कमल थापा, फाइल तस्बिर
काठमाडौं– राप्रपा नेपालका अध्यक्ष कमल थापाले आफ्नो पार्टी नेकपा एमालेकै चुनाव चिह्न लिएर आगामी स्थानीय तहको निर्वाचनमा जान इच्छुक रहेको बताएका छन्। आफ्नो पार्टीबाट स्थानीय तहको उम्मेदवारमा आकांक्षा देखाएकाहरुले एमालेको चुनाव चिह्न प्रयोग गर्नुपर्ने भनेर सुझाव दिएको थापाको भनाइ छ।
शुक्रवार काठमाडौंमा आयोजित स्थानीय तह निर्वाचन घोषणापत्र तथा चुनाव चिन्ह सार्वजनिकीकरण कार्य्रममा बोल्दै अध्यक्ष थापाले स्थानीय तहको निर्वाचनका लागि नेकपा एमालेसँग सहकार्य गर्ने कुरा प्रारम्भिक चरणमा सम्पन्न भएको समेत जानकारी दिए।
आफ्नो पार्टीका स्थानीय तहमा उठ्ने नेता तथा कार्यकर्ताहरुले नेकपा एमलेसँग मिलेर सहकार्य र तालमेल गरेर अघि बढ्न भनेर आग्रह गर्नेगरेको थापाले सुनाए। नेकपा एमालेसँग स्थानीय तहको निर्वाचनमा तालमेल हुँदा एमालेकै चुनाव चिह्न लिएर उठ्ने धारणा पार्टीको भएको थापाको भनाइ छ।
‘राप्रपा नेपालले आगामी स्थानीय तहको निर्वाचनमा विभिन्न राजनीतिक दलहरुसँग सहकार्य र तालमेल गर्ने नीति लिएको छ। यस क्रममा नेकपा एमालेसँग प्रारम्भिक चरणको कुराकानी भइसकेको छ। र, नेकपा एमाले सँगको सहकार्यलाई हामीले उच्च प्राथमिकता दिने नीति लिएका छौँ,' थापाले भने।
थापाले एमालेका केन्द्रीय तहका नेताहरुसँग छलफल गरेर तालमेलबारे छिट्टै निष्कर्षमा पुग्ने थापाको भनाइ छ। 'नेकपा एमालेका केन्द्रीय तहका नेताहरुसँग हामी छिटै नै दुईपक्षीय कुराकानी गरेर निष्कर्षमा पुर्याउने छौँ। र, हाम्रो पार्टीको स्थानीय तहका साथीहरुले आफ्ना समकक्षी नेकपा एमालेका साथीहरुसँग कुराकानी गरेर सकेसम्म स्थानीय तहमा समझदारी कायम गर्ने प्रयास गर्नुहुनेछ,' थापाले भने।
अध्यक्ष थापाले नेपाललाई हिन्दू राष्ट्र कायम गर्ने बारेमा राष्ट्रिय सहमति हुनुपर्ने पनि बताए। हिन्दू राष्ट्र कायम गर्ने बारेमा राष्ट्रिय सहमति नभएमा धर्म निरपेक्षता राख्ने वा हिन्दू राष्ट्र कायम गर्ने भन्ने बारेमा जनताको प्रत्यक्ष अभिमत बुझ्न आगामी संसदीय चुनाव सँगसँगै राष्ट्रिय जनमत संग्रह गर्नुपर्ने थापाको माग छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
