बुटवल– बुटवल उप–महानगरपालिकाले एक महिलाको तथ्याङक संकलन गरेको छ। उक्त तथ्याङक अनुसार उप–महानगरपालिकामा ३ हजार ८ सय ४० एकल महिला रहेका छन्।
सोही तथ्यांकअनुरुप उप–महानगरले नगरका एकल महिलाहरुका लागि सीपमूलक र आयमूलक कार्यक्रमहरु सञ्चालन गर्ने नगर प्रमुख शिवराज सुवेदीले बताए।
नगर क्षेत्रमा रहेका एकल महिलाहरुको विस्तृत विवरणसहितको तथ्यांक समाग्री बुझ्दै प्रमुख सुवेदीले उनीहरुका साझा समस्याहरुलाई पहिलो प्राथमिकता दिंदै सोही अनुरुपका कार्यक्रमहरु तय गरिने प्रतिवद्धता जनाए। मानव अधिकारमैत्री समाज निर्माणमा आफुहरु केन्द्रित हुने उल्लेख गर्दै प्रमुख सुवेदीले यसका लागि पनि नागरिक समाजको सहकार्य जरुरी रहेको धारणा राखे।
‘एकल महिलाका समस्या तथा उनीहरुको हकहितका बारेमा जनचेतना फैलाउने र उनीहरुलाई आत्मनिर्भर बनाउने खालका कार्यक्रमको तयारी उपमहानगरले गरिरहेको छ।’, प्रमुख सुवेदीले भने।
उपप्रमुख गुमादेवी आचार्यले नगरलाई लैंगिक हिंसामुक्त बनाउने अभियान स्वरुप महिलाहरुमा आर्थिक, सामाजिक अधिकारका क्षेत्रमा पनि विशेष कार्यक्रम सञ्चालन गरिने बताइन्। उनले एकल महिलाहरुले भोग्नुपरेका विद्यमान समस्याहरुको पहिचान गर्दै समाधानका उपायहरु खोज्नुपर्नेमा जोड दिइन्।
‘महिलाहरु आधारभुत आवश्यकता र सुविधाहरुबाट वञ्चित रहनु नपर्ने गरी योजनाबद्ध कामको थालनी भएको छ।’, उपप्रमुख आचार्यले भनिन्, ‘विभेद र साझा सरोकारका विषयमा सहकार्यका साथ कार्यक्रम सञ्चालन गरिने छ।’
उप–महानगरपालिकाको सहयोगमा मानवअधिकारका लागि एकल महिला समूहले नगरभरीका एकल महिलाहरुको तथ्यांक संकलन गरी नगरप्रमुख र उपप्रमुखलाई बुझाएको हो। समूहका रहेका ९ जना महिलाहरुले गत बैसाख १ गतेदेखि नगरमा रहेका एकल महिलाहरुको तथ्यांक संकलनको काम सुरु गरेको समूहकी अध्यक्ष पवित्रा खनालले जानकारी दिइन्।
प्रत्येक वडामा पुगेर घर परिवारलाई भेटेर एकल महिलाको विवरण संकलन गरिएको बताउँदै समूहकी सचिव नारायणी पाटा मगरले एकल महिलाहरुका समस्याहरुसमेत अभिलेखमा समावेश गरिएको बताइन्।
सो क्रममा नगरमा १८ देखि १ सय ७ वर्ष उमेर समूहका एकल महिलाहरु भेटिएको उनले जानकारी दिइन्।
सबैभन्दा धेरै एकल महिला वडा नम्बर ११ र थोरै वडा नम्बर ४ मा रहेका छन्। मगरका अनुसार वडा नम्बर ११ मा ८ सय ८५ जना र ४ नम्बर वडामा ६३ जना एकल महिला रहेका छन्।
एकल महिलाहरुमा आर्थिक अवस्था कमजोर रहेको, अंशवण्डा नपाउने, नागरिकता बनाउन समस्या हुने, छोराछोरीलाई छात्रवृति, शिक्षा, स्वास्थ्य, रोजगारीलगायत साझा समस्या रहेको अभिलेखमा समेटिएको छ।
उक्त तथ्यांकले योजना निर्माणमा महत्वपूर्ण सहयोग पुग्ने उपमहानगरको विश्वास छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1772271039.png)
