बुटवल– रुपन्देहीको कञ्चन गाउँपालिका–५ की १६ वर्षीया एक किशोरीको एक साताभन्दा बढी समय उपचारपश्चात् ज्यान गएसँगै उनको हत्या भएको अरोप लगाइएको छ।
गएको असार १० गते आफ्नै घरमा सुतेको अवस्थामा समीक्षा ठकुरीको बिहान करिब २ः३० बजेको समयमा शरीरमा आगो लागेर चिच्याएपछि उनलाई तत्काल उपचारार्थ अस्पताल पुर्याइएको थियो। समीक्षाको शरीरमा बाबु तेजबहादुर ठकुरीसहित घर परिवारका अन्य सदस्यले मट्टितेल छर्केर आगो लगाएर हत्या गरिएको आरोप उनकी आमा माया थापाले लगाएकी छिन्।
समीक्षाको मृत्युपश्चात् मृतककी आमा माया थापाले इलाका प्रहरी कार्यालय सालझण्डीमा ३४ वर्षीय श्रीमान् तेजबहादुर, हजुरआमा ६४ वर्षीया हरिकला र बुटवल उपमहानगरपालिका– २ बस्ने फुपुहरु मधु ठकुरी थापा र अमृता ठकुरी थापाविरुद्ध किटानी जाहेरी दिएको इलाका प्रहरी कार्यालय सालझण्डीका प्रहरी निरीक्षक दिपेश बस्यालले जानकारी दिए।
घटना भएको रात उनीहरुमध्ये मधु ठकुरी थापा मृतकको घरमा बसेकी थिइन् भने अमृता भने नरहेको प्रहरीले जनाएको छ। घटनालगत्तै उनलाई उपचारार्थ लुम्बिनी अञ्चल अस्पताल बुटवल हुँदै मिसन अस्पताल पाल्पा लगिएको थियो। मिसन अस्पतालमा पनि उपचार हुन नसकेपछि कीर्तिपुरस्थित वर्न अस्पतालमा ल्याइएकोमा उनको उपचारका क्रममा यही असार २० गते बिहान मृत्यु भएको प्रहरी निरीक्षक बस्यालले जानकारी दिए।
प्रहरीका अनुसार मृतक समीक्षा जन्मिएको नौ महिनामा आमा मायाले दोस्रो विवाह गरेपछि उनी आमासँग तथा मामाघरमा बस्दै आएकी थिइन्। उनी विगत ६ महिनाअघि मात्र आफ्ना परिवारसँग बस्न थालेकी हुन्। उनी स्थानीय पिसल्याण्ड भूपूसैनिक पब्लिक बोर्डिङ स्कूलमा कक्षा १० मा अध्ययनरत थिइन्। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
