काठमाडौं- लोकतान्त्रिक समाजवादी पार्टीका कार्यकारिणी समिति सदस्य केशव झाले यसअघि पार्टीका तर्फबाट निर्वाचित भए पनि राम्रो प्रदर्शन नगरेका र भ्रष्टाचारमा लिप्त भएकाहरुलाई पुनः उम्मेदवार बनाउन नहुने धारणा राखेका छन्।
स्थानीय तहको चुनावी प्रयोजनको निम्ति लोसपाले बिहीबार सबै जिल्लामा आयोजना गरेको केन्द्रीय पर्यवेक्षकको उपस्थिति सहितको विस्तारित बैठकका लागि रौतहट पुगेका उनले सो धारणा राखेका हुन्। बैठकमा उनले यसपटक पार्टीका तर्फबाट अघिल्लो पटकको भन्दा बढी जित्ने दाबी गरे।
'अघिल्लो पटकको चुनावमा हाम्रो पार्टीले मधेस प्रदेशमा मात्रै भाग लिने अवसर पायो। तर, यसपटक हामी देशभर चुनाव लड्दै छौं। अघिल्लो पटकभन्दा बढी सिट जित्ने छौं', उनको भनाइ छ।
अहिले लोसपा बनेको पार्टी २०७४ सालको निर्वाचनमा राजपाको नाममा थियो। सो पार्टीले पहिलो र दोस्रो चरणमा भएको निर्वाचन बहिस्कार गरेको थियो। २०७४ असोज २ गते मधेस प्रदेशमा भएको निर्वाचनमा मात्रै भाग लिएको थियो।
झाले स्थानीय तहको निर्वाचनमा केन्द्रीय स्तरबाट गठबन्धन गर्नुको कुनै अर्थ र औचित्य नभएको बताए। स्थानीय तहमै आवश्यकता र औचित्यको आधारमा चुनाव जित्ने गरी गठबन्धन गर्न पार्टीपंक्तिलाई उनको आग्रह छ।
त्यस्तै, उनले आफूहरुको पार्टी मिसनमा रहेको पार्टी भएको बताउँदै आफूहरुको लागि राजनीतिक मुद्दा र विकास निर्माणका कुरा दुवै महत्त्वपूर्ण हुने बताए। सरकारमा सहभागिताको विषय आफूहरुको लागि महत्त्वपूर्ण नभएको तर आफूहरुले उठाउँदै आएको माग मुद्दाहरुको सम्बोधन भयो भने जान सकिने उनको धारणा छ।
बैठकमा वडा र पालिकाबाट सम्भावित उम्मेदवारको सूची सिफारिस गर्ने 'मोडालिटी'माथि छलफल गरिएको छ। चैत्र २८ गतेसम्म सबै जिल्लाले प्रत्येक पालिकाको लागि प्रमुख र उपप्रमुखको नाम सिफारिस गर्नुपर्ने छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
