काठमाडौं–गृहमन्त्री बालकृष्ण खाणले स्थानीय तह निर्वाचनमा उम्मेदवारको मनोनयनका बेला हुन सक्ने अप्रत्यासित घटना रोक्न गरिएको सुरक्षा तयारीबारे नेपाल प्रहरी र सशस्त्र प्रहरी बलका सातै प्रदेशका प्रमुख र केन्द्रको निर्वाचन हेर्ने सेलका प्रमुखसँग जानकारी लिएका छन्।
मन्त्री खाणले शनिबार दिउँसो नेपाली प्रहरीका निर्वाचन हेर्ने प्रमुख प्रहरी अतिरिक्त महानिरीक्षक सहकुल थापा तथा सशस्त्र प्रहरी बलका प्रहरी नायब महानिरीक्षक चन्द्रप्रकाश गौतमसँग जानकारी लिएका हुन्।
यस्तै, नेपाल प्रहरीका प्रदेश १ प्रमुख नायब महानिरीक्षक अरुणकुमार बिसी, मधेस प्रदेश प्रमुख मसुद आलम खाँ, बागमती प्रदेश प्रमुख पुजा सिंह, गण्डकी प्रदेश प्रमुख दिवस लोहनी, लुम्बिनी प्रदेश प्रमुख नलप्रसाद उपाध्याय, कर्णाली प्रदेश प्रमुख गणेश ऐर र सुदूरपश्चिम प्रदेश प्रमुख मोहन आचार्यसँग निर्वाचनको मनोनयनका बेलाका लागि गरिएको सुरक्षा प्रबन्धबारे जानकारी लिएका हुन्। मधेस प्रदेशका खाँ, बागमती प्रदेशका सिंह, लुम्बिनी प्रदेशका उपाध्याय र सुदूरपश्चिम प्रदेशका आचार्यको प्रदेश प्रमुखका रूपमा शुक्रबारमात्र सरुवा भएको हो।
यस्तै सशस्त्र प्रहरी बलका प्रदेश १ प्रमुख नायब महानिरीक्षक कमलराज गिरी, मधेश प्रदेश प्रमुख गणेश ठाडा मगर, बागमती प्रदेश प्रमुख किशोर प्रधान, गण्डकी प्रदेश प्रमुख शम्भु सुवेदी, लुम्बिनी प्रदेश प्रमुख कुलबहादुर नेम्बाङ, कर्णाली प्रदेश प्रमुख अभि खत्री तथा सुदूरपश्चिम प्रदेश प्रमुख दुर्गाप्रसाद भट्टराईसँग पनि उम्मेदवारी मनोनयनका बेलाको सुरक्षा अवस्थाबारे मन्त्री खाणले जानकारी लिए।
उनीहरुले आफूहरुले उम्मेदवारको मनोनयनका बेला हुने अप्रत्यासित घटनाबारे सतर्क र चनाखो भएर रणनीति बनाउँदै तयारी गरेको जानकारी मन्त्री खाणलाई दिएका थिए।
मन्त्री खाणले पनि पूर्ण रुपमा तयारी भएको जानकारी आफूले पाएको बताए। ‘मैले स्थानीय तह निर्वाचनमा उम्मेदवार मनोनयनका बेलाको सुरक्षा व्यवस्थाको तयारी कस्तो छ भनेर सोधेँ,’ उनले भने, ‘सबै प्रदेश र केन्द्रमा निर्वाचन हेरिरहेका अधिकृतहरूले आफूहरूले पूर्णरूपमा तयारी गरेको जानकारी दिएका छन्।’
उनले त्यसक्रममा स्वच्छ, निष्पक्ष र धाँधलीरहित निर्वाचनका लागि सुरक्षा व्यवस्था चुस्तदुरुस्त बनाउन निर्देशन दिएका थिए। सशस्त्र प्रहरी बलका सुदूरपश्चिम प्रमुख नायब महानिरीक्षक भट्टराईले गृहमन्त्री खाणले उम्मेदवारको मनोनयनका बेलाको सुरक्षा अवस्थाबारे टेलिफोनमार्फत् जानकारी लिएको बताए।
निर्वाचन आयोगले उम्मेद्वारी मनोनयनको समय बैशाख ११ र १२ गते तय गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
