राजविराज– प्रहरी नायव महानिरीक्षक धिरु बस्न्यातले बलात्कार र आत्महत्याका घटना नियन्त्रण गर्न कार्ययोजना बनाएर कडाइका साथ काम गर्न सप्तरी प्रहरीलाई निर्देशन दिएका छन्।
बलात्कार, बलात्कार प्रयास तथा विष सेवन र झुन्डिएर आत्महत्या गरेका घटना सप्तरीमा धेरै रहेको जानकारी पाएपछि बस्न्यातले यस्ता घटना नियन्त्रणलाई प्राथमिकतामा राख्न निर्देशन दिए।
सप्तरीमा एक वर्षको अवधिमा दर्ता भएका महिला हिंसाका ४ सय ४० घटनामध्ये बलात्कार, विष सेवन र झुन्डिएर आत्महत्या गरेका घटना अधिक रहेको भन्दै उनले महिला विरुद्धका बढ्दो घटनाप्रति चिन्ता व्यक्त गरे। जिल्ला प्रहरी कार्यालय सप्तरीका अनुसार, सप्तरीमा एक वर्षभित्र बलात्कारका ३५ तथा बलात्कार प्रयासका १५ घटना भएका छन्।
बस्न्यातले युनिफर्म अनुसारको आचरण प्रस्तुत गर्न र जनतासँग मिलेर काम गर्न सके मात्रै प्रहरी सफल हुने बताए।
‘चरित्र र युनिफर्म मिलेन भने प्रहरी संगठनको सिद्धान्त व्यवहारमा देखिँदैन’, उनले भने, ‘नागरिक केन्द्रित प्रहरी भन्ने मूल मर्मलाई व्यवहारमा लागू गर्नोस्।’
काम गर्दा शरीर कम र दिमाग बढी चलाउन बस्न्यातले प्रहरीलाई सुझाव दिएका छन्।
‘खोक्रो आश्वासन दिनु र आवश्यकताभन्दा बढी बोझ बोक्नु जरुरी छैन’, उनले थपे, ‘सकेको बोझ मात्र आफू बोक्नोस्, नसकेको बोझ समाजलाई बोकाउनोस्। प्रहरीको व्यवहार सही छ भने समाजले आफ्नो दायित्व बोक्छ।’
सप्तरीका एसपी मुकेशकुमार सिंहले प्रहरी नायव महानिरीक्षकको निर्देशनलाई अक्षरशः पालना गर्ने प्रतिबद्धता जनाए। स्रोत, साधन र क्षमताले भ्याएसम्म अपराध हुन नदिने र भएका घटनामा पीडितलाई न्याय तथा पीडकलाई सजाय दिलाउने कुरामा कुनै कसर बाँकी नराख्ने उनको भनाइ छ।
प्रहरी नायव महानिरीक्षक बस्न्यात जिल्ला प्रहरी कार्यालय सप्तरीको हाताभित्र निर्मित महिला तथा बालबालिका सेवा केन्द्रको नवनिर्मित भवन उद्घाटन गर्न आइतबार राजविराज आएका हुन्। १ करोड ३२ लाख ३६ हजारको लागतमा निर्मित १७ कोठाको ३ तले भवन निर्माणमा एडिबीले सहयोग गरेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
