काठमाडौं– विवेकशील साझा पार्टीले काठमाडौंको मेयर र उपमेयरमा उम्मेदवारी दर्ता गराएको छ। पार्टीले महानगरको मेयरमा समीक्षा बास्कोटा र उपमेयरमा कीर्ति तुलाधरलाई उम्मेदवार बनाएको छ। दुवै उम्मेदवारले राष्ट्रिय सभा गृहमा पुगेर भर्खरै उम्मेदवारी दर्ता गराएका हुन्।
बास्कोटा विवेकशील साझा पार्टी, बागमती प्रदेशकी पूर्वसंयोजक तथा हाल पार्टीको केन्द्रीय कार्य सम्पादन समितिकी सदस्य हुन्।
कीर्ति तुलाधर विवेकशील साझा पार्टीकी केन्द्रीय सदस्य हुन्। उनी नेपाल जेसीजको आजसम्मका तीनजना महिला राष्ट्रिय अध्यक्ष मध्येकी एक हुन्। उनी अन्तर्राष्ट्रिय जेसीजको पनि दक्षिण एशियाबाटै पहिलो महिला उपाध्यक्ष हुन्।
शिक्षा विषयमा स्नातकोत्तर गरेकी ६२ वर्षीय तुलाधर हाल विभिन्न संघ–संगठनको नेतृत्वदायी भूमिकामा छिन्।
यसअघि मेयरमा एक जना र उपमेयरमा एक जनाले उम्मेदवारी दर्ता गराइसकेका छन्।
यसअघि राष्ट्रिय यथार्यवादी पार्टी नेपालले उम्मेदवारी दर्ता गराएको हो। पार्टीका तर्फबाट आनन्दराज जोशीले उम्मेदवारी दर्ता गराएका हुन्।
निर्वाचन आयोगले आज र भोलि दुई दिन उम्मेदवारी दर्ताको समय तोकेको छ। आज बिहान १० बजेदेखि उम्मेदवारी दर्ता गर्न सुरू गरिएको निर्वाचन आयोगले जनाएको छ। देशभरका ७५३ वटै स्थानीय तहमा उम्मेदवारी दर्ता गर्न थालिएको निर्वाचन आयोगका प्रवक्ता शालिग्राम शर्मा पौडेलले बताए।
गत निर्वाचनमा एकै दिन उम्मेदवारी दर्ता गर्न समय अपुग भएकाले यस पटक दुई दिन दिइएको आयोगले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768049575.png)
-1764146706.png)
