काठमाडौं– स्थानीय तह निर्वाचनको सुरक्षा व्यवस्था मिलाउन गृह मन्त्रालयले निजी हेलिकोप्टरको समेत प्रयोग गर्ने तयारी गरेको छ।
सडक नपुगेका दुर्गम क्षेत्रमा मतपत्र ढुवानी, मतदान क्षेत्रको सुरक्षा प्रबन्ध र मतपेटीका ओसार–पसार गर्न आवश्यक परेको अवस्थामा निजी हेलिकोप्टरको पनि प्रयोग गर्नेगरी तयारी भइरहेको गृह मन्त्रालयका फणिन्द्रमणि पोखरेलले जानकारी दिए।
त्यसको तयारीका विषयमा छलफल गर्न शुक्रबार गृह मन्त्रालयमा सरकारी अधिकारी र वायुसेवा संञ्चालक संघमा आबद्ध विभिन्न एयरलाइन्सका प्रतिनिधिहरूको बैठक बसेको थियो। स्थानीय निर्वाचनलाई स्वच्छ, निष्पक्ष र धाँधलीरहित तरिकाले सम्पन्न गर्न सबै प्रकारको सुरक्षाको चाँजोपाँजो मिलाउनका लागि आवश्यक परेमा हवाई सेवा पनि तत्काल उपलब्ध हुनेगरी तैनाथ अवस्थामा राख्न बैठकमा छलफल भएको गृह मन्त्रालयका प्रवक्ता पोखरेलले जानकारी दिए।
बैठकले ‘स्थानीय तह निर्वाचनका लागि सुरक्षा व्यवस्था मिलाउने प्रयोजनमा हेलिकोप्टर सेवालाई प्राथमिकताका आधारमा प्रयोग गर्ने’ निर्णय गरेको पनि उनले जानकारी दिए।
निर्वाचन सुरक्षामा निजी हेलिकोप्टर प्रयोग गर्दा पालो निर्धारणको विषय वायु सेवा संचालक संघले मिलाएर त्यसको जानकारी गृह मन्त्रालयलाई गराउने निर्णय भएको प्रवक्ता पोखरेलले बताए।
श्री एयरलाइन्ससँग रहेको एमआई–१७ हेलिकोप्टर निर्वाचन प्रयोजनमा प्रयोग गर्न कुनै पनि बखत आवश्यक पर्ने भन्दै मन्त्रालयलाई आवश्यक परेको बखत तुरुन्त सेवा उपलब्ध हुने गरी तैनाथ अवस्थामा राख्ने निर्णय भएको छ।
गृह प्रवक्ता पोखरेलको अध्यक्षतामा भएको बैठकमा मन्त्रालयका उपसचिवद्वय गोमादेवी चेम्जोङ र वसन्त भट्टराई, नेपाली सेनाका महासेनानी संजय देउजा, वायु सेवा सञ्चालक संघका कमलेशकुमार वर्मा र अल्टिच्युड एयर, श्री एयरलाइन्स, सिम्रीक एयर, हेली एभरेस्ट, फिस्टेल एयर, प्रभु हेलिकोप्टर, मनाङ एयर र एयर डाइनेस्टिका प्रतिनिधिको सहभागिता थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1787667029.jpg)
-1786602170.png)
-1786513116.png)
