काठमाडौं– देशका ७५३ स्थानीय तहमा ३५ हजार २२१ जना जनप्रतिनिधि निर्वाचित गर्न शुक्रबार मतदान भएको छ। नयाँ संविधान जारी भएपछि दोस्रोपटक शुक्रबार स्थानीय तहको निर्वाचन भएको हो।
६ महानगरपालिका, ११ उपमहानगरपालिका, २७६ नगरपालिका र ४६० गाउँपालिकामा नयाँ नेतृत्व चयनका लागि मतदाताहरुले उत्साहजनक रुपमा मतदान गरेका छन्। उम्मेदवारको मृत्यु भएका कारण शुक्रबार कपिलवस्तुको महाराजगञ्ज नगरपालिका र दाङको तुलसीपुर नगरपालिका–१७ मा भने शुक्रबार मतदान हुन सकेन।
शुक्रबार बिहान ७ बजेदेखि मतदान सुरु भएकोमा साँझ ५ बजेको निर्धारित समय सकिएको छ। निर्धारित समय सकिए पनि मतदान केन्द्रमा पुगेका मतदाताहरुलाई भने मतदान गर्न दिइने छ।
शुक्रबारको मतदानमा किरियापुत्रीदेखि अशक्त सम्मले सहभागिता जनाए।
केही ठाउँमा छुटफुट घटना भएपनि देशभर उत्साहजनक रुपमा मतदान भएको निर्वाचन आयोगको दाबी छ।
केही ठाउँमा भने मतदानका क्रममा विवाद र झडप हुँदा सुरक्षाकर्मीले हवाई फायर समेत गर्नुपर्यो।
सप्तरीको डाक्नेश्वरी नगरपालिकाको एउटा मतदान केन्द्रमा मतदान अधिकृत कुटिपएपछि त्यहाँ मतदान स्थगित गरिएको छ। अब त्यहाँ जेठ १ गते मतदान हुने जनाइएको छ।
मतदानका क्रममा रामेछाप, दोलखा, ओखलढुङ्गा, सिन्धुपाल्चोक, हुम्ला, रुकुमपूर्व, काभ्रे र रौतहट लगायत क्षेत्रमा झडप भयो।
हुम्लाको चंखेली गाउँपालिका केन्द्र, ओखलढुंगाको चम्पादेवी गाउँपालिका–९ मिश्रभन्ज्याङको मतदान केन्द्र र रामेछापको दोरम्बा, शैलुङ र खाँडादेवी गाउँपालिका, गोरखाको घ्याल्चोक, सर्लाहीको धनकौलका मतदान केन्द्रमा हवाई फायर गर्नु पर्यो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
