काठमाडौं– सत्तारुढ गठबन्धनले स्थानीय तहको निर्वाचनमा तालमेले गरेर जाने सैद्धान्तिक सहमति गरेको छ। प्रदेश, जिल्ला र पालिकास्तरका समिति (कमिटीहरु)ले त्यसलाई अंगिकार गर्ने कोसिस गरिरहेका छन्।
तर, सबै ठाउँमा 'सोलोडोलो' तालमेले हुन नसक्ने प्रारम्भिक संकेत देखिन थालेका छन्। दलहरुका केही स्थानीय समितिले तालमेल अस्वीकार गरेका छन् भने कतिपय प्रदेश र जिल्लामा कुनै दललाई छुटाइएको छ।
विराटनगरमा कांग्रेसद्वारा गठबन्धन अस्वीकार
नेपाली कांग्रेस विराटनगर महानगर समितिले आगामी स्थानीय तहको निर्वाचनमा गठबन्धन नगर्ने निर्णय गरेको छ। शुक्रबार बसेको महानगर कार्यसमिति बैठक विराटनगर महानगरमा जित्नका लागि कांग्रेसलाई तालमेलको आवश्यकता नरहेको निष्कर्षसहित गठबन्धन नगर्ने निर्णयमा पुगेको हो।
तालमेलको विपक्षमा रहेका कांग्रेस नेता डा शेखर कोइरालाको प्रभाव क्षेत्र रहेको उक्त महानगर समितिले एक्लै जित्ने भएकाले भाग दिन अस्वीकार गरेको हो। अन्य स्थानीय पालिकामा पनि कांग्रेसले एक्लै चुनाव लड्ने तयारी गरिरहेको बताइएको छ।
गएको निर्वाचनमा कांग्रेसले मोरङमा मेयरसहित ८ वडामा जित हासिल गरेको थियो। कांग्रेसले एक्लै चुनाव लड्ने निर्णय गरेपछि सत्ता गठबन्धनका अन्य दलहरु माओवादी केन्द्र, एकीकृत समाजवादी र जसपाले अर्को गठबन्धन बनाउने तयारी गरेका छन्। कांग्रेसले अस्वीकार गर्दा तीन पार्टी गठबन्धन गरेर चुनावी मैदानमा होमिने भएका हुन्।
लुम्बिनीमा छुट्यो एकीकृत समाजवादी
स्थानीय तह निर्वाचन २०७९ मा गठबन्धन गरेर जाने निर्णय गर्ने क्रममा लुम्बिनी प्रदेशमा भने एकीकृत समाजवादी छुटेको छ। सत्ता गठबन्धनका अन्य चार दलले भने मिलेरै चुनाव लड्ने ६ बुँदे सहमति गरेका छन्।
लुम्बिनी प्रदेशका कांग्रेस सभापति अमरसिंह पुन, नेकपा माओवादी केन्द्रका प्रदेश संयोजक शुदर्शन बराल, जनता समाजवादी पार्टीका अध्यक्ष अशोककुमार यादव र राष्ट्रिय जनमोर्चाका अध्यक्ष बद्रि आलमले सहमति पत्रमा हस्ताक्षर गरेका छन्।
त्यसअघि गुल्मीमा भएको पालिका भागबन्डामा एकीकृत समाजवादीका साथै अन्य दुई दल छुटेका छन्। गुल्मीका १२ पालिकामध्ये ८ मा कांग्रेस र ४ वटामा माओवादी केन्द्रले प्रमुख पाउने आन्तरिक सहमति दुई दलका जिल्लास्तरका नेताहरु बसेर गरिसकेका छन्।
कञ्चनपुर १ मा कांग्रेसद्वारा तालमेल अस्वीकार
कञ्चनपुरको प्रतिनिधि सभा निर्वाचन क्षेत्र नम्बर १ मा नेपाली कांग्रेसले चुनावी तालमेल नगर्ने बताएको छ।
देशभर सत्तागठबन्धनका दलहरुबीच स्थानीय तह निर्वाचनमा चुनावी तालमेल गर्ने केन्द्रको निर्णयको विरोध गर्दै सो क्षेत्रमा कांग्रेसले एक्लै चुनाव लड्न सक्षम रहेको क्षेत्रीय सभापति गोपीप्रसाद उपाध्यायले बताएका छन्।
यसअघि बिहीबार सम्पन्न सत्तारूढ गठबन्धनको जिल्लास्तरीय बैठकले भने स्थानीय तहको निर्वाचनमा आपसी तालमेल गरेर अगाडि बढ्ने निर्णय गरेको थियो।
जिल्लाको उक्त निर्णयको विपक्षमा रहँदै क्षेत्रीय सभापति र सचिवले जिल्लाको निर्णय अस्वीकार गर्ने भन्दै विज्ञप्ति निकालेका हुन्। उक्त क्षेत्रमा कांग्रेस एक्लै चुनाव लड्न सक्षम रहेको र गठबन्धन आवश्यक नरहेको उनीहरुको भनाइ छ।
कपिलवस्तु नगरपालिकामा पनि कांग्रेस एक्लै
नेपाली कांग्रेस कपिलवस्तु नगर कार्य समितिले केही दिन अघि बैठक बसेर उक्त पालिकामा गठबन्धन नगर्ने निर्णय गरेको छ । नगर कार्यसमितिका साथै १२ वटै वडामा वडा समिति अध्यक्षले गठबन्धन गर्न नहुने अडान राखेपछि उक्त निर्णय भएको बताइएको छ।
कांग्रेस एक्लैले नगरपालिकाभरि जित हासिल गर्न सक्ने भएकाले अरुलाई भाग नदिने निर्णय गरिएको हो। यो निर्णयपछि अन्य दलका स्थानीय नेताहरुले विरोध जनाइरहेका छन्।
नुवाकोटमा जसपालाई उपेक्षा
नुवाकोटमा कांग्रेस, मावादी केन्द्र र एकीकृत समाजवादीले गठबन्धन गर्ने निर्णय गरे। सत्ता गठबन्धनका दुई घटक जनता समाजवादी पार्टी (जसपा) र राष्ट्रिय जनमोर्चालाई नुवाकोटमा छुटाइएको छ। आफ्नो पार्टीलाई उपेक्षा गरिएको भन्दै जसपाका संघीय परिषद् अध्यक्ष बाबुराम भट्टराईले असन्तुष्टि पोखिसकेका छन्।
गठबन्धनका दलहरुले वैशाख ३० को निर्वाचनमा एकमत भएर जाने सहमति गर्दा जसपालाई त्यहाँ कुनै जानकारी नगराइएको उनको संकेत छ।
उनी भन्छन्, 'जुनसुकै स्थान र तहमा गठबन्धनको जिम्मेवार घटक जसपालाई उपेक्षा, अपमान र निषेध गर्ने हर्कत जोकसैले गरेपनि त्यो स्वीकार्य हुन्न। गठबन्धनको धर्म र मर्यादा सबैले इमान्दारितापूर्वक पालना गरौं। कुनै छलछाम नगरौं।'
उनले राजनीतिमा सबै कुरा करबलले नभइ स्वेच्छाले हुन्छ भन्ने कुरा नभुल्न सम्झाएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
