६२६ मतसहित पछ्याइरहेका छन्। उपमेयरमा एमालेकी शान्ता थापा ११३१ मतसहित अगाडि छिन् भने माओवादी केन्द्रका भोला चापागाईंले ५४१ मतसहित पछ्याइरहेका छन्।
कीर्तिपुर नगरपालिकामा कांग्रेसका राजकुमार नकर्मी २६२० मतसहित अगाडि छन्। एमालेका केशरत्न बज्राचार्यले १६०५ र माओवादी केन्द्रका शिवशरण महर्जनले १४०८ मत पाएका छन्। उपमेयरमा कांग्रेसकै शुभलक्ष्मी शाक्यले २४१५ मत ल्याउँदा एमालेकी विन्दु महर्जनले २२०३ र माओवादीकी सुशीला बस्नेतले ७०७ मत पाएकी छन्।
गोकर्णेश्वर नगरपालिकामा एमालेका उद्धव विष्टले २३३२ मतसहित अग्रता हासिल गरेका छन्। कांग्रेसका दीपककुमार रिसालले १९५२ मत ल्याएर पछ्याइरहेका छन्। उपमेयरमा पनि एमालेकी सान्नानी लामाले २३१५ मत ल्याएर अग्रता लिँदा कांग्रेसकी शान्ति नेपालले १८६९ मत पाएकी छन्।
उता चन्द्रागिरि नगरपालिकामा मेयरमा कांग्रेसका घनश्याम गिरीको २४१३ र एमालेका उत्तमबहादुर राउतको १८९४ मत छ। उपमेयरमा भने एमालेले अग्रता लिएको छ। एमालेकी वसन्ती श्रेष्ठको १९६६ मत छ भने गठबन्धनबाट राजमोको रोशन दानीको ८५३ मत छ।
टोखा नगरपालिकामा पनि मेयरमा एमालेका प्रकाश अधिकारीले १३५६ मतसहित अग्रता हासिल गर्दा कांग्रेसकी रजनी थापाले १०८६ मत पाएकी छिन्। उपमेयरमा एमालेकी ज्ञानमाया डंगोलले १०६३ मत ल्याएर अग्रता लिएकी छन्। कांग्रेसका मुरारी तामाङ ९४० मत ल्याएर पछ्याइरहेकी छिन्।
तारकेश्वरमा मेयरमा कांग्रेसका कृष्णहरि महर्जनको ४१५६ मत छ भने निवर्तमान मेयरसमेत रहेका एमालेका रामेश्वर बोहोराको मत ३३६९ छ। उपमेयरमा कांग्रेसकी सिर्जना बुर्लाकोटीको ९३४ र एमालेकी भवानी डोटेल धितालको ७९३ मत छ।
दक्षिणकाली नगरपालिकामा कांग्रेसका मोहन बस्नेतले २९४९ मतसहित अग्रता हासिल गर्दा एमालेका श्रीराम आचार्यले २२२७ मतसहित पछ्याइरहेका छन्। उपमेयरमा कांग्रेसकै वसन्ती तामाङले ३०६३ मत पाउँदा एमालेकी इन्दिरा न्यौपानेले २११५ मत पाएकी छिन्।
नागार्जुन नगरपालिकामा मेयरमा कांग्रेसका मोहनबहादुर बस्नेतले २४४ र एमालेका नन्दनहरि गौतमले १६२ मत पाएका छन्। उपेमेयरमा एमालेकी सुशीला अधिकारीले ५८ र एकीकृत समाजवादीका कृष्णहरि खत्रीले १३ मत पाएका छन्।
उता बुढानिलकण्ठमा मेयरमा एमालेका मिठाराम अधिकारीले १६४५ मत पाएका छन् भने कांग्रेसका विनोद चालिसेले १४१० मतसहित पछ्याइरहेका छन्। उपमेयरमा एमालेकै अनिता लामाले १८३५ मत पाउँदा कांग्रेसकी रमिला वाग्लेले १५४२ मत पाएकी छन्।
शंखरापुर नगरपालिकामा एमालेका कृष्णलाल बजगाईंले १२४८ मतसहित अग्रता लिँदा उनलाई एकीकृत समाजवादीका लक्ष्मीप्रसाद श्रेष्ठले ११९१ र राप्रपाका रमेश नापितले १०८१ मतसहित पछ्याइरहेका छन्। मेयरमा छुट्टै उम्मेदवारी दिएको माओवादी केन्द्रका मधु केसीले ६५५ मत पाएका छन्।
उपमेयरमा भने कांग्रेसकी समिता श्रेष्ठले १६०४ मतसहित अग्रता लिएकी छन्। एमालेकी लक्ष्मी केसीले ९८३ र राप्रपाकी विजयकुमारी वाइबाले ७१८ मत पाएका छन्। माओवादीकी चण्डिका चौलागाईंले ६७८ मत पाएकी छिन्।
काठमाडौं महानगरपालिकामा भने स्वतन्त्र उम्मेदवार बालेन शाहले अग्रता लिँदा एमालेका केशव स्थापित र कांग्रेसकी सिर्जना सिंहले पछ्याइरहेका छन्। उपमेयमा भने एमालेकी सुनिता डंगोलले फराकिलो मतान्तर बनाएकी छिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788243684.jpg)
_hy6IYH2vIF-1751945573.jpg)
-1786602170.png)
-1786513116.png)
