काठमाडौं– सोमबार प्रमुख प्रतिपक्ष नेकपा एमालेको केन्द्रीय कार्यालय पुग्दा उपमहासचिवद्वय प्रदीप ज्ञवाली र विष्णु रिमाल घोषणापत्र तयार गर्ने काममा व्यस्त थिए। वैशाख ३० गते हुने स्थानीय तहको निर्वाचनमा पार्टीलाई विजयी गराउने अजेण्डा छनोट गर्ने चटारो थियो दुवै नेतालाई।
पार्टीको स्कूल विभाग प्रमुख समेत रहेका ज्ञवालीले आफूहरु स्थानीय तह निर्वाचनका लागि देशदौडाहा सँगै घोषणापत्र निर्माणमा पनि केन्द्रित रहेको बताए।
वैशाख ३० गते हुने स्थानीय तहको निर्वाचनका लागि राजनीतिक दलहरुले केन्द्रबाट 'प्रमुख' घोषणापत्र जारी गर्ने तयारी गरेका छन्। स्थानीय तहका सरोकार र मुद्दाहरु समेटेर उम्मेदवारले पनि छुट्टै घोषणापत्र बनाउनेछन्। नेकपा एमालेको घोषणापत्र लेखनमा सक्रिय एक नेताका अनुसार पार्टी केन्द्रले बनाउने घोषणापत्रमा नीतिगत विषय बढी हुनेछन्।
संघीय संसद्को सबैभन्दा ठूलो तथा २०७४ को निर्वाचनमा सबैभन्दा बढी स्थानीय तह जितेको दल एमालेले स्थानीय तह निर्वाचनका लागि घोषणापत्र लेख्न चैत १० गते ११ सदस्यीय समिति गठन गरेको थियो। वरिष्ठ उपाध्यक्ष ईश्वर पोखरेल नेतृत्वको समितिमा अन्य १० जना सदस्यहरु छन्।
नेकपा एमालेले चैत मसान्तभित्र घोषणापत्रको अन्तिम मस्यौदा पार्टीको केन्द्रीय सचिवालयमा पेस गर्न भनेको छ।
यस्तै, सत्तारुढ गठबन्धनको प्रमुख दल नेपाली कांग्रेसले सोमबार मात्रै २८ सदस्यीय घोषणापत्र मस्यौदा समिति गठन गरेको छ। महामन्त्री गगन थापा नेतृत्वको घोषणापत्र मस्यौदा समितिमा महिला, जनजाती, स्थानीय तहका प्रतिनिधि, विज्ञसहितलाई समावेश गरिएको छ।
नेकपा एमालेको घोषापत्र मस्यौदा समितिमा १ जना मात्रै महिला प्रभा बराल सदस्य छिन्। उनी राप्ती नगरपालिका प्रमुख समेत हुन्।
कांग्रेसको घोषणापत्र मस्यौदा समितिमा भने ७ जना महिला अटाएका छन्। आरजु राणा देउवा, कान्तिका सेजुवाल, हरिप्रभा खड्गी, उमा थापा मगर, इन्द्रा अधिकारी, ममता महतो र शिलशिला आचार्य समिति सदस्यका रुपमा समेटिएका छन्।
कांग्रेसले घोषणापत्र मस्यौदा समितिमा देशभरका ९ वटा नगरपालिका प्रमुख/उपप्रमुखलाई समेटेको छ। उक्त समितिमा काठमाडौं महानगरपालिको उपमेयरदेखि पटेर्वा सुगौली गाउँपालिकाको उपाध्यक्षसम्म समेटिएका छन्।
माओवादी र एकीकृत समाजवादीको छैन तयारी
स्थानीय तहको निर्वाचन प्रयोजनका लागि ७९ वटा राजनीतिक दल निर्वाचन आयोगमा दर्ता भएका छन्। जसमध्ये नेकपा एमाले, नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी र लोकतान्त्रिक समाजवादी मात्रै राष्ट्रिय दलको मान्यता प्राप्त दल हुन्।
प्रमुख दुई पार्टी एमाले र कांग्रेसले स्थानीय तहको निर्वाचनका लागि घोषणापत्र लेख्न तयारी सुरु गरिसके पनि अरु प्रमुख दलहरुले भने घोषणापत्र समिति समेत बनाएका छैनन्। सत्तारुढ गठबन्धनमै रहेका नेकपा माओवादी केन्द्र र एकीकृत समाजवादीले घोषणापत्र लेख्न छलफल समेत चलाएका छैनन्।
नेकपा एमाले विभाजन गरेर बनेको नेकपा एकीकृत समाजवादीका लागि आगामी स्थानीय तहको निर्वाचन पहिलो निर्वाचन हो। नेकपा एमालेको नेतृत्व सम्हालिसकेका माधव कुमार नेपाल अध्यक्ष रहेको उक्त पार्टीले स्थानीय तहको निर्वाचनका लागि के–कस्ता अजेण्डा तय गर्छ भन्ने विषयमा सबैको चासो छ। तर, पार्टीले स्थानीय तहको निर्वाचनका लागि अहिलेसम्म कुनै ठोस अजेण्डा तय गरिसकेको छैन।
संविधानअनुसार संघीयता कार्यान्वयन भएर देशमा पहिलोपटक स्थानीय तहको निर्वाचन हुँदा नेकपा माओवादी केन्द्रको सरकार थियो। २०७४ वैशाखमा पहिलो चरणको निर्वाचन हुँदा माओवादी केन्द्रले 'गाउँगाउँमा सिंहदरबार'लाई आफूहरुको प्रमुख अजेण्डा बताउने गर्थ्यो। अहिले संघीय संसद्मा तेस्रो पार्टीको हैसियतामा रहेको उक्त दलले स्थानीय तहका लागि ठोस अजेण्डा तय गर्न सकेको छैन।
स्थानीय तहको निर्वाचनका लागि माओवादीले अहिले 'गाउँ नगर घर–घर जाउँ, माओवादी केन्द्रलाई विजय गराऔँ' अभियान सञ्चालन गरेको छ। अभियानका क्रममा माओवादीका केही नेताहरुले 'व्यवस्था बदल्यौं, अब अवस्था बदल्न माओवादीलाई भोट' भन्ने नारा अगाडि सारेका छन्। तर, पार्टीले आधिकारिक धारणा तय गरिनसकेकाले मतदातामाझ जाँदा कस्ता अजेण्डा लिएर जाने भन्नेमा नेता/कार्यकर्ता अन्यौलमा छन्।
निर्वाचन आयोगले आगामी वैशाख ३० गते ६ महानगर, ११ उपमहानगर, २७६ नगरपालिका र ४६० गाउँपालिका गरी ७५३ वटा स्थानीय तहमा एकै चरणमा निर्वाचन गर्दै छ। स्थानीय तहले 'स्थानीय सरकार'को रुपमा संवैधानिक अधिकार पाएपछिको यो दोस्रो निर्वाचन हो।
यसअघि २०७४ सालमा तीन चरणमा गरी स्थानीय तहको निर्वाचन भएको थियो। २०७२ सालमा नयाँ संविधान जारी भएपछि तीन तहका सरकारको परिकल्पना गरिएको छ। संघ, प्रदेश र स्थानीय सरकारको रुपमा संघीयताको अभ्यास भइरहेको छ। आम नागरिकको घरदैलोको सरकार भनिने स्थानीय तहको नेतृत्व चयन गर्ने हुने निर्वाचनमा आम नागरिकको पनि चासो र प्रत्यक्ष सरोकार जोडिने गर्छ।
नेकपा एमालेको घोषणापत्र मस्यौदा समिति:
ईश्वर पोखरेल, संयोजक (वरिष्ठ उपाध्यक्ष)
सदस्यहरु:
युवराज ज्ञवाली, उपाध्यक्ष
प्रदीप ज्ञवाली, उपमहासचिव तथा स्कूल विभाग प्रमुख
विष्णु रिमाल, उपमहासचिव तथा निर्वाचन विभाग प्रमुख,
देवेन्द्र दाहाल, पोलिटब्यूरो सदस्य तथा स्थानीय विकास विभाग प्रमुख
प्रभु साह, पार्टी मधेस प्रदेश सह–इञ्चार्ज
मजुञ्जन थापा, बुद्धिजीवी परिषद् इञ्चार्ज
युवराज खतिवडा, नीति अनुसन्धान प्रतिष्ठान सदस्य
प्रभा बराल, स्थानीय विकास विभाग उपप्रमुख
दिनेशचन्द्र देवकोटा, नेपाल बुद्धिजीवी परिषद् अध्यक्ष
सुशील ज्ञवाली, इञ्जिनियर
नेपाली काग्रेसको घोषणापत्र मस्यौदा समिति:
गगन थापा, (संयोजक) महामन्त्री
सदस्यहरु:
१. डा. आरजु राणा देउवा
२. मधु आचार्य
३. प्रा. डा. गोविन्दराज पोखरेल
४. अजयवावु शिवाकोटी
५. नृपबहादुर वड
६. कान्तिका सैजुवाल
७. गुरुराज घिमिरे
८. किरण गिरी
९. हरिप्रभा खड्गी
१०. भीम ढुंगाना
११. दिलिपप्रताप खाँण
१२. वंशलाल तामाङ
१३. विजय शंकर यादव
१४. उमा थापा मगर
१५. भुपेन्द्र राई
१६. ममता महतो
१७. डा. जुगल भुर्तेल
१८. गेजा शर्मा वाग्ले
१९. जगदीश भट्टराई
२०. प्रताप पौडेल
२१. शंकर तिवारी
२२. पुरुषोत्तम नेपाल
२३. डा. इन्द्रा अधिकारी
२४. डा. अभिमन्यु सिंह
२५. डा. वुद्धिमान श्रेष्ठ
२६. मनिष झा
२७. जिमी लामा
२८. शिलशिला आचार्य
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
