काठमाडौं– प्रायः हरेक दशैँमा रेडियो नेपालले बजाउने ‘महिषासुर वध’ नाटकमा राक्षसको ठूलो आवाजको हाँसो धेरै स्रोताले अझै सम्झिरहेको हुनुपर्छ। घटनस्थापनादेखि यो नाटक नौ दिनसम्म हरेक दिन दिउँसो १ बजे बज्ने गर्थ्यो।
१ बजेपछि मालश्री धुन बज्थ्यो। अनि, प्रस्तोताले उद्घोष गर्थे–
अब प्रस्तुत छ नाटक– महिषासुर वध
लेखक– गोपालप्रसाद ज्ञवाली
निर्देशक– मदनदास श्रेष्ठ
निर्देशक मदनदास कलाकार पनि हुन्। नाटकमा राक्षसको ठूलो आवाजको हाँसो हाँस्ने मदनदास नै थिए। उनै मदनदास फेरि चर्चामा छन्। तर, यसपटक कलाकारिताबाट होइन, राजनीतिको कारण। उनलाई राप्रपाले काठमाडौं महानगरको मेयरको उम्मेदवार बनाउने निर्णय गरेको छ।
नाटकको पात्रभित्र हराउने मदनदास अहिले बिहानदेखि रातिसम्मै फुसर्दमा छैनन्। उनलाई भेट्न आउने कार्यकर्ताको भिडभाड छ। चुनावी अभियानको खाका कोर्न उनको सहयोगी समूह नै लागेको छ। त्यसैले अहिले उनी नाटकबारे सोच्न भ्याउँदैनन्।
उनी २०२१ सालदेखि कलाकारितामा लागेका हुन्। पछिल्लो समय रेडियो नाटकको चलन हराउँदै गएपछि साना तथा ठूला पर्दामा केन्द्रित भएका थिए। हाँस्य टेलिश्रृंखलाहरूमा अभिनय गर्थे।
रेडियो नाटकबाहेक मदनदास २०२७ सालदेखि रंगमञ्चमा पनि सक्रिय भए। त्यही वर्षदेखि उनले नेपाल राजकीय प्रज्ञा प्रतिष्ठानमा ‘क’ श्रेणीको कलाकारको जागिर सुरु गरे। त्यहाँको जागिर छोडेर उनी साझा प्रकाशनमा कैलाली शाखा प्रमुख हुन गए। त्यहाँ पनि धेरै बस्न सकेनन् र फेरि काठमाडौं फर्केएर नाटकमा नै केन्द्रित हुन थाले।
त्यसपछि रेडियो नेपालमा करारमा जागिर खान थाले। उनी २०३५ सालमा त्यहाँको स्थायी जागिरे भए। रेडियो नेपालमा काम गर्दा उनको निर्देशनमा बनेको ‘महिषासुर वध’ नाटकले उनलाई चिनायो। ‘दशैंको नौ दिनसम्म चल्ने नाटकले मलाई बेग्लै पहिचान दियो। धेरैले चिने,’ उनले भने, ‘त्यसपछि मैले तिहारमा पनि पञ्चक शुरु भएदेखिका पाँच वटा नाटक बनाएँ। ती पनि स्रोताले मन पराए।’
यी नाटकबाट हौसला पाएपछि उनले स्वस्थानी व्रत कथालाई पनि रेडियो नाटकमा रुपान्तरण गरे। माघ महिनाभरि यो नाटक चल्ने भएकाले यसका ३१ वटा भाग बने। शहीद दिवसमा पनि नाटक बनाएर बजाउन थाले। यीबाहेक चेलिबेटी बेचबिखन र जनचेतनामूलक नाटकहरू गरे। चर्चित नेताहरुको जीवनीको समेत रेडियो नाटक बनाए। उनैले बनाएको ‘वीर गणेशमान’ रेडियो नाटक धेरैले रुचाएका थिए।
अब भने उनी संघीय राजधानी भएको काठमाडौं महानगर हाँक्न कस्सिएका छन्। सोमबार नेपाल लाइभसँग कुराकानी गर्दा उनी चुनाव प्रचारमै व्यस्त थिए। ‘पहिलाजस्तो प्रचारको शैली छैन। अहिले त फोनमा, भेटघाटमा र तपाईंहरु जस्तै सञ्चारमाध्यमलाई आफ्ना कुरा सुनाउने हो,’ उनले भने, ‘मेरो सबै कुरा प्रष्ट लेखिदिनु होला, म अरु पुरानाजस्तो हैन। केही गर्ने चाहना र हिम्मतले मेयरको टिकट स्वीकार गरेको हुँ।’
आफू योजना र कार्यक्रमसहित चुनावी प्रतिश्पर्धामा आएको मदनदास बताउँछन्। ‘म विगतमा पनि काठमाडौंमै सामाजिक काममा लागेको थिएँ, अब त्यही काम राज्यको निकायमा बसेर गर्ने अवसर खोजेको हुँँ,’ उनले भने ‘घट्टेकुलोमा जेष्ठ नागरिक अभियानदेखि दोलखाको फिल्म सिटी निर्माणमा पहलकदमी लिएको अनुभवले मलाई महानगरमा धेरै गर्न सकिने अनुभव छ।’
विगतमा अन्य राजनीति दलहरुले पनि आफूलाई उम्मेदवारको प्रस्ताव गरेको उनी बताउँछन्। तर, स्वीकार गरेका थिएनन्। ‘मैले यसपटक केही सोचविचार गरेर नै उम्मेदवार बन्न स्वीकार गरेको हुँ,’ उनले भने, ‘महानगरको मेयरमा विजयी हुन्छु भन्ने मलाई लागेको छ। नगरवासीले मलाई पक्कै पनि विजयी गराउँछन्।’
फोहोर व्यवस्थापन, व्यवस्थित सडक सञ्जालजस्ता काम आफ्नो प्राथमिकतामा पर्ने उनले बताए। ‘फोहोर व्यवस्थापनमा महानगरले गर्न सक्ने काम पनि गरेन। स्थायी रुपमा व्यवस्थापन हुन सकेन,’ उनले भने ‘मेरो पहिलो काम नै यो व्यवस्थापन हुन्छ।’
त्यस्तै युवाहरूको स्वरोजगार र गुणस्तरीय तथा सुलभ शिक्षा पनि आफ्नो प्रमुख अजेण्डा भएको उनले बताए। ‘अहिले टोलमा पुराना चोकहरु र खेल्ने ठाउँ हराएका छन्। यसलाई पुनस्र्थापित गर्ने मेरो प्रमुख काम हुनेछ,’ उनले भने ‘जेष्ठ नागरिक र बालबालिकालाई खेल्ने पार्क बनाउने काम गर्नेछु। यसका लागि सरकारी जग्गा सदुपयोग गर्नुपर्छ।’ महानगरमा रहेका अतिक्रमित सरकारी जग्गा आफूले खोज्ने उनको दाबी छ।
‘ठमेल जस्ता पर्यटकीय क्षेत्र र पर्यटन भित्राउने ठूलो सम्भावना भएको ठाउँ महानगरमा छ, तर हामीले योजनाबद्ध काम गर्न सकेनौँ र चुक्यौँ,’ उनले भने, ‘नेतृत्वमा भएका मान्छेको इच्छाशक्ति र गर्ने आँट हुने हो भने महानगरलाई पर्यटकीय र धार्मिक शहर बनाउन सकिन्छ।’ उनले यहाँका संस्कृतिहरूलाई अन्तर्राष्ट्रिय रूपमा परिचित गराउन सकिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772261485.png)
-1772253460.png)
-1764146706.png)
