काठमाडौं– विवेकशील साझा पार्टीले काठमाडौं महानगरपालिकाको मेयरमा समीक्षा बाँस्कोटालाई उम्मेदवार बनाएको छ। उनी विवेकशील साझा पार्टीको बागमती प्रदेश पूर्वसंयोजक तथा केन्द्रीय कार्य सम्पादन समितिकी सदस्य हुन्।
३८ वर्षीय बास्कोटाले काठमाडौँ स्कुल अफ लबाट कानुनमा स्नातक गरेकी छिन्। त्यसैगरी अमेरिकाबाट कानुनमै स्नातकोत्तर गरेकी छिन्। उनले अमेरीकाको सेन्ट अफ जोन्स युनिभर्सिटीबाट एलएलएम गरेकी हुन्।
बाँस्कोटा निर्वाचनमा पहिलो पटक उम्मेदवार बन्न लागेकी होइनन्। उनी गएको संसदीय निर्वाचनमा काठमाडौँ क्षेत्र नं १ ‘क’ बाट प्रदेशसभाको उम्मेदवार बनेकी थिइन्। उक्त निर्वाचनमा २७ प्रतिशत अर्थात् चार हजार ३४३ मत ल्याएर उनी तेस्रो भएकी थिइन्।
उनी २०५२/५३ सालमा तत्कालीन प्रधानमन्त्री शेरबहादुर देउवाको मन्त्रीपरिषदमा गृह राज्यमन्त्री रहेका दीपकप्रसाद बाँस्कोटाकी छोरी हुन्। उनका बुवा कांग्रेसको सक्रिय राजनीतिमा थिए। बाँस्कोटा सहकारी आन्दोलनको अभियान्ता पनि हुन्।
समीक्षा सन् २००७ मा कानुनमा स्नाकोत्तर गर्न अमेरिका गएकी थिइन्। त्यही अवधिमा उनले करिब दुई वर्ष डिन्सको फेलोसिप पाएर काम गरिन्।
उनलाई नेपालमै बसेर केही नयाँ काम गर्ने रहर थियो। राजनीतिक परिवारकी उनी बाबुको परम्परागत पार्टीमा बसेर काम गर्न चाहँदैन थिइन्। राजनीति नै गरे पनि नयाँ विकल्प दिनुपर्छ भन्ने सोच थियो।
उनी सन् २०१० मा नेपाल फर्किइन्। आएको एक हप्तामा नै एक निजी बैँकमा कानुनी विभागमा काम गरिन्। केहि समय कानुन व्यवसायी भएर आफ्नै ल फर्म सञ्चालन पनि गरिन्।
उनका बुवाले ३० वर्षअघि सञ्चालनमा ल्याएको नेपालको पहिलो अर्गानिक चिया व्यवसाय सञ्चालनमा उनी पनि संलग्न छिन्। बाँस्कोटा गु्रप अफ इन्डष्ट्रिजको उनी प्रमुख कार्यकारी अधिकृत (सीईओ) हुन्।
तर, नेपाल आएपछि यी काममा मात्र अल्झिरहन सकिनन्। राजनीतिमा लाग्ने हुटहुटी थियो। तर, कुन दलमा लाग्ने भन्ने निर्णय गर्न सकेकी थिइन्। पुरानै ढर्राबाट राजनीति गर्ने सोच थिएन। त्यहीबेला विवेकशील पार्टी ‘राजनीतिको फोहार सफा गर्न’ सक्रिय थियो। त्यस अभियानमा उनको सद्भाव थियो। तर, प्रत्यक्ष सहभागी हुन मन लागिरहेको थिएन।
जब विवेकशील र साझा पार्टीको एकता भयो, उनी उत्साही भइन्। उक्त पार्टीले गर्ने विभिन्न र्याली र जुलुसमा सहभागी हुन थालिन्। तर पनि धेरै समय भने व्यवसायलाई नै दिएकी थिइन्।
व्यवसायमा लाग्दैगर्दा उनलाई अनेक अवरोधले हैरान बनायो। सबै क्षेत्र तहसनहस हुनुमा राजनीति नै प्रमुख कारण मानिन्। उनी भन्छिन्, ‘मूल नै सफा नगरेर बाँकी जति पखाले पनि पनि केहि नहुने रहेछ। त्यसपछि प्रत्यक्ष रुपमा विवेकशील साझाबाट सक्रिय राजनितिमा लागेँ।’
काठमाडौं महानगरपालिका देशको केन्द्र भएकाले यहाँबाट नै काम गरेर उदाहरण पेश गर्नुपर्ने उनी बताउँछिन्। यहाँ राम्रो काम गरे देशैभरि सन्देश जाने उनको भनाइ छ।
उनले पाँच पेज लामो घोषणापत्र जारी गरिसकेकी छन्। त्यसमा सात वटा मूल एजेण्डालाई अघि सारेकी छन्। भ्रष्टाचार नियन्त्रण, सुशासन र सेवा प्रवाह, सुलभ तथा व्यवस्थीत र विद्युतीय यातायात, नेवाः कला संस्कृतिको पुनर्जागरण, खुला क्षेत्रको विस्तार र विकास, नदीनालाको सफाई र पुनर्स्थापना, सफा र व्यवस्थित काठमाडौं, गुणस्तरीय शिक्षा र स्वास्थ्य तथा सामाजिक सुरक्षा उनको एजेन्डा हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772261485.png)
-1772253460.png)
-1764146706.png)
