काठमाडौं– नेपाली कांग्रेसले स्थानीय तहको निर्वाचनलाई लक्षित गर्दै सञ्चालन गरिएको 'घर–घर जाऔँ, कांग्रेस जिताऔँ' अभियानले निर्वाचनको वातावरण बनाउन सफल भएको दाबी गरेको छ।
फागुन २९ गतेदेखि सुरु भएर आज (मंगलबार) सकिएको अभियान देशका सातै प्रदेश, ७७ जिल्ला, ७५३ पालिका र तिनका सबै ६ हजार ७४३ वडामा उत्साहका साथ व्यापक जनसहभागितामा सञ्चालन भएर सफलताका साथ सम्पन्न भएको कांग्रेसले जनाएको छ।
अभियानका उपलब्धिबारे जानकारी दिन आज पार्टी केन्द्रीय कार्यालयमा आयोजित पत्रकार सम्मेलनमा प्रवक्ता डा प्रकाशशरण महतले अभियानका उद्देश्य पूरा भएको बताए। पार्टीले अभियान सञ्चालनका क्रममा ७७ जिल्लामै केन्द्रीय प्रतिनिधि खटाएको थियो।
अभियानको क्रममा कांग्रेसका हरेक तहका सङ्गठन परिचालित भएको उल्लेख गर्दै प्रवक्ता महतले पार्टीका सबै तहका कार्यसमिति, भ्रातृ तथा शुभेच्छुक संस्थाका पदाधिकारी र सदस्य सक्रियरुपमा परिचालित भएको जानकारी दिए। अभियानकै क्रममा टोल टोलमा समिति गठन भएको पनि महतको भनाइ छ।
प्रवक्ता महतले पार्टीको अभियान स्थानीय निर्वाचनको माहोल बनाउन अत्यन्त सफल भएको दाबी गरे। कांग्रेसको १४औं महाधिवेशनका बेलाको प्रतिस्पर्धाले सिर्जना गरेको आपसी मतभेदलाई मेटाउँदै अभियानअन्तर्गत सबै तहका नेता कार्यकर्ता मतदाताको घरघरमा पुगेको समेत प्रवक्ता महतले जानकारी दिए।
कांग्रेसको नेतृत्वमा रहेको सरकार र स्थानीय सरकारले गरेका कामको बारेमा स्थानीय नागरिकलाई विस्तारमा जानकारी दिने काम अभियानअन्तर्गत भएको छ। संविधान बचाउन कांग्रेसले अन्य दलको अनुरोधमा सरकारको नेतृत्व सम्हाल्ने अवस्था आएको कुरा जनतालाई बुझाउन अभियान सफल भएको कांग्रेसको भनाइ छ।
'सबैभन्दा लामो इतिहास भएको र प्रजातन्त्रको स्थापना, पुनःस्थापना र विकासमा समर्पित रहँदै आएको कांग्रेसबाट मात्रै देशको लोकतन्त्र र संविधान सुरक्षित रहन सक्छ। कांग्रेस विश्वका सबै मुलुकले पत्याएको पार्टी हो भन्ने सन्देश जनताबीच पुर्याउन यो अभियान सफल छ,' महतले भने।
अभियानको क्रममा घरघरमा पुगेर नेता कार्यकर्ताले स्थानीय जनताका पिर मर्का, गुनासो र समस्या सुन्नुका साथै सङ्कलन गरेका कांग्रेसले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1775575666.png)
