काठमाडौं– शनिबार राजधानीमा भएका २ दुर्घटनामा ३ जनाको मृत्यु भएको छ।
बौद्ध माङ्कालचोकस्थित सडकमा बा.५७ प ५७०५ र बा.९०प ३२८३ नम्बरको मोटरसाइकल शनिबार एकआपसमा ठोक्किदा भएको दुर्घटनामा बुबा–छोरीको मृत्यु भएको छ।
बा.९० प ३२८३ नम्बरको चालक चुच्चेपाटी बस्ने ४८ वर्षीय कुमार श्रेष्ठ र उनकी ४ वर्षीया छोरी रिया श्रेष्ठको सो दुर्घटनामा मृत्यु भएको हो।
दुर्घटनामा गम्भीर घाइते भएका कुमारको नेपाल मेडिकल कलेज अत्तरखेल र रियाको ओम अस्पताल चाबहिलमा उपचारको क्रममा मृत्यु भएको प्रहरीले जनाएको छ।
दुर्घटनामा बा.५७ प ५७०५ नम्बरको मोटरसाइकल चालक बौद्ध शान्ति टोल बस्ने २० वर्षीय जीवन गुरुङ र चाबहिल गणेशस्थान बस्ने महोत्तरी खैरमाराका २१ वर्षीय सुजन कटुवाल समेत गम्भीर घाइते भएकोले उपचारको लागि ओम अस्पताल पठाइएको प्रहरीले जनाएको छ।
त्यस्तै भोटाहिटी चोकमा भएको दुर्घटनामा एकको मृत्यु भएको छ। ना.७ ख ३५२० नम्बरको रोकी राखेको ट्रकमा बा.५८ प ६४५९ नम्बरको मोटरसाइकल ठोकिएर दुर्घटना हुँदा मोटरसाइकलमा सवार चालक भक्तपुर मध्यपुर ठिमी नगरपालिका–१० बस्ने २६ वर्षीय नरम बन र २३ वर्षीय मुरारी झा घाइते भएकोले उपचारको लागि बीर अस्पताल पठाइएकोमा नरम बनको उपचारको क्रममा मृत्यु भएको छ। ट्रक चालकलाई प्रहरीले नियन्त्रणमा लिएको छ।
शनिबार लाजिम्पाट र शंकखुलमा पनि दुर्घटना भएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
