काठमाडौं– प्रमुख निर्वाचन आयुक्त दिनेशकुमार थपलियाले निर्वाचनको मौन अवधिभर मदिरा बिक्रीवितरण रोक्न आग्रह गरेका छन्। आयोगले ४८ घन्टा देशभर मदिरा बिक्रीवितरण बन्द गर्न प्रस्ताव नै गरेको भन्दै उनले यसले निर्वाचनमा हुने खर्च कम गर्नेदेखि अनावश्यक चलखेल र गलत अभ्यास रोकिने बताए।
‘मौन अवधि भनेको चुप बस्ने समय नै हो, तर हामीले त्यसलाई हामीले चलायमान गर्न खोज्यौं,’ प्रमुख आयुक्त थपलियाले भने, ‘मादक पदार्थ सेवन बन्द गर्न हामीले आग्रह गर्छौं किनभने त्यसले मौन अवधि चलायामान गराउने छैन। यसरी ४८ घन्टा देशभर त्यो बन्द गर्दा निर्वाचन सम्भव हुन्छ।’ सबै राजनीतिक दलहरुको सुझावमा मनोनयन दर्ता २ दिन र प्रचारको अवधि १५ दिनबाट घटाएर ११ दिनको व्यवस्था गरेका उनले स्पष्ट पारे।
राजधानीमा आयोजित पत्रकारसँगको अन्तरक्रियामा उनले आयोगले गरेका नयाँ व्यवस्था सुधारका कार्ययोजना बनाएर र सवै सरोकारवालासँग छलफल गरेर निर्णय लिएको दावी गरे। ‘सामाजिक सञ्जाल प्रयोग नगरी पनि नहुने फेरि कतै दुरुपयोग हुन्छ कि भन्ने पनि रह्यो,’ उनले भने, ‘यसका लागि केही आचारसंहिता जारी भएका छन् त्यो सवैले पालना गर्नुपर्छ।’
सबैको सहयोगमा निर्वाचन सम्पन्न गर्न सहज हुने उनले बताए। वैशाख ३० गतेको निर्वाचनका लागि अब २४ दिनमात्र बाँकी रहेको र आयोग अन्तिम तयारीमा रहेको उनले बताए। वैशाख ८ गते ७५३ स्थानीय तहमा निर्वाचन अधिकृतको कार्यालय स्थापना गर्ने तयारीमा रहेको उनले बताए।
‘स्थानीय तहको निर्वाचनको तयारी चरण पूरा गर्दैछौं। स्थानीय तहपछि अन्य चुनावको पनि तयारी आयोगले समयमै थालनी गर्छ,’ उनले भने, ‘आयोगले अहिलेदेखि नै यही योजना बनाएर काम अघि बढाएको छ।’ उनले सातै प्रदेशमा आयोगले मिडियासँग अन्तरक्रिया कार्यक्रम गरिसकेको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769505102.png)
-1764146706.png)
