काठमाडौं– नेपाली कांग्रेसका सांसद बद्री पाण्डेले नेपाल संस्कृत विश्वविद्यालयका उपकुलपति कुलप्रसाद कोइरालालाई त्रिभुवन अन्तर्राष्ट्रिय विमानस्थलमा सरकारले धरपकड गरेको भन्दै आपत्ति जनाएका छन्। राष्ट्रियसभा बैठकमा बोल्दै पाण्डेले विमानस्थलबाट पक्राउ गरी उपकुलपति कोइरालालाई प्रधानमन्त्री निवासमा बन्धक बनाउने गरी सरकार निरंकुश भइसकेको हो? भनी प्रश्न गरेका छन्।
विश्व संस्कृति सम्मेलनमा शनिबार क्यानडा जान लागेका उपकुलपति कोइरालालाई विमानस्थलबाट प्रहरीले बालुवाटार ल्याएको थियो। सांसद पाण्डेले किन र कसको आदेशमा कोइरालालाई पक्राउ गरिएको संसदमा जानकारी गराउन माग गरे।
‘टोलीसहित क्यानडा जान लागेका मध्ये कोइरालाबाहेक अन्य ६ जना भने क्यानडा गएको तर उनलाई मात्र बिनाअपराध किन पक्राउ गरिएको हो,’ उनले भने, ‘के सरकार यति निरंकुश भइसकेको हो, बिनाअपराध कसैको लहडमा अन्तर्राष्ट्रिय सम्मेलनमा जान लागेका उपकुलपतिलाई पक्राउ गरी छोडिन्छ?’
पाण्डेले उपकुलपतिलाई प्रधानमन्त्रीसँग काम रहेको भनी विमानस्थलबाट पक्रउ गरी बालुवाटारमा थुनेर बन्धक बनाउने काम लोकतान्त्रिक पद्धतिविरुद्ध रहेको बताए।
‘सरकारको यस्तो कार्यले नेपालको आफ्नो छवि अन्तर्राष्ट्रियस्तरमा समेत धुमिल भएको छ,’ पाण्डेले भने, ‘क्यानाडा गएर नेपालको संस्कृतिबारे ज्ञान वितरण गर्ने कार्यमा बाधा गर्नु सरकारको निरंकुशता हो।’
सरकारको अनुमतिबिना विश्व संस्कृति सम्मेलनमा भाग लिन क्यानाडा जान लागेको भन्दै कोइरालालाई शनिबार बेलुकी ८ बजे विमानस्थलबाट पक्राउ गरी प्रधानमन्त्री निवास बालुवाटार लगिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
